ວິກິດນ້ຳຖ້ວມຢູ່ໄນຈີເຣຍ ເສຍຊີວິດເພີ່ມກວ່າ 600 ຄົນ ປະຊາຊົນພັດຖິ່ນນັບລ້ານ

ທາງການໄນຈີເຣຍລາຍງານຜົນກະທົບຈາກສະຖານະການນ້ຳຖ້ວມຄັ້ງຮ້າຍແຮງທີ່ສຸດໃນຮອບທົດສະວັດ, ຫລ້າສຸດພົບວ່າຈຳນວນຜູ້ເສຍຊີວິດເພີ່ມຫລາຍກວ່າ 600 ຄົນແລ້ວ. ຂະນະທີ່ມີເຮືອນຖືກນ້ຳຖ້ວມທຳລາຍໄປກວ່າ 2 ແສນຫລັງ ແລະ ປະຊາຊົນຕ້ອງອົບພະຍົບຖິ້ມເຮືອນກວ່າ 1,3 ລ້ານຄົນ.

ທ່ານ ຊາເດຍ ອູມາ ຟາຣຸກ ລັດຖະມົນຕີກະຊວງກິດຈະການມະນຸດ ແລະ ການແກ້ໄຂໄພພິບັດຂອງໄນຈີເຣຍ ເປີດເຜີຍວ່າ: ໄພພິບັດນ້ຳຖ້ວມທີ່ເກີດຂຶ້ນຕໍ່ເນື່ອງໃນໄລຍະຫລາຍເດືອນຜ່ານມານັ້ນຮຸນແຮງຈົນຍາກຈະຮັບມື ແລະ ມີຫລາຍລັດທີ່ບໍ່ໄດ້ກຽມພ້ອມຮັບມືສະຖານະການຢ່າງເໝາະສົມ ເຖິງວ່າຈະມີການແຈ້ງເຕືອນນ້ຳຖ້ວມລ່ວງໜ້າ.

ຂະນະທີ່ໄນຈີເຣຍຜະເຊີນເຫດນ້ຳຖ້ວມເປັນປະຈຳທຸກປີ ໂດຍປີນີ້ເລີ່ມຂຶ້ນນັບແຕ່ຊ່ວງຕົ້ນຂອງລະດູຮ້ອນ ສົ່ງຜົນໃຫ້ມີເນື້ອທີ່ປູກຝັງຈຳນວນຫລາຍຖືກທຳລາຍ.

ລັດຖະບານໄນຈີເຣຍຊີ້ວ່າ: ຝົນທີ່ຕົກໜັກຜິດປົກກະຕິ ແລະ ສະພາບໂລກປັ່ນປວນເປັນສາເຫດຂອງວິກິດນ້ຳຖ້ວມທີ່ເກີດຂຶ້ນຄັ້ງນີ້, ແຕ່ຜູ້ຊ່ຽວຊານຊີ້ວ່າ: ການວາງແຜນຮັບມືສະຖານະການນ້ຳຖ້ວມທີ່ບໍ່ດີຂອງລັດຖະບານ ແລະ ໂຄງສ້າງພື້ນຖານທີ່ບໍ່ພ້ອມ ເຮັດໃຫ້ຄວາມເສຍຫາຍຂະຫຍາຍວົງກວ້າງຂຶ້ນ.

ທັງນີ້, ຄາດວ່າໄນຈີເຣຍຈະຜະເຊີນວິກິດນ້ຳຖ້ວມຕໍ່ເນື່ອງໄປຈົນຮອດທ້າຍເດືອນພະຈິກ.

ນອກຈາກນີ້, ທາງການຍັງສະແດງຄວາມກັງວົນຕໍ່ການແພ່ລະບາດຂອງພະຍາດທີ່ມາກັບນ້ຳຖ້ວມ ເຊິ່ງພົບເພີ່ມຂຶ້ນ, ຂະນະທີ່ການຂົນສົ່ງອາຫານ ແລະ ນ້ຳມັນເຊື້ອໄຟປະສົບບັນຫາໃນຫລາຍພື້ນທີ່.

ອ້າງອີງ:

https://www.bbc.com/news/world-africa-63280518