ຄອງໂກປະກາດ ຢຸດການແພ່ລະບາດຂອງໄວຣັສອີໂບລາ ຮອບຫລ້າສຸດສຳເລັດແລ້ວ
ວັນທີ 27 ກັນຍາ 2022, ທາງການຄອງໂກ ປະກາດຢຸດການແພ່ລະບາດຂອງເຊື້ອໄວຣັສອີໂບລາຮອບຫລ້າສຸດ ເຊິ່ງເປັນຮອບທີ 15 ຂອງປະເທດໄດ້ສຳເລັດແລ້ວ ຫລັງບໍ່ພົບຜູ້ຕິດເຊື້ອໃໝ່ເພີ່ມອີກ.
ໂດຍການແພ່ລະບາດຮອບຫລ້າສຸດພົບຜູ້ຕິດເຊື້ອໄວຣັສອີໂບລາຢູ່ເມືອງເບນີ ທາງພາກຕາເວັນອອກຂອງປະເທດ ໃນວັນທີ 22 ສິງຫາຜ່ານມາ ມັກຈະມີລັກສະນະອາການຄ້າຍຄືຄົນເປັນໄຂ້, ຮາກ, ບາງຄົນມີອາການຖອກທ້ອງ ແລະ ພົບສະພາບເລືອດອອກນຳ ສາມາດແພ່ກະຈາຍເຊື້ອຜ່ານການສຳຜັດເລືອດ ຫລື ສານຄັດຫລັ່ງຕ່າງໆ ຂອງຜູ້ຕິດເຊື້ອໂດຍກົງ.
ສ່ວນ Mbungani Mbanda ລັດຖະມົນຕີສາທາລະນະສຸກຄອງໂກ ເຜີຍວ່າ: “ພາຍຫລັງ 42 ວັນຂອງການເຝົ້າຕິດຕາມສະຖານະການການແພ່ລະບາດຢ່າງໃກ້ຊິດ ຈົນບໍ່ມີການຢືນຢັນຜູ້ຕິດເຊື້ອໃໝ່, ຂ້າພະເຈົ້າຮູ້ສຶກດີໃຈທີ່ຈະປະກາດຢຸດການແພ່ລະບາດຂອງໄວຣັສອີໂບລາຮອບທີ 15 ເຊິ່ງເປັນເວລາ 1 ເດືອນກັບອີກ 12 ວັນ”.
ໂດຍໄວຣັສດັ່ງກ່າວກວດພົບຄັ້ງທຳອິດໃນປີ 1976 ພາຫະນຳພະຍາດຄາດວ່າມາຈາກເຈຍ ກ່ອນຈະແພ່ລະບາດໃນຫລາຍປະເທດເຂດທະວີບອາຟຣິກາ ຂ້າຊີວິດຄົນໄປແລ້ວ 15.000 ກວ່າຄົນ ເຊິ່ງອົງການອະນາໄມໂລກ (WHO) ຊີ້ວ່າ: ອັດຕາການເສຍຊີວິດຂອງໄວຣັສຊະນິດນີ້ອ່າວສູງ ແລະ ອາດສູງເຖິງ 90% ຂອງຜູ້ຕິດເຊື້ອໃນພື້ນທີ່ລະບາດບາງແຫ່ງ.
ການປະກາດຢຸດການແພ່ລະບາດໃນຄັ້ງນີ້ມີຂຶ້ນທ່າມກາງຄວາມພະຍາຍາມຄວບຄຸມສະຖານການການແພ່ລະບາດຂອງເຊື້ອໄວຣັສອີໂບລາໃນປະເທດໃກ້ຄຽງ ຄືອູກັນດາ ທີ່ປະກາດເຂົ້າສູ່ສະພາບອີໂບລາລະບາດ ໃນວັນທີ 4 ກໍລະກົດຜ່ານມາ ຫລັງພົບຜູ້ເສຍຊີວິດໃໝ່ເຖິງ 5 ຄົນ ແລະ ອາດກ່ຽວຂ້ອງກັບຜູ້ເສຍຊີວິດອີກ 18 ຄົນທີ່ກຳລັງລໍຖ້າຢືນຢັນສາເຫດການເສຍຊີວິດ.
ອ້າງອີງ:
- https://www.aljazeera.com/news/2022/9/27/dr-congo-declares-end-latest-ebola-virus-outbreak
- https://medicalxpress.com/news/2022-09-dr-congo-declares-latest-ebola.html
- https://www.cdc.gov/vhf/ebola/history/2014-2016-outbreak/index.html
