ນາຍົກລັດຖະມົນຕີອັງກິດ ໄລ່ ລັດຖະມົນຕີການເງິນ ອອກຈາກຕຳແໜ່ງ ຍ້ອນແຜນຫລຸດພາສີ

ສຳນັກຂ່າວຕ່າງປະເທດລາຍງານວ່າ: ທ່ານ ນາງ ລິຊ ທຣັສ ນາຍົກລັດຖະມົນຕີອັງກິດ ໄດ້ໄລ່ທ່ານ ຄວາຊີ ຄວາເຕັງ ລັດຖະມົນຕີວ່າການກະຊວງການເງິນຂອງນາງອອກ ວັນທີ 14 ຕຸລາ.

ສຳນັກຂ່າວ BBC ລາຍງານວ່າ: ເມື່ອບໍ່ດົນມານີ້, ທ່ານ ນາງ ລິຊ ທຣັສ ເປັນເປົ້າໝາຍຖືກໂຈມຕີທາງການເມືອງ ຫລັງປະກາດນະໂຍບາຍການເງິນ ແລະ ພາສີ ເຊິ່ງກາຍເປັນປັດໄຈທຳລາຍຄວາມເຊື່ອໝັ້ນທາງເສດຖະກິດ ແລະ ການລົງທຶນ ຈົນນາງຕ້ອງພະຍາຍາມເອົາຕົວລອດຈາກຄວາມວຸ້ນວາຍນີ້ ແລະ ທາງອອກຂອງນາງຄືໃຫ້ລັດຖະມົນຕີການເງິນອອກຈາກຕຳແໜ່ງ.

ໂດຍລັດຖະສະພາອັງກິດຢືນຢັນວ່າ: ນາງ ທຣັສ ເຊິ່ງຢູ່ໃນອຳນາດພຽງ 37 ວັນ ຈະຈັດງານຖະແຫລງໃນວັນທີ 14 ຕຸລາ ໃນບັນຫາຮ້ອນດັ່ງກ່າວ. ຂະນະດຽວກັນ ມີລາຍງານວ່າ: ທ່ານ ຄວາເຕັງ ຖືກບັງຄັບໃຫ້ຟ້າວກັບມາລອນດອນ ຈາກອງປະຊຸມ IMF ໃນວໍຊິງຕັນ.

ທັງນີ້, ຖ້າຂໍ້ມູນນີ້ໄດ້ຮັບການຢືນຢັນ ທ່ານ ຄວາເຕັງ ຈະກາຍເປັນລັດຖະມົນຕີທີ່ອາຍຸງານສັ້ນທີ່ສຸດຂອງອັງກິດນັບແຕ່ປີ 1970.

ກ່ອນໜ້ານີ້ ອັດຕາຜົນຕອບແທນພັນທະບັດລັດຖະບານອັງກິດປັບສູງຂຶ້ນ ລວມທັງຕະຫລາດບອນມີຄວາມຜັນຜວນ ລັດຖະບານຂອງນາງ ທຣັສ ຈຶ່ງຕ້ອງຊອກຫາວິທີສ້າງສົມດູນທາງການເງິນເພີ່ມ ຫລັງນະໂຍບາຍຫລຸດຜ່ອນພາສີບໍ່ໄດ້ຮັບການສະໜັບສະໜູນ ແຕ່ພັດສົ່ງຜົນໃນທາງກົງກັນຂ້າມ ໂດຍເຮັດໃຫ້ມູນຄ່າຊັບສິນຂອງອັງກິດປັບຫລຸດລົງ ອີກທັງນະໂຍບາຍຂອງນາງຍັງຖືກຕຳໜິຈາກບັນດາປະເທດ.

ໂດຍທ່ານ ຄວາເຕັງ ເປັນຜູ້ປະກາດນະໂຍບາຍການເງິນສະບັບໃໝ່ໃນວັນທີ 23 ກັນຍາຜ່ານມາ ເຊິ່ງທ່ານນຳສະເໜີໃຫ້ຫລຸດພາສີຈຳນວນຫລາຍ ລວມທັງໄດ້ຫລຸດຜ່ອນກົດລະບຽບຕ່າງໆ ເພື່ອຟື້ນຟູການເຕີບໃຫຍ່ທາງເສດຖະກິດທີ່ຊຸດໂຊມເປັນເວລາຫລາຍປີ.

ເຖິງຢ່າງໃດກໍຕາມ, ການຕອບສະໜອງຈາກຕະຫລາດພັດເປັນໄປທາງລົບຢ່າງຮຸນແຮງ ຈົນທະນາຄານກາງອັງກິດ (BOE) ຕ້ອງເຂົ້າໄປແຊກແຊງເພື່ອປ້ອງກັນບໍ່ໃຫ້ກອງທຶນບຳນານເກີດຄວາມເສຍຫາຍຈາກການລົງທຶນອັນເປັນຜົນມາຈາກຕົ້ນທຶນການກູ້ຢືມ ແລະ ການຈຳນອງເພີ່ມສູງຂຶ້ນ.

ນັບແຕ່ນັ້ນມາ, ນາງ ທຣັສ ແລະ ທ່ານ ຄວາເຕັງ ຕົກຢູ່ພາຍໃຕ້ແຮງກົດດັນໃຫ້ຍົກເລີກນະໂຍບາຍ.

ໃນເວລາໄລ່ລຽງກັນຂອງວັນທີ 14 ຕຸລາ, ສຳນັກຂ່າວ Reuters ລາຍງານວ່າ: ທ່ານ ຄວາຊີ ຄວາເຕັງ ລັດຖະມົນຕີການເງິນຂອງອັງກິດ ເຊິ່ງຢູ່ລະຫວ່າງການໄປປະຊຸມ IMF ຢູ່ນະຄອນຫລວງວໍຊິງຕັນ ໄດ້ກ່າວຢືນຢັນວ່າ: ທ່ານຖືກນາຍົກລັດຖະມົນຕີໄລ່ອອກຈາກຕຳແໜ່ງ.

ທັງນີ້, ທ່ານ ຄວາຊີ ຄວາເຕັງ ກາຍເປັນລັດຖະມົນຕີຄົນທີ 3 ທີ່ຈະລາອອກຈາກລັດຖະບານໃນປີນີ້.