IMF ຄາດວ່າ ເສດຖະກິດໂລກ ໃນປີ 2022 ຈະຂະຫຍາຍຕົວຊ້າລົງ ຢູ່ໃນລະດັບ 3,2% ແລະ 2,7% ໃນປີ 2023.
October 17, 2022 - 4:11 PM
ໃນລະຫວ່າງວັນທີ 10-16 ຕຸລາ 2022, ຄະນະຂອງທະນາຄານແຫ່ງ ສປປ ລາວ (ທຫລ) ນໍາໂດຍ ທ່ານ ບຸນເຫຼືອ ສິນໄຊວໍຣະວົງ, ຜູ້ວ່າການທະນາຄານແຫ່ງ ສປປ ລາວ ໄດ້ເດີນທາງເຂົ້າຮ່ວມກອງປະຊຸມປະຈໍາປີຂອງກອງທຶນການເງິນສາກົນ (IMF) ແລະ ທະນາຄານໂລກ (WBG) ທີ່ຈັດຂຶ້ນຢ່າງເປັນທາງການທີ່ ນະຄອນຫຼວງ ວໍຊິງຕັນ ດີຊີ, ສ. ອາເມລິກາ.
ກອງປະຊຸມດັ່ງກ່າວ ເເມ່ນຈັດຂຶ້ນຮ່ວມກັນລະຫວ່າງ IMF ແລະ WBG ໂດຍມີຈຸດປະສົງໃນການນໍາຜູ້ເເທນຈາກທະນາຄານກາງ, ກະຊວງການເງິນ, ພາກທຸລະກິດ, ອົງກອນເພື່ອສັງຄົມ ແລະ ນັກວິຊາການຈາກປະເທດສະມາຊິກ IMF ແລະ WBG ເພື່ອມາປຶກສາຫາລືກ່ຽວກັບເສດຖະກິດໂລກ, ສະຖຽນລະພາບທາງດ້ານການເງິນໂລກ ແລະ ການພັດທະນາເສດຖະກິດ. ພ້ອມດຽວກັນ, ກໍ່ຈະມີການປຶກສາຫາລືກ່ຽວກັບບັນຫາທີ່ສາກົນ ກໍ່ຄືປະເທດໃນໂລກກໍາລັງມີຄວາມສົນໃຈເປັນຕົ້ນເເມ່ນ ສະພາບເຄັ່ງຕຶງທາງເສດຖະກິດໃນເເຕ່ລະໄລຍະ, ການຄາດຄະເນເສດຖະກິດ, ການຫຼຸດຜ່ອນຄວາມທຸກຍາກ ແລະ ປະສິດທິພາບຂອງການຊ່ວຍເຫຼືອຕ່າງໆ ພາຍໃຕ້ຫຼາຍຮູບເເບບຄື: ກອງປະຊຸມສໍາມະນາ, ການບັນຍາຍລະດັບພາກພື້ນງານຖະເເຫຼງຂ່າວ ແລະ ການສົນທະນາໃນຮູບເເບບອື່ນໆ.
ໃນໄລຍະດັ່ງກ່າວ, ທ່ານ ຜູ້ວ່າການ ທຫລ ພ້ອມດ້ວຍຄະນະ ໄດ້ເຂົ້າຮ່ວມຫຼາຍກອງປະຊຸມທີ່ມີຄວາມສໍາຄັນ ເປັນຕົ້ນເເມ່ນ: ກອງປະຊຸມໂຕະມົນລະຫວ່າງຜູ້ອໍານວຍການໃຫ່ຍຂອງ IMF ແລະ ຄະນະຜູ້ວ່າການຂອງກຸ່ມປະເທດອາຊຽນ (ASEAN Roundtable), ກອງປະຊຸມຄະນະກໍາມະການເງິນສາກົນ (International Monetary Financial Committee ຫຼື IMFC) ເພື່ອຮັບຟັງການລາຍງານສະພາບເສດຖະກິດໂລກ, ເເລກປ່ຽນມຸມມອງກ່ຽວກັບຄວາມສ່ຽງ ແລະ ມາດຕະການຮັບມືກັບວິກິດການທາງເສດຖະກິດທີ່ກໍາລັງປະເຊີນໃນປັດຈຸບັນ. ຄຽງຄູ່ກັນນີ້, ຍັງໄດ້ເຂົ້າຮ່ວມກອງປະຊຸມລັດຖະມົນຕີການເງິນ ແລະ ຜູ້ວ່າການທະນາຄານກາງອາຊຽນ (ASEAN Finance Minister and Central Bank Governors) ແລະ ພົບປະສອງຝ່າຍກັບກົມວິຊາການຂອງ IMF ຈໍານວນໜຶ່ງເພື່ອປຶກສາຫາລືກ່ຽວກັບສະພາບເສດຖະກິດຂອງ ສປປ ລາວ ແລະ ພາກພື້ນ ພ້ອມທັງວຽກງານຕິດພັນການຊ່ວຍເຫຼືອທາງດ້ານວິຊາການ.
ກອງປະຊຸມໃນຄັ້ງນີ້ ຖືເປັນກອງປະຊຸມຊ້ອງໜ້າຄັ້ງທໍາອິດພາຍຫຼັງການເເຜ່ລະບາດຂອງເຊື້ອພະຍາດໂຄວິດ-19 ຊຶ່ງມີຜູ້ເຂົ້າຮ່ວມຈາກທະນາຄານກາງ ແລະ ກະຊວງການເງິນຂອງບັນດາປະເທດສະມາຊິກ IMF ແລະ WBG ຈາກ 190 ປະເທດ, ພ້ອມທັງນັກວິຊາການ ແລະ ພາກທຸລະກິດຈາກທົ່ວໂລກເຂົ້າຮ່ວມມີທັງໝົດ 40.000 ກວ່າຄົນ.
ໃນທ່າມກາງສະພາບເສດຖະກິດໂລກທີ່ມີຄວາມຜັນຜວນ ແລະ ມີຄວາມສ່ຽງຫຼາຍດ້ານ ໂດຍສະເພາະການສືບຕໍ່ເເຜ່ລະບາດຂອງເຊື້ອພະຍາດໂຄວິດ-19, ຄວາມເຄັ່ງຕຶງທາງດ້ານການຄ້າ ແລະ ໄພທໍາມະຊາດ ຊຶ່ງໄດ້ສົ່ງຜົນໃຫ້ອັດຕາເງິນເຟີ້ເພີ່ມສູງຂຶ້ນໃນທົ່ວໂລກ ກະທົບຕໍ່ຊີວິດການເປັນຢູ່ຂອງປະຊາຊົນໂດຍສະເພາະປະຊາຊົນທີ່ທຸກຍາກ. ອີງຕາມການປະເມີນຂອງ IMF, ເສດຖະກິດໂລກ ໃນປີ 2022 ຄາດວ່າຈະຂະຫຍາຍຕົວຊ້າລົງ ເມື່ອທຽບໃສ່ປີ ຜ່ານມາ ຄືຢູ່ໃນລະດັບ 3,2% ແລະ 2,7% ໃນປີ 2023. ໃນຂະນະດຽວກັນ, IMF ກໍ່ຄາດວ່າອັດຕາເງິນເຟີ້ຂອງໂລກ ຈະຢູ່ໃນລະດັບ 8,8% ໃນປີ 2022 ແລະ ປັບຫຼຸດເປັນ 6,5% ໃນປີ 2023 ແລະ 4,1% ໃນປີ 2024.
ສະນັ້ນ, IMF ຈຶ່ງໄດ້ໃຫ້ຄໍາເເນະນໍາຕໍ່ກັບການວາງນະໂຍບາຍເງິນຕາ ແລະ ການເງິນຂອງບັນດາປະເທດ ຄວນມີການປະສານສົມທົບກັນຢ່າງກົມກຽວ ໂດຍສະເພາະນະໂຍບາຍເງິນຕາຄວນສຸມໃສ່ການຮັກສາສະຖຽນລະພາບທາງດ້ານລາຄາ ໃນຂະນະດຽວກັນ ນະໂຍບາຍການເງິນ ຄວນສຸມໃສ່ໃຫ້ເເກ້ໄຂບັນດາຄ່າຄອງຊີບທີ່ເພິ່ມສູງຂຶ້ນ. ທັງນີ້, ທັງສອງອົງກອນ, IMF ແລະ WBG ກໍຈະຕັ້ງໜ້າສືບຕໍ່ໃຫ້ການຊ່ວຍເຫຼືອປະເທດສະມາຊິກຂອງຕົນ ຕາມພາລະບົດບາດຂອງຕົນຢ່າງສຸດຄວາມສາມາດ ເພື່ອຮັກສາສະຖຽນລະພາບ ແລະ ຄວາມເຂັ້ມເເຂງຂອງເສດຖະກິດໂລກ ແລະ ບັນດາປະເທດ ພ້ອມທັງພັດທະນາຊີວິດການເປັນຢູ່ຂອງປະຊາຊົນໃນທົ່ວໂລກໃຫ້ດີຂຶ້ນ.
