ທົ່ວປະເທດສາມາດປັກດໍານາປີໄດ້ແລ້ວ 96%

ກະຊວງກະສິກໍາ-ປ່າໄມ້ ໃຫ້ຮູ້ວ່າ: ມາຮອດປັດຈຸບັນທົ່ວປະເທດສາມາດປັກດໍາເຂົ້ານາປີໄດ້ແລ້ວ 785.333 ເຮັກຕາເທົ່າກັບ 96% ຂອງແຜນການ, ທຽບໃສ່ປີຜ່ານມາຖືວ່າຢູ່ໃນເກນປົກກະຕິ ແລະ ແຂວງທີ່ປັກດາສໍາເລັດແລ້ວມີ: ຜົ້ງສາລີເນື້ອທີ່ 7.758 ເຮັກຕາ, ຫລວງນໍ້າທາເນື້ອທີ່ 9.590, ບໍ່ແກ້ວມີເນື້ອທີ່14.697 ເຮັກຕາ, ຫົວພັນ 12.772 ເຮັກຕາ, ບໍລິຄໍາໄຊ 36.214 ເຮັກຕາ, ຄໍາມ່ວນ 81.502 ເຮັກຕາ, ສະຫວັນນະເຂດ 204.500 ເຮັກຕາ, ສາລະວັນ 81.762 ເຮັກຕາ, ເຊກອງ 9.122 ເຮັກຕາ, ຈໍາປາສັກ 110.426 ເຮັກຕາ ແລະ ແຂວງອັດຕະປືມີ 23.497 ເຮັກຕາ, ໂດຍສະເລ່ຍແລ້ວບັນດາແຂວງພາກເໜືອສາມາດປັກດໍາໄດ້ 95%, ພາກກາງໄດ້ 96% ແລະ ພາກໃຕ້ປັກດໍາໄດ້ 97%, ໃນເຂດຊົນລະປະທານແມ່ນສາມາດປັກດໍາໄດ້ 100%.

ກະຊວງກະສິກໍາ-ປ່າໄມ້ ໃຫ້ຮູ້ອີກວ່າ: ປັດຈຸບັນຂະແໜງການຂອງຕົນພວມສືບຕໍ່ຕິດຕາມການລະບາດຂອງຕັກແຕນໃນ 5 ແຂວງພາກເໜືອ, ຊຶ່ງຄາດວ່າຈະມີເນື້ອທີ່ການຜະລິດໄດ້ຮັບກະທົບປະມານ 6.200 ກວ່າເຮັກຕາ. ປັດຈຸບັນສາມາດສີດຢາກໍາຈັດໂຕອ່ອນສໍາເລັດໃນ 24 ເມືອງ, ລວມມີເນື້ອທີ່ປະມານ 1.500 ກວ່າເຮັກຕາ.