ກຣີນວູດ ຖືກຕຳຫລວດຈັບກຸມອີກເທື່ອຫນຶ່ງ ຫລັງລະເມີດເງື່ອນໄຂສຳຄັນການປະກັນຕົວ

ສື່ອັງກິດລາຍງານວ່າ ເມສັນ ກຣີນວູດ ກອງໜ້າດາວຮຸ່ງ ແມນເຊສເຕີ ຢູໄນເຕັດ ຖືກຈັບຖານະລະເມີດເງື່ອນໄຂການ ປະກັນຕົວຫລັງກ່ອນໜ້ານີ້ລາວຖືກຈັບກຸມໃນຂໍ້ຫາຂົ່ມຂືນ ທຳຮ້າຍຮ່າງກາຍ ແລະ ຂູ່ຂ້າ.

ສຳລັບ ກຣີນວູດ ກໍ່ເຫດດັງດ້ວຍການທຳຮ້າຍ ແຮຣຽດ ຣ໊ອບສັນ ອະດີດແຟນສາວຢ່າງຮຸນແຮງເມື່ອເດືອນມັງກອນ ແລະ ລາວຕ້ອງປະເຊີນຂໍ້ກ່າວຫາເຖິງ 3 ຄະດີຂົ່ມຂືນ ທຳຮ້າຍຮ່າງກາຍ ແລະ ຂູ່ຂ້າ ຢ່າງໃດກໍຕາມສຸດທ້າຍດາວເຕະອາຍຸ 21 ປີກໍໄດ້ຮັບການປະກັນຕົວເພື່ອຖ້າສູ້ຄະດີ.

ແຕ່ຫລ້າສຸດ Daily mail ລາຍງານວ່າ ກຣີນວູດ ຖືກຕຳຫລວດຈັບອີກເທື່ອຫນຶ່ງທີ່ເຮືອນຂອງຕົວເອງເມື່ອວັນທີ 15 ຕຸລາ ໃນຂໍ້ຫາລະເມີດເງື່ອນໄຂການປະກັນຕົວ ຫລັງມີການອ້າງວ່າລາວໄດ້ຕິດຕໍ່ກັບອະດີດແຟນສາວທີ່ຕົກເປັນເຫຍື່ອ.

ທັງນີ້ ກຣີນວູດ ບໍ່ໄດ້ລົງສະໜາມໃຫ້ ແມນເຊສເຕີ ຢູໄນເຕັດ ຕັ້ງແຕ່ເດືອນມັງກອນ ເນື່ອງຈາກຖືກໂທດແບບບໍ່ມີກຳນົດ ຫລັງກໍ່ເຫດຄະດີດັງ ແຕ່ຍັງໄດ້ຮັບຄ່າເມື່ອຍອາທິດລະ 75,000 ປອນຕໍ່ໄປ.