ອັດຕະປື-ເຊກອງ ຫາລືການແບ່ງຂັ້ນຄຸ້ມຄອງເຂດຊາຍແດນເຊື່ອມຕໍ່ແຂວງ

ວັນທີ 6 ຕຸລາ 2022 ນີ້, ທີ່ຫ້ອງວ່າການປົກຄອງແຂວງອັດຕະປື ໄດ້ຈັດກອງປະຊຸມປືກສາຫາລືການແບ່ງຂັ້ນຄຸ້ມຄອງເຂດຊາຍແດນເຊື່ອມຕໍ່ ລະຫວ່າງ ເມືອງດາກຈຶງ, ເມືອງລະມາມ ແຂວງເຊກອງ ກັບ ເມຶືອງຊານໄຊ ແຂວງອັດຕະປື, ໂດຍການຮ່ວມຂອງທ່ານ ເລັດ ໄຊຍະພອນ ເຈົ້າແຂວງອັດຕະປື ແລະ ທ່ານ ເຫລັກໄຫລ ສີວິໄລ ເຈົ້າແຂວງເຊກອງ ພ້ອມດ້ວຍຄະນະກຳມະການກຳນົດເຂດໝາຍຊາຍແດນທັງສອງແຂວງເຂົ້າຮ່ວມ.

ໃນກອງປະຊຸມດັ່ງກ່າວ, ທັງສອງແຂວງ ໄດ້ລາຍງານສະພາບຄວາມເປັນມາຢູ່ຕາມຂອບເຂດບໍລິເວນຊາຍ ໂດຍສະເພາະການດຳລົງຊິວິດ, ການທຳມາຫາກິນ ຂອງປະຊາຊົນທັງສອງແຂວງ ແລະ ປະຊາຊົນທີ່ດໍາລົງຊີວິດ ໃນເຂດແດນລະຫວ່າງ ເມືອງດາກຈຶງ, ເມືອງລະມາມ ແຂວງເຊກອງ ກັບ ເມຶືອງຊານໄຊ ຂອງແຂວງອັດຕະປື ທີ່ຍັງບໍ່ທັນເຂົ້າໃຈຢ່າງເລິກເຊິ່ງໃນເຂດບໍລິເວນຊາຍແດນ.

ຕໍ່ກັບສະພາບດັ່ງກ່າວ ການນຳທັງສອງແຂວງ ໄດ້ມີການຄົ້ນຄວ້າປຶສາຫາລື ເພື່ອຄວາມເປັນເອກະພາບເຂດແດນເຊື່ອມຕໍ່, ທີ່ມີບາງຈຸດທີ່ບໍ່ທັນເປັນເອກະພາບ, ໃຫ້ມີຄວາມຊັດເຈນເປັນເຂດແດນທີ່ມາດຕະຖານ ແລະ ບໍ່ມີການປ່ຽນແປງບົນພື້ນຖານປະຊາທິປະໄຕ, ຄວາມຍຸດຕິທຳ ແລະ ຄວາມສາມັກຄີປອງດອງ, ຜ່ານການປຶກສາຫາລື ທັງສອງແຂວງອັດຕະປື ແລະ ເຊກອງ ໄດ້ເປັນເອກະພາບກັນໃນເບື້ອງຕົ້ນ ຮັບຮອງເອົາເຂດໝາຍຊາຍແດນເຊື່ອຕໍ່ໃນຂັ້ນທ້ອງຖິ່ນ ຫລັງຈາກນັ້ນຈະໄດ້ມີການນໍາສະເໜີໃຫ້ລັດຖະບານໄດ້ຮັບຮອງກຳນົດເປັນເຂດແດນເຊື່ອມຕໍ່ຢ່າງເປັນທາງການໃນຂັ້ນຕໍ່ໄປ.