ເປແອສເຊ ເລັງຄວ້າ ຊາລາ ເສີມເກມບຸກ ຫາກ ເອັມບັບເປ ອຳລາທີມ

ສື່ລາຍງານວ່າ ປາຣີສ ແຊັງ ແຊັກແມັງ ວາງເປົ້າຄວ້າ ໂມຮາເຫມັດ ຊາລາ ກອງໜ້າລີເວີພູລ ມາຮ່ວມທີມ ຫາກ ຄີລຽນ ເອັມບັບເປ ອຳລາສະໂມສອນ.

“Marca” ສື່ຊື່ດັງຂອງສະເປນ ແລະ “ RMC Sport” ຂອງຝຣັ່ງ ລາຍງານກົງກັນວ່າ : ເອັມບັບເປ ຕ້ອງການຍ້າຍອອກຈາກ ເປແອສເຊ ເຖິງວ່າຫາກໍຕໍ່ສັນຍາກັບທີມອອກໄປຈົນເຖິງປີ 2025 ເມື່ອເດືອນພຶດສະພາຜ່ານມາ.

ສາເຫດສຳຄັນທີ່ເຮັດໃຫ້ດາວເຕະອາຍຸ 23 ປີ ຕ້ອງການອຳລາຖິ່ນ ປາກ ເດ ແພຣັງ ເນື່ອງຈາກລາວຮູ້ສຶກຖືກຫັກຫລັງຈາກ ການທີ່ສະໂມສອນບໍ່ຍອມຮັກສາສັນຍາທີ່ເຄີຍເວົ້າໄວ້ ແລະ ຫວັງປ່ຽນສັງກັດໃນຕະຫລາດນັກເຕະໜ້າໜາວນີ້.

ຈົນຫລ້າສຸດ ອິສມາເອລ ມາມູດ ນັກຂ່າວຈາກ LFC Tranfer Room ລະບຸວ່າ ຫາກເປແອສເຊ ຕ້ອງປ່ອຍ ເອມບັບເປ ອອກຈາກທີມ ພວກເຂົາຕັ້ງເປົ້າທີ່ຈະເຊັນສັນຍາ ໂມຮາເຫມັດ ຊາລາ ປີກຄົນດັງຂອງ ລີເວີພູລ ມາເສີມທີມ ຫລັງໃຫ້ ຄວາມສົນມາຢ່າງຍາວນານ.

ແຕ່ຫລັງເກມທີ່ ເປແອສເຊ ສະເຫມີ ເບນຟີກາ 1-1 ໃນການແຂ່ງຂັນ ຢູຟາ ແຊ໊ມປຽນ ລີກ ຮອບແບ່ງກຸ່ມ ຫລຸຍ ຄຳໂປສ ຜູ້ອຳນວຍການກິລາ ເປແອສເຊ ໄດ້ໃຫ້ສຳພາດເຖິງຂ່າວລືຂອງເອັມບັບວ່າ : “ ເອັມບັບເປ ບໍ່ເຄີຍບອກຂ້ອຍ ຫລື ນາສເຊີ ອັລ ເຄໄລຟີ ວ່າລາວຕ້ອງການອອກຈາກທີມໃນເດືອນມັງກອນນີ້ ເອັມບັບເປ ມີຄວາມສຸກກັບທີມຢູ່ນີ້ບໍ່ ? ເຈົ້າຄວນຖາມລາວ ແຕ່ຂ້ອຍເຫັນລາວເຮັດວຽກຢ່າງມືອາຊີບ ”.