ຈີນ ຊຸກຍູ້ວຽກງານຕາມທິດ “ບໍ່ກ້າສໍ້ລາດບັງຫຼວງ, ບໍ່ສາມາດສໍ້ລາດບັງຫຼວງ ແລະ ບໍ່ຢາກສໍ້ລາດບັງຫຼວງ”, ນໍາໃຊ້ຫຼາຍມາດຕະການປາບປາມປຽບເໝືອນການ “ຕີເສືອ” “ຕົບແມງວັນ” ແລະ “ໄລ່ລ່າໝາ ຈອກ”
October 17, 2022 - 2:42 PM
ໃນໂອກາດລາຍງານການເມືອງຕໍ່ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XX ຂອງພັກກອມມູນິດຈີນ ທີ່ຈັດຂຶ້ນຢູ່ຫໍສະພາປະຊາຊົນຈີນ ໃນນະຄອນຫລວງປັກກິ່ງ ແຫ່ງ ສປ ຈີນ ໃນວັນທີ 16 ຕຸລາ 2022. ສະຫາຍ ສີ ຈິ້ນຜິງ, ເລຂາ ທິການໃຫຍ່ຄະນະກໍາມະການສູນກາງພັກກອມມູນິດຈີນ, ປະທານປະເທດຈີນ ໄດ້ຍົກໃຫ້ເຫັນບາງຕອນກ່ຽວກັບການລົງເລິກຊຸກຍູ້ການຄຸ້ມຄອງພັກກອມມູນິດຈີນ ເຊີ່ງໃນໄລຍະຜ່ານມາ ກໍຄື ປັດຈຸບັນ ໄດ້ຈັດຕັ້ງປະຕິບັດຢ່າງເຂັ້ມງວດຮອບດ້ານ, ຍຶດໝັ້ນທີ່ເອີ້ນວ່າ: “ຢາກຕີເຫຼັກໃຫ້ໄດ້ ຕົນເອງຕ້ອງເຂັ້ມແຂງມາກ່ອນ”, ໂດຍເລີ່ມຈາກການສ້າງ ແລະຈັດຕັ້ງປະຕິບັດ “ກົດເຫຼັກ 8 ຂໍ້” ຂອງສູນກາງພັກກອມມູນິດຈີນ ໂດຍໄດ້ສະເໜີ ແລະ ປະຕິບັດຕາມຄວາມຮຽກຮ້ອງ ລວມໃນການກໍ່ສ້າງພັກໃນຍຸກໃໝ່, ນໍາພາວຽກງານທຸກດ້ານໃນການກໍ່ສ້າງພັກດ້ວຍການກໍ່ສ້າງພັກດ້ານການເມືອງ, ຍຶດໝັ້ນໃຫ້ການກໍ່ສ້າງພັກດ້ານແນວຄິດກັບການຄຸ້ມຄອງພັກດ້ວຍລະບຽບການໄປພ້ອມກັນ, ສ້າງຄວາມເຂັ້ມງວດແກ່ຊີວິດການເມືອງພາຍໃນພັກ, ດຳເນີນການສຶກສາອົບຮົມລວມສູນພາຍໃນພັກຢ່າງຕໍ່ເນື່ອງ, ກຳນົດ ແລະ ຍຶດໝັ້ນແນວທາງການຈັດຕັ້ງຂອງພັກໃນຍຸກໃໝ່, ເນັ້ນໃສ່ມາດຕະຖານທາງການເມືອງໃນການເລືອກເຟັ້ນພະນັກງານຜູ້ທີ່ມີຄວາມຮູ້ຄວາມສາມາດ, ເພີ່ມທະວີການລາດຕະເວນກວດກາທາງການເມືອງ ເພື່ອສ້າງເປັນລະບົບກົດຂໍ້ກຳນົດພາຍໃນພັກທີ່ຄົບຖ້ວນສົມບູນ, ຊຸກຍູ້ໃຫ້ທົ່ວພັກຕ້ອງມີອຸດົມການ ແລະຄວາມເຊື່ອໝັ້ນທີ່ເດັດດ່ຽວໜຽວແໜ້ນ, ມີລະບົບການຈັດຕັ້ງທີ່ຖີ່ຖ້ວນ ແລະ ມີລະບຽບວິໄນຢ່າງເຂັ້ມງວດ.
ນອກຈາກນີ້, ພັກກອມມູນິດຈີນ ໄດ້ຍຶດໝັ້ນປັບປຸງແບບແຜນ ແລະ ເຂັ້ມງວດໃນການປະຕິບັດລະບຽບວິໄນຢ່າງຕໍ່ເນື່ອງ, ດັດແກ້ບັນຫາ “4 ແບບແຜນ” ດ້ວຍຈິດໃຈແບບຕອກຕະປູ, ຄັດຄ້ານ ແນວຄິດອະພິສິດ ແລະປະກົດ ການອະພິສິດ, ເດັດດ່ຽວກຳຈັດແບບແຜນທີ່ບໍ່ດີ ແລະ ບັນ ຫາສໍ້ລາດບັງຫຼວງທີ່ເກີດຂຶ້ນຢູ່ອ້ອມຂ້າງປະຊາຊົນ, ໄດ້ສະກັດກັ້ນປະກົດການຫຍໍ້ທໍ້ຈຳນວນໜຶ່ງທີ່ຕົກຄ້າງມາແຕ່ດົນນານ, ແກ້ໄຂບັນຫາຊຳເຮື້ອຈຳນວນໜຶ່ງທີ່ບໍ່ໄດ້ຮັບການແກ້ໄຂມາເປັນເວລາຫຼາຍປີ, ພ້ອມນີ້ ໄດ້ດຳເນີນການຕໍ່ສູ້ຕ້ານການສໍ້ລາດບັງຫຼວງທີ່ບໍ່ເຄີຍມີມາກ່ອນ, ກໍາຈັດປັດເປົ່າປະກົດການຫຍໍ້ທໍ້ຕ່າງໆ ດ້ວຍຄວາມຮັບຜິດຊອບສູງທີ່ບໍ່ເຮັດໃຫ້ປະຊາຊົນຈໍານວນ 1,4 ຕື້ຄົນຜິດຫວັງໂດຍບໍ່ລັ່ງເລໃນການລົງໂທດພວກສໍ້ລາດບັງຫຼວງເປັນຮ້ອຍເປັນພັນຄົນ. ຊຸກຍູ້ວຽກງານຕາມທິດ “ບໍ່ກ້າສໍ້ລາດບັງຫຼວງ, ບໍ່ສາມາດສໍ້ລາດບັງຫຼວງ ແລະ ບໍ່ຢາກສໍ້ລາດບັງຫຼວງ”, ນໍາໃຊ້ຫຼາຍມາດຕະການປາບປາມປຽບເໝືອນການ “ຕີເສືອ” “ຕົບແມງວັນ” ແລະ “ໄລ່ລ່າໝາ ຈອກ” ໄປພ້ອມກັນ ເຮັດໃຫ້ການຕໍ່ສູ້ຕ້ານການສໍ້ລາດບັງຫຼວງໄດ້ຮັບໄຊຊະນະຢ່າງໃຫຍ່ຫຼວງ ແລະ ໄດ້ຮັບການປັບປຸງຢ່າງຮອບດ້ານ, ອັນໄດ້ ກຳຈັດຄວາມສ່ຽງຮ້າຍແຮງທີ່ແຝງຊ້ອນຢູ່ພາຍໃນພັກ, ລັດ ແລະກອງທັບ, ຮັບປະກັນໃຫ້ສິດອໍານາດທີ່ມອບໝາຍໂດຍພັກ ແລະ ປະຊາຊົນໄດ້ຮັບການນຳໃຊ້ໃນການສະແຫວງຫາຄວາມສຸກໃຫ້ແກ່ປະຊາຊົນຢ່າງສະເໝີຕົ້ສະເໝີປາຍ.
ສະຫາຍເລຂາທິການໃຫຍ່ຄະນະກໍາມະການສູນກາງພັກກອມມູນິດຈີນ ຢືນຢັນວ່າ: ຜ່ານຈາກຄວາມພະຍາຍາມຢ່າງບໍ່ລົດລະ, ພັກກອມມູນິດຈີນ ໄດ້ຊອກເຫັນຄໍາຕອບທີ່ຕ່າງກັບກົດເກນປະຫວັດສາດແຫ່ງການຈາກຄວາມຈະເລີນໄປສູ່ຄວາມຊຸດໂຊມ, ນັ້ນກໍຄື: ການປະຕິວັດໂດຍຕົນເອງ, ເຮັດໃຫ້ຄວາມສາມາດຂອງພັກໃນການສະສາງລ້າງສວ່າຍຕົນເອງ, ປັບປຸງຕົນເອງ, ປະຕິຮູບຕົນເອງ ແລະ ຍົກລະດັບຕົນເອງໄດ້ເພີ່ມຂຶ້ນຢ່າງເດັ່ນຊັດ, ສະພາບ ການທີ່ຄຸ້ມ ຄອງບໍລິຫານພັກແບບໂຍະຍານ ແລະ ອ່ອນແອຖືກປ່ຽນແປງຈາກດ້ານກົກຮາກ, ສະພາບແວດລ້ອມທາງການເມືອງພາຍໃນພັກທີ່ປອດໃສໄດ້ຈໍ່ຕົວຂຶ້ນ ແລະ ໄດ້ຮັບການພັດທະນາເລື້ອຍໆ ເຊີ່ງເປັນການຮັບປະກັນໃຫ້ພັກກອມມູນິດຈີນບໍ່ປ່ຽນທາດແທ້, ບໍ່ປ່ຽນສີ ແລະ ບໍ່ປ່ຽນກິ່ນ.
