WHO ເຕືອນເອີຣົບຜະເຊີນການແພ່ລະບາດຮອບໃໝ່ ຂອງໂຄວິດ-19
October 13, 2022 - 12:43 PM
ອົງການອະນາໄມໂລກ (WHO) ແລະ ສູນຄວບຄຸມ ແລະ ປ້ອງກັນພະຍາດແຫ່ງເອີຣົບ (ECDC) ອອກຖະແຫລງການຮ່ວມ ລະບຸວ່າ: ການແພ່ລະບາດຮອບໃໝ່ຂອງໂຄວິດ-19 ອາດເລີ່ມຂຶ້ນຢູ່ເອີຣົບແລ້ວ ເນື່ອງຈາກຈຳນວນຜູ້ຕິດເຊື້ອໄດ້ເພີ່ມຂຶ້ນທົ່ວພາກພື້ນ.
“ເຖິງວ່າພວກເຮົາບໍ່ໄດ້ຢູ່ໃນສະຖານະການດຽວກັບເມື່ອປີຜ່ານມາ, ແຕ່ແນ່ນອນວ່າການແພ່ລະບາດຂອງໂຄວິດ-19 ຍັງບໍ່ສິ້ນສຸດລົງ” ທ່ານ ຮັນ ຄລູ ຜູ້ອຳນວຍການປະຈຳພາກພື້ນເອີຣົບຂອງ WHO ແລະ ທ່ານແອນເດຣຍ ແອມມອນ ຜູ້ອຳນວຍການ ECDC ລະບຸໃນຖະແຫລງການ.
ຂໍ້ມູນຂອງ WHO ລະບຸວ່າ: ເອີຣົບເປັນພາກພື້ນດຽວທີ່ມີການເພີ່ມຂຶ້ນຂອງຈຳນວນຜູ້ຕິດເຊື້ອໂຄວິດ-19 ໃນອາທິດຜ່ານມາ ໂດຍເພີ່ມຂຶ້ນ 8% ເມື່ອທຽບໃສ່ອາທິດກ່ອນໜ້ານັ້ນ.
WHO ແລະ ECDC ເປີດເຜີຍວ່າ: ຊາວເອີຮົບຈຳນວນຫລາຍລ້ານຄົນຍັງບໍ່ໄດ້ຮັບການສັກວັກຊີນປ້ອງກັນໂຄວິດ-19.
