ລິເວີພູລ ປະສົບຂ່າວຮ້າຍ! ຫລຸຍ ດິອາສ ຕ້ອງພັກຍາວເຖິງບານໂລກ ຈາກອາການບາດເຈັບຫົວເຂົ່າ
ສໍາລັບສະຖານະການຂອງ ລິເວີພູລ ໃນເວລານີ້, ນອກຈາກຜົນງານໃນສະໜາມຈະເປັນເລື່ອງທີ່ຫນ້າຜິດຫວັງແລ້ວ ພວກເຂົາຕ້ອງພົບກັບຂ່າວຮ້າຍກ່ຽວກັບອາການບາດເຈັບຂອງນັກເຕະຕົວຫລັກ ຫລຸຍ ດີອາສ ເຂົ້າມາຊ້ຳເຕີມອີກ.
ປີກທີມຊາດໂຄລໍາເບຍຊ່ວຍ ດາວິນ ນູເນສ ທີ່ຍິງປະຕູທີ່ສະໜາມ ເອມິເຣດ ສະເຕດຽມ ເມື່ອທ້າຍອາທິດທີ່ຜ່ານມາ ເອົາຊະນະ ອາເຊນອລ 3-2. ກ່ອນທີ່ຈະໂຊກຮ້າຍໄດ້ຮັບບາດເຈັບຫົວເຂົ່າໃນຕອນທ້າຍຂອງເຄິ່ງທໍາອິດ ຈົນຕ້ອງຖືກປ່ຽນອອກທັນທີ
ເຈເກຣັນ ຄຣັອບ ຜູ້ຈັດການ ລິເວີພູລ ຍອມຮັບຢ່າງກົງໄປກົງມາ ວ່າອະດີດນັກເຕະ ປໍໂຕ້ ເບິ່ງບໍ່ດີເລີຍ. ໃນຂະນະທີ່ນັກເຕະເອງຕ້ອງໃຊ້ໄມ້ຄ້ຳເພື່ອຊ່ວຍຍ່າງອອກຈາກສະໜາມ. ທາມກາງຄວາມກັງວົນຂອງທີມແພດຂອງສະໂມສອນ ແລະ ແຟນບານວ່າ ເຂົາອາດຈະຕ້ອງພັກຍາວຫລາຍເດືອນ.
ຫລ້າສຸດ ຫລຸຍ ດິອາສ ໄດ້ຖືກສົ່ງໂຕໄປກວດຢ່າງລະອຽດແລ້ວຜົນປາກົດວ່າເຂົາບໍ່ຈຳເປັນຕ້ອງຮັບການຜ່າຕັດ. ແຕ່ຕ້ອງໃຊ້ເວລາປະມານ 6-8 ອາທິດເພື່ອຟື້ນຕົວ, ເຖິງແມ່ນວ່າມັນບໍ່ໜັກເທົ່າທີ່ຄິດ ແຕ່ຕ້ອງຍອມຮັບວ່ານີ້ເປັນເລື່ອງເສຍຫາຍຂອງ ລິເວີພູລ ທີ່ຈະໝົດສິດໃຊ້ງານ ດິອາສ ເຖິງ 10 ເກມເລີຍ.
ຄາດວ່າ ປີກໄວ 25 ປີ ຈະກັບມາລົງສະໜາມໄດ້ອີກຄັ້ງຫລັງຈົບບານໂລກ 2022 ໃນເກມບ໋ອກຊິງເດກັບ ແອສຕັນ ວິນລາ ໃນວັນທີ 26 ທັນວາ, ຈາກນັ້ນເຂົາຈະຮ່ວມເດີນທາງກັບເພື່ອນຮ່ວມທີມເພື່ອເດີນທາງໄປດູໄບ ເພື່ອກະກຽມສໍາລັບການສູ້ໃນເຄິ່ງທີ່ສອງຂອງລະດູການ.
