ປກສ ເມືອງມະຫາໄຊ ແຂວງຄຳມ່ວນ ເຊື່ອມຊຶມ ແລະ ຜັນຂະຫຍາຍຂໍ້ຕົກລົງຂອງລັດຖະມົນຕີກະຊວງປ້ອງກັນຄວາມສະຫງົບ

ໃນວັນທີ 29 ກັນຍາ 2022 ກອງບັນຊາການ ປກສ ເມືອງມະຫາໄຊ ແຂວງຄຳມ່ວນ ໄດ້ຈັດພິທີເຜີຍແຜ່ເຊື່ອມຊຶມເອກະສານສຳຄັນຕ່າງໆຂອງກຳລັງປ້ອງກັນຄວາມສະຫງົບໂດຍການເຂົ້າຮ່ວມ ຂອງທ່ານ ພັອ ຈັນໄຊ ນັນທະວົງ ຮອງຫົວໜ້າກອງບັນຊາການ ປກສ ແຂວງຄຳມ່ວນ, ທ່ານ ພັທ ສຸກສະຫງວນ ຈັນທະລາດ ຫົວໜ້າກອງບັນຊາການ ປກສ ເມືອງມະຫາໄຊ.

ອີງຕາມຂໍ້ຕົກລົງສະບັບເລກທີ 1441/ປກສ ລົງວັນທີ 16 ສິງຫາ 2021 ວ່າດ້ວຍການຈັດຕັ້ງ ແລະ ການເຄື່ອນໄຫວຂອງລະບອບບັນຊາຫົວໜ້າດຽວໃນກຳລັງປ້ອງກັນຄວາມສະຫງົບ ປະຊາຊົນລາວ, ເອກະສານ ຂໍ້ຕົກລົງສະບັບເລກທີ 688/ປກສ ລົງວັນທີ 25 ມີນາ 2020 ວ່າດ້ວຍລະບຽບວິໄນຂອງກຳລັງປ້ອງກັນຄວາມສະຫງົບ (ສະບັບປັບປຸງ), ເອກະສານຄຳແນະນຳສະບັບເລກທີ 471/ກມປສ, ລົງວັນທີ 12 ກຸມພາ 2021 ວ່າດ້ວຍການຈັດຕັ້ງປະຕິບັດຂໍ້ຕົກລົງເລກທີ 688/ປກສ ວ່າດ້ວຍລະບຽບວິໄນຂອງກຳລັງປ້ອງກັນຄວາມສະຫງົບປະຊາຊົນ ແລະ ເອກະສານ ຄຳແນະນຳ 1460/ກມປສ ລົງວັນທີ 27 ເມສາ 2020 ກ່ຽວກັບການຈັດຕັ້ງປະຕິບັດຄຳສັ່ງວ່າດ້ວຍການເພີ່ມທະວີວຽກກງານປ້ອງກັນກຳລັງໃນສະພາບໃໝ່ຢ່າງພ້ອມພຽງ.

ເພື່ອເຮັດໃຫ້ນາຍ ແລະ ພົນຕຳຫລວດທົ່ວກຳລັງປ້ອງກັນຄວາມສະຫງົບ ເມືອງມະຫາໄຊ, ໄດ້ຮັບຮູ້ ແລະ ເຂົ້າໃຈຢ່າງທົ່ວເຖິງໃນການກຳນົດຫລັກການ, ລະບຽບການ, ມາດຕະການ ແລະ ມາດຖານເງື່ອນໄຂ ເພື່ອເປັນບ່ອນອີງໃນການປັບປຸງ, ກໍ່ສ້າງນາຍ ແລະ ພົນຕຳຫລວດໃນທົ່ວກຳລັງປ້ອງກັນຄວາມສະຫງົບປະຊາຊົນ ໃຫ້ມີຄວາມໜັກແໜ້ນ, ເຂັ້ມແຂງໃນທຸກດ້ານ, ເປັນກຳລັງປ້ອງກັນຄວາມສະຫງົບປະຕິວັດ, ມີລະບຽບວິໄນເຂັ້ມງວດ, ມີແບບແຜນວິທີເຮັດວຽກທີ່ມີວິທະຍາສາດ ແລະ ທັນສະໄໝ, ແນ່ໃສຮັບປະກັນໃຫ້ທຸກການຈັດຕັ້ງ ແລະ ການເຄື່ອນໄຫວຂອງກຳລັງປ້ອງກັນຄວາມສະຫງົບຢູ່ພາຍໃຕ້ກົດໝາຍ ແລະ ລະບຽບການ ພ້ອມທັງມີຄວາມເປັນເອກະພາບກັນໃນຂອບເຂດທົ່ວປະເທດ, ທຸກການເຄື່ອນໄຫວກ່ຽວກັບການຈັດຕັ້ງປະຕິບັດຂໍ້ຕົກລົງ, ຄຳແນະນຳຕ້ອງສອດຄ່ອງກັບແນວທາງນະໂຍບາຍຂອງພັກ, ລັດຖະທຳມະນູນກົດໝາຍ ແລະ ລະບຽບການ ໃນການປະຕິບັດຫລັກການລວມສູນປະຊາທິປະໄຕ ລະບຽບວິໃນເປັນຕົ້ນຕໍ ເພື່ອພິຈະລານານຳໃຊ້ມາດຕະການຕໍ່ຜູ້ລະເມີດປະຕິບັດລະບອບການກວດກາ ແລະ ປ້ອງກັນກຳລັງພາຍໃຕ້ການຊີ້ນຳໂດຍກົງຂອງຄະນະພັກ-ຄະນະບັນຊາແຕ່ລະຂັ້ນ. ພ້ອມທັງຍົກສູງຄວາມຮັບຜິດຊອບໜ້າທີ່ການເມືອງ,ໃນການຈັດຕັ້ງປະຕິບັດຢູ່ຂັ້ນຂອງຕົນຮັບຜິດບຊອບໃຫ້ຖືກຕ້ອງຄົບຖ້ວນ ເຂັ້ມງວດທັງເປັນເອກະພາບສ້າງໃຫ້ນາຍ ແລະ ພົນຕຳຫລວດມີການຫັນປ່ຽນອັນຕັ້ງຫນ້າທາງດ້ານລະບຽບວິໄນຂອງກຳລັງປ້ອງກັນຄວາມສະຫງົບ ໃຫ້ເປັນຂະບວນຢ່າງເຂັ້ມງວດ.