ອິນເດຍສັ່ງ “ບໍລິສັດຢາ” ທ້ອງຖິ່ນຢຸດຜະລິດ ຫລັງພົບເດັກເສຍຊີວິດໃນແກມເບຍ

ວັນທີ 12 ຕຸລາ 2022, ສຳນັກຂ່າວຊິນຮົວລາຍງານວ່າ: ທ່ານ ອານິລ ວິຈ ລັດຖະມົນຕີວ່າການກະຊວງສາທາລະນະສຸກລັດຫໍຢານາທາງຕອນເໜືອຂອງອິນເດຍ ເປີດເຜີຍວ່າ: Maiden Pharmaceuticals ບໍລິສັດການຢາສັນຊາດອິນເດຍ ເຊິ່ງຜະລິດຢາແກ້ໄອທີ່ມີຂໍ້ບົກພ່ອງຈົນເຮັດໃຫ້ເດັກໃນແກມເບຍເສຍຊີວິດ 60 ກວ່າຄົນ ຖືກສັ່ງໃຫ້ຢຸດການຜະລິດຢາທັງໝົດ ໂດຍມີຜົນບັງຄັບໃຊ້ທັນທີ.

ທ່ານ ວິຈ ກ່າວວ່າ: ໜ່ວຍງານຢາຂອງລັດຖະບານ ແລະ ລັດຫໍຢານາ ດຳເນີນການກວດສອບເມເດນ ຟາມາຊູຕິຄໍ ໃນເຂດໂສນິພັດຂອງລັດຫໍຢານາ ແລະ ພົບຂໍ້ບົກພ່ອງສູງເຖິງ 12 ລາຍການ ຈຶ່ງນຳໄປສູ່ການອອກຄຳສັ່ງໃຫ້ບໍລິສັດດັ່ງກ່າວຢຸດການຜະລິດທັງໝົດ.

ເມເດນ ຟາມາຊູຕິຄໍ ສົ່ງອອກຢາແກ້ໄອຫລາຍປະເພດໄປແກມເບຍ ເຊິ່ງມີລາຍງານເດັກເສຍຊີວິດ, ຕໍ່ມາອົງການອະນາໄມໂລກ (WHO) ອອກປະກາດເຕືອນຄວາມປອດໄພຂອງຜະລິດຕະພັນຢາແກ້ໄອເຫລົ່ານັ້ນ, ພ້ອມລະບຸການເຊື່ອມໂຍງລະຫວ່າງຢາແກ້ໄອຂອງເມເດນ ຟາມາຊູຕິຄໍ ຈຳນວນ 4 ຍີ່ຫໍ້ ກັບການເສຍຊີວິດໃນແກມເບຍ.

ຢາແກ້ໄອທັງ 4 ຍີ່ຫໍ້ ໄດ້ແກ່ Promethazin Oral Solution, Kofexmalin Baby Cough Syrup, Makoff Baby Cough Syrup ແລະ MaGrip N Cold Syrup.

ທ່ານ ວິຈ ກ່າວຕໍ່ສື່ມວນຊົນໃນລັດຫໍຢານາວ່າ: ຕົວຢ່າງຢາຂອງເມເດນ ຟາມາຊູຕິຄໍ ທີ່ອົງການອະນາໄມໂລກກ່າວເຖິງນັ້ນຖືກສົ່ງໄປຫ້ອງປະຕິບັດການຢາສູນກາງໃນເມືອງໂກລກາຕາແລ້ວ, ສ່ວນລັດຖະບານກຳລັງຮວບຮວມຂໍ້ມູນໃຫ້ຄົບສົມບູນ.