ກອງທັບອິນເດຍກ້າວໜ້າອີກຂັ້ນ ທົດລອງລູກສອນໄຟດ້ວຍເຮືອດຳນ້ຳ

ອິນເດຍກ່າວວ່າ: ການທົດລອງລູກສອນໄຟດ້ວຍເຮືອດຳນ້ຳປະສົບຜົນສຳເລັດ ເຮັດໃຫ້ປັດຈຸບັນ ອິນເດຍເປັນປະເທດທີ 6 ທີ່ມີເຮືອດຳນ້ຳພະລັງງານນິວເຄຼຍ ພ້ອມຄວາມສາມາດໃນການປ່ອຍລູກສອນໄຟ.

ກະຊວງປ້ອງກັນປະເທດຂອງອິນເດຍກ່າວວ່າ: ອິນເດຍປະສົບຜົນສຳເລັດໃນການທົດລອງລູກສອນໄຟທີ່ຍິງຈາກເຮືອດຳນ້ຳພະລັງງານນິວເຄຼຍທີ່ສ້າງຂຶ້ນເອງລຳທຳອິດຂອງຕົນຄື INS Arihant ເຊິ່ງເປັນການເພີ່ມຂີດຄວາມສາມາດທາງທະຫານຂອງປະເທດເປັນການພິສູດປະສິດທິພາບຂອງລູກເຮືອ ແລະ ຂີດຄວາມສາມາດໃນການຍິງລູກສອນໄຟຂອງເຮືອດຳນ້ຳອິນເດຍ.

ປັດຈຸບັນ ອິນເດຍເປັນປະເທດທີ 6 ຕໍ່ຈາກ ຈີນ, ຝຣັ່ງ, ຣັດເຊຍ, ອັງກິດ ແລະ ອາເມລິກາ ທີ່ມີເຮືອດຳນ້ຳພະລັງງານນິວເຄຼຍຕິດລູກສອນໄຟ. ໜັງສືພິມທາມ ອອບ ອິນເດຍ ລາຍງານໃນວັນທີ 14 ຕຸລາ ການຍິງລູກສອນໄຟ (SLBM) ທີ່ປ່ອຍໂດຍເຮືອດຳນ້ຳໄດ້ສຳເລັດຍັງເນັ້ນເຖິງການຊຸກຍູ້ຂອງອິນເດຍໃນການສ້າງຍຸດໂທປະກອນທາງທະຫານຂອງຕົນເອງ.

ໂດຍໃນເດືອນກັນຍາ, ອິນເດຍໄດ້ເປີດຕົວເຮືອບັນທຸກເຮືອບິນ INS Vikrant ເຊິ່ງເປັນເຮືອບັນທຸກເຮືອບິນທີ່ຜະລິດໃນປະເທດເປັນຄັ້ງທຳອິດ ເຊິ່ງໄດ້ຮັບການຍົກຍ້ອງວ່າເປັນເຮືອບັນທຸກເຮືອບິນທີ່ມີຄວາມແຂງແຮງສູງເພື່ອຕໍ່ຕ້ານຄວາມມຸ້ງໝັ້ນທາງການທະຫານທີ່ເພີ່ມຂຶ້ນຂອງຈີນໃນພາກພື້ນນີ້. ເຮືອ INS Vikrant  ເປັນໜຶ່ງໃນເຮືອແລ່ນໃນທະເລໃຫຍ່ທີ່ສຸດໃນໂລກ ມີຄວາມຍາວ 262 ແມັດ ແລະ ເຂົ້າປະຈຳການຫລັງໄດ້ຮັບການກໍ່ສ້າງ ແລະ ທົດລອງມາ 17 ປີ.

ອິນເດຍເປັນໜຶ່ງໃນປະເທດຜູ້ສົ່ງອອກອາວຸດລາຍໃຫຍ່ທີ່ສຸດໃນໂລກ ແລະ ກຳລັງພະຍາຍາມກະຕຸ້ນອຸດສາຫະກຳອາວຸດຂອງປະເທດ ເນື່ອງຈາກຍັງອາໄສອາວຸດຈາກຣັດເຊຍ ເຊິ່ງເປັນຜູ້ປ້ອນອາວຸດ ແລະ ອຸປະກອນທາງທະຫານໃຫຍ່ທີ່ສຸດ ແລະ ເກົ່າແກ່ທີ່ສຸດມາເປັນເວລາຫລາຍສິບປີ.

ສຳລັບ INS Arihant ເປັນເຮືອດຳນ້ຳນິວເຄຼຍທີ່ສ້າງຂຶ້ນເອງລຳທຳອິດຂອງອິນເດຍ ແລະ ເປີດຕົວໃນປີ 2009 ນັບແຕ່ນັ້ນມາ ອິນເດຍໄດ້ພັດທະນາລູກສອນໄຟທີ່ຍິງຈາກເຮືອດຳນ້ຳເຊິ່ງມີຄວາມສາມາດໃນການຕິດຕັ້ງຫົວຮົບນິວເຄຼຍໄດ້ ສອງລຸ້ນ ເຊິ່ງໜຶ່ງໃນນັ້ນມີໄລຍະທາງ 3.500 ກິໂລແມັດ.