ອິນໂດເນເຊຍເງິນເຟີ້ເພີ່ມສູງສຸດໃນຮອບ 7 ປີ ຫລັງຂຶ້ນລາຄາເຊື້ອໄຟ
ອັດຕາເງິນເຟີ້ຂອງອິນໂດເນເຊຍປະຈຳເດືອນກັນຍາ ເພີ່ມເປັນສະຖິຕິສູງສຸດ ນັບແຕ່ປີ 2015 ຫລັງລັດຖະບານຍົກເລີກອຸດໜູນລາຄາເຊື້ອໄຟ.
ວັນທີ 3 ຕຸລາ 2022 ສຳນັກຂ່າວຕ່າງປະເທດລາຍງານວ່າ: ສຳນັກງານສະຖິຕິແຫ່ງຊາດຂອງອິນໂດເນເຊຍລາຍງານອັດຕາເງິນເຟີ້ປະຈຳເດືອນກັນຍາເພີ່ມຂຶ້ນ 5,95% ເມື່ອທຽບໃສ່ແບບປີຕໍ່ປີ ເປັນສະຖິຕິສູງສຸດນັບແຕ່ເດືອນຕຸລາ 2015 ແລະ ສູງຂຶ້ນຈາກສະຖິຕິໃນເດືອນສິງຫາຜ່ານມາ ເຊິ່ງເພີ່ມຂຶ້ນ 4,69% ເມື່ອທຽບໃສ່ແບບປີຕໍ່ປີ ໂດຍສະຖິຕິຂອງທັງສອງເດືອນຍັງເກີນເປົ້າໝາຍຂອງທະນາຄານກາງ ເຊິ່ງກຳນົດໄວ້ລະຫວ່າງ 2-4% ໃນປີນີ້.
ທັງນີ້, ລັດຖະບານອິນໂດເນເຊຍປັບຂຶ້ນລາຄາເຊື້ອໄຟປະມານ 30% ມີຜົນນັບແຕ່ເດືອນກັນຍາຜ່ານມາ ຫລັງຜະເຊີນແຮງສຽດທານຢ່າງໜັກທາງການເງິນ ຈາກການໃຊ້ງົບປະມານມະຫາສານຕໍ່ນະໂຍບາຍອຸດໜູນເຊື້ອໄຟ ຈົນສ້າງແຮງກົດດັນຢ່າງໜັກໃຫ້ສະຖານະທາງການເງິນຂອງປະເທດ ເຊິ່ງມີຂະໜາດເສດຖະກິດໃຫຍ່ທີ່ສຸດໃນອາຊີຕາເວັນອອກສຽງໃຕ້.
ຂະນະທີ່, ທະນາຄານກາງອິນໂດເນເຊຍມີມະຕິໃນເດືອນກັນຍາຜ່ານມາ ປັບຂຶ້ນອັດຕາດອກເບ້ຍຊື້ຄືນພັນທະບັດທີ່ມີສັນຍາຂາຍຄືນໄລຍະເວລາ 7 ວັນ ເປັນ 4,25% ເພີ່ມຂຶ້ນ 0,50% ໂດຍສູງກວ່າບັນດານັກວິເຄາະຄາດຄະເນໄວ້ກ່ອນໜ້ານີ້ວ່າ: ຈະປັບເພີ່ມພຽງ 0,25%. ອີກຢ່າງໜຶ່ງ, ທະນາຄານກາງອິນໂດເນເຊຍເຄີຍປະເມີນສະຖານະການເງິນເຟີ້ຂອງປະເທດວ່າ: ຈະຢູ່ລະດັບສູງກວ່າ 6% ໃນທ້າຍປີນີ້.
