ແຂວງໄຊຍະບູລີ ແຈ້ງເຕືອນກຽມຮັບມືກັບພາຍຸ ໂນຣູ ແລະ ກຽມພ້ອມຊ່ວຍເຫລືອປະຊາຊົນໃຫ້ທັນກັນ

ວັນທີ 28 ກັນຍາ 2022 ນີ້, ແຂວງໄຊຍະບູລີ ໄດ້ອອກແຈ້ງການໃຫ້ເຝົ້າລະວັງ ແລະ ກຽມຮັບມືພາຍຸໝູນເຂດຮ້ອນໂນຣູທີ່ຈະພັດຜ່ານພາກກາງ ແລະ ພາກໃຕ້ປະເທດລາວ ໃນລະຫວ່າງວັນທີ 27-30 ກັນຍາ 2022, ເຊິ່ງອາດຈະເຮັດໃຫ້ມີຝົນຕົກໜັກ ແລະ ລົມພັດແຮງໃນທົ່ວແຂວງ. ດັ່ງນັ້ນຈຶ່ງ ຮອງເຈົ້າແຂວງໄຊຍະບູລີ, ປະທານຄະນະກໍາມະການໄພພິບັດຂັ້ນແຂວງ ຈຶ່ງໃຫ້ບັນດາທ່ານຊາບດັ່ງນີ້:

1. ໃຫ້ບັນດາພະແນກການ, ອົງການ, ກົມກອງ, ສະພາປະຊາຊົນແຂວງ, ລັດວິສາຫະກິດ, ຫ້ອງການອ້ອມຂ້າງແຂວງແລະ ທ່ານ ເຈົ້າເມືອງ 11 ເມືອງ ພາຍໃນແຂວງ ແຈ້ງຕໍ່ພະນັກງານ ແລະ ປະຊາຊົນ ທີ່ຢູ່ໃນຂອບເຂດຄວາມ ຮັບຜິດຊອບຂອງຕົນ, ໃຫ້ມີສະຕິ-ເຝົ້າລະວັງ ໂດຍສະເພາະປະຊາຊົນທີ່ມີບ້ານ-ເຮືອນຢູ່ແຄມແມ່ນ້ຳ, ຫ້ວຍຮ່ອງ, ເຂດຕໍ່າ ແລະ ມີຄວາມສ່ຽງອື່ນ ຕໍ່ສະພາບທີ່ຈະມີຝົນຕົກ, ລົມພັດແຮງ ອາດຈະເຮັດໃຫ້ຕົ້ນໄມ້, ເສົາໄຟຟຫັກ, ໂຄ່ນລົ້ມ, ດິນເຊາະເຈື່ອນ ແລະ ນ້ຳຖ້ວມອັ່ງ.
2. ມອບໃຫ້ພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງ ຕິດຕາມຂໍ້ມູນ ແລະ ອອກແຈ້ງຂ່າວພະຍາກອນອາກາດ, ຫລາວັດແທກນໍ້າໃນແຕ່ລະໄລຍະ, ໂດຍໃຫ້ສົມທົບກັບພະແນກຖະແຫລງຂ່າວ, ວັດທະນະທໍາ ແລະ ທ່ອງທ່ຽວແຂວງ ເພື່ອແຈ້ງໃຫ້ປະຊາຊົນຮັບຊາບ.
3. ມອບໃຫ້ພະແນກແຮງງານ ແລະ ສະຫວັດດີການສັງຄົມແຂວງ ເປັນໃຈກາງໃນການກະກຽມດ້ານອຸປະກອນ, ເຄື່ອງບໍລິໂພກ-ອຸປະໂພກ ເພື່ອຊ່ວຍເຫລືອປະຊາຊົນໃຫ້ທັນການ.
4. ມອບໃຫ້ພະແນກພະລັງງານ ແລະ ບໍ່ແຮ່ແຂວງ ສົມທົບກັບ ເຂື່ອນໄຟຟ້າພະລັງງານນໍ້າ ທຸກແຫ່ງຂອງແຂວງ ເພື່ອຄວບຄຸມບໍລິຫານຈັດການນໍ້າ, ກໍລະນີຈະເປີດປະຕູລະບາຍນ້ຳ ຕ້ອງໄດ້ແຈ້ງເຕືອນໃຫ້ປະຊາຊົນຮັບຊາບລ່ວງໜ້າ.
5. ໃຫ້ທຸກພາກສ່ວນພາຍໃນແຂວງ ເອົາໃຈໃສ່ຕິດຕາມແຈ້ງການ-ແຈ້ງເຕືອນ ກ່ຽວກັບພະຍາກອນອາກາດໃນແຕ່ລະໄລຍະ, ໃຫ້ມີການກະກຽມຄວາມພ້ອມ ແລະ ໃຫ້ຄວາມຮ່ວມມືໃນການເຝົ້າລະວັງ ແລະ ກະກຽມຮັບມືກັບ ພາຍຸຫມຸນເຂດຮ້ອນໂນຣູຄັ້ງນີ້ດ້ວຍ.