ແຂວງຫລວງພະບາງ ຈັດປະກວດຄວາມງາມໂຄມເຮືອໄຟບົກ 12 ລຳ ຢູ່ເມືອງມໍລະດົກໂລກ
ວັນທີ 6 ຕຸລາ 2022 ນີ້, ແຂວງຫລວງພະບາງ ໄດ້ຈັດພິທີປະກວດຄວາມງາມຂອງໂຄມເຮືອໄຟບົກ ປະຈຳປີ 2022 ທີ່ວັດໃໝ່ ສຸວັນນະພູມາຣາມ ນະຄອນຫລວງພະບາງ ເຊິ່ງເປັນການປະກວດຜົນງານສີມືຈາກພຣະສົງສາມະເນນ ໃນແຕ່ລະວັດທີ່ສືບສານກັນມາແຕ່ບູຮານຈົນກາຍເປັນສິລະປະຄູ່ເມືອງ ຫລວງພະບາງ ເມືອງມໍລະດົກໂລກ, ໂດຍພະສົງສາມະເນນ ໄດ້ຊ່ວຍກັນປະດິດຄິດແຕ່ງໂຄມເຮືອໄຟຂຶ້ນ ເພື່ອປະກອບສ່ວນໃນການເປັນເຄື່ອງຖວາຍພຸດທະບູຊາ ໃນບຸນອອກພັນສາປະວໍຣະນາໄຫລເຮືອໄຟທີ່ຫລວງພະບາງ ໃຫ້ກາຍເປັນສິລະປະຄູ່ບ້ານຄູ່ເມືອງມໍລະດົກໂລກແຫ່ງນີ້.
ສຳລັບບັນຍາກາດຂອງງານແມ່ນຄຶກຄື້ນມ່ວນຊື່ນ ມີມວນຊົນທັງພາຍໃນ ແລະ ນັກທ່ອງທ່ຽວຕ່າງປະເທດ ໄດ້ເລາະຊົມ ແລະ ຖ່າຍຮູບ ບັນດາໂຄມເຮືອໄຟບົກ 12 ລຳ ທີ່ຕັ້ງຢູ່ລານວັດໃໝ່, ເຊິ່ງງານຄັ້ງນີ້ນອກຈາກເປັນການອານຸລັກຮັກສາປະເພນີ ແລະ ວັດທະນະທຳແລ້ວ ຍັງເປັນການດຶງດູດມວນຊົນມາທ່ຽວຫລວງພະບາງຫລາຍຂຶ້ນ ທັງເປັນການເສີມຂະຫຍາຍ ແລະ ກະຕຸກຊຸກຍູ້ສົ່ງເສີມການທ່ອງທ່ຽວແບບຍືນຍົງ.
ຜົນການແຂ່ງຂັນເຮືອຊະນະເລີດ ອັນດັບ 1 ໄດ້ແກ່ເຮືອໄຟຂອງວັດໃໝ່, ອັນດັບທີ 2 ແມ່ນເຮືອໄຟຂອງວັດຫໍສ່ຽງ ແລະ ອັນດັບທີ 3 ເຮືອໄຟຂອງວັດຊຽງທອງ, ເຮືອໄຟວັດທາດ ແລະ ເຮືອໄຟວັດຈູມຄ້ອງ.
