ເດິ ບຣອຍ ກຽມທຳລາຍສະຖິຕິຕຳນານ ລີເວີພູລ ເກມ ແມນເຊສເຕີ ດາບີ

ເຄວິນ ເດິ ບຣອຍ ພວມເຂົ້າໃກ້ການທຳລາຍສະຖິຕິການເຮັດແອສຊິສຂອງ ສະຕີເວັນ ເຈີຣາດ ຕຳນານຫົວຫນ້າທີມຂອງ ລີເວີພູລ ໃນເກມ ພຣີເມຍລີກ ນັດ ແມນເຊສເຕີ ດາບີ ທີ່ ແມນເຊສເຕີ ຊິຕີ ຈະພົບກັບ ແມນເຊສເຕີ ຢູໄນເຕັດ ວັນອາທິດນີ້ ຕາມການ ລາຍງານຈາກ ສະປອດໂມລ.

ນັບຕັ້ງແຕ່ເປີດລະດູການ 2022-2023 ເປັນຕົ້ນມາ ກອງກາງທີມຊາດເບລຢຽມກາຍເປັນນັກເຕະທີ່ຈ່າຍບານໃຫ້ ຫມູ່ຮ່ວມຍິງປະຕູໄດ້ຫລາຍທີ່ສຸດ ໃນຈຳນວນ 6 ຄັ້ງ ການການລົງສະໜາມທັງຫມົດ 7 ນັດ ເຮັດໃຫ້ລາວເຮັດໄປແລ້ວທັງຫມົດ 92 ແອສຊິສ ຄອງອັນດັບ 7 ຮ່ວມກັບ ເຈີຣາດໃນການຈັດອັນດັບນັກເຕະທີ່ເຮັດແອສຊິສສູງສຸດຕະຫລອດການຂອງບານລີກສູງ ສຸດອັງກິດ.

ສຳລັບສະຖິຕິຂອງ ເດິ ບຣອຍ ມາຈາກການລົງຫລິ້ນໄປທັງຫມົດ 287 ນັດ ເຊິ່ງຫນ້ອຍກວ່າຈຳນວນການລົງສະໜາມຂອງ ເຈີຣາດ ແລະ ໃນເກມທີ່ ແມນຊິຕີ ຈະເປີດບ້ານພົບກັບ ແມນຢູ ໃນວັນອາທິດນີ້ ຫາກລາວເຮັດແອສຊິສເພີ່ມ ກໍຈະກາຍເປັນການທຳ ລາຍສະຖິຕິຂອງຕຳນານຫົວໜ້າທີມຂອງລີເວີພູລ ລົງໄດ້.

ນອກຈາກນັ້ນນັກເຕະອາຍຸ 31 ປີຍັງມີສິດທີ່ຈະເຮັດສະຖິຕິເທົ່າກັບ ອະດີດຫມູ່ຮ່ວມທີມຄື ດາບິດ ຊິລວາ ທີ່ເຮັດເອົາໄວ້ 93 ຄັ້ງ ກ່ອນຈະອຳລາທີມໄປໃນລະດູການ 2021 ແລະ ຍັງອາດຈະກ້າວຂຶ້ນໄປທາບສະຖິຕິຂອງ ເດນິສ ເບີກແຄມ ທີ່ເຮັດເອົາໄວ້ 94 ຄັ້ງກັບ ອາເຊນອລ ໄດ້ນຳອີກ.

ສຳລັບນັກເຕະທີ່ເຮັດແອສຊິສໄດ້ຫລາຍທີ່ສຸດຕະຫລອດການ 3 ອັນດັບທຳອິດໃນພຣີເມຍລີກ ປະກອບໄປດ້ວຍ ໄຣອັນ ກິກ ອະດີດປີກຂອງ ແມນເຊສເຕີ ຢູໄນເຕັດ ເຮັດໄດ້ 162 ຄັ້ງ,​ອັນດັບ 2 ໄດ້ແກ່ ເຊສ ຟາເບຣກັສ ທີ່ເຄີຍຫລິ້ນໃຫ້ກັບ ເຊລຊີ ແລະ ອາເຊນອລ 111 ຄັ້ງ ສ່ວນອັນດັບ 3 ຄື ເວນ ຣູນີ ເຮັດໄດ້ 103 ຄັ້ງ.