9 ເດືອນຜ່ານມາ ແຂວງສະຫວັນນະເຂດ ຂຶ້ນທະບຽນອອກໃບຕາດິນໃຫ້ 3 ເມືອງທົດລອງ ໄດ້ສຳເລັດ 8.698 ຕອນ
ທ້າຍອາທິດຜ່ານມາ, ແຂວງສະຫວັນນະເຂດໄດ້ຈັດກອງປະຊຸມສະຫລຸບ ວຽກງານຂຶ້ນທະບຽນອອກໃບຕາດິນ 9 ເດືອນ, ໄລຍະເດືອນມັງກອນ ຫາເດືອນ ກັນຍາ ແລະ ທິດທາງແຜນການ 3 ເດືອນທ້າຍປີ 2022 ຂອງຫ້ອງການຊັບພະຍາກອນທໍາ ມະຊາດ ແລະສິ່ງແວດລ້ອມເມືອງ 3 ເມືອງທົດລອງ ແລະ 4 ເມືອງ ເປົ້າໝາຍຂະຫຍາຍໂຄງການຂຶ້ນທະບຽນອອກໃບຕາດິນ, ໂດຍການເຂົ້າຮ່ວມຂອງທ່ານ ພູທອນ ຍອດບຸນເຮືອງ ຫົວໜ້າພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງສະຫວັນນະເຂດ.
ທ່ານ ຫົງຄໍາ ລີລາວັນ ຮອງຫົວໜ້າຂະແໜງທີ່ດິນແຂວງ ລາຍງານການປະຕິບັດວຽກງານຂຶ້ນທະບຽນອອກໃບ ຕາດິນ ໄລຍະ 9 ເດືອນ ປີ 2022 ເຊິ່ງຍົກໃຫ້ເຫັນວ່າ: ເພື່ອບັນລຸຕົວເລກຕາມແຜນການປີ 2022 ທີ່ ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມໄດ້ແບ່ງ ຕົວເລກໃຫ້ 30.000 ຕອນ ແລະ ຕົວເລກແຜນການທີ່ສະພາປະຊາຊົນແຂວງມອບໃຫ້ ຈໍານວນ 20.000 ຕອນ, ທາງພະແນກ ໄດ້ຖືເອົາວຽກງານດັ່ງກ່າວເປັນວຽກບູລິມະສິດທີ່ສໍາຄັນ ແລະໄດ້ ແບ່ງຕົວເລກແຜນສູ້ຊົນດັ່ງກ່າວ ໃຫ້ບັັນດາຫ້ອງການຊັບພະຍາ ກອນທໍາມະຊາດ ແລະສິ່ງແວດ ລ້ອມເມືອງ, ນະຄອນຕາມສະພາບເງື່ອນໄຂຄວາມສາມາດຂອງແຕ່ລະເມືອງໃນການເຄື່ອນໄຫວວຽກງານ, ພະແນກຊັບພະ ຍາກອນທໍາມະຊາດ ແລະ ສິ່ງແວດລ້ອມແຂວງໄດ້ສຸມໃສ່ການລົງ ຊຸກຍູ້, ຕິດຕາມ, ກວດກາບັນດາຕົວເມືອງປົກກະຕິ, ສຳລັບ 3 ເມືອງທົດລອງຄື: ເມືອງອຸທຸມພອນ, ເມືອງສອງຄອນ ແລະ ເມືອງໄຊພູທອງ ແມ່ນໄດ້ຈັດຕັ້ງໜ່ວຍງານຂຶ້ນທະບຽນອອກໃບຕາດິນ ໂດຍແມ່ນໂຄງການຂຶ້ນທະບຽນອອກໃບຕາດິນ ແລະ ຖືເປັນ ເມືອງບູລິມະສິດໃນການອອກໃບຕາດິນ ນອກຈາກນັ້ນ ຍັງມີ 4 ເມືອງເປົ້າໝາຍທີ່ມີແຜນຂະຫຍາຍຈັດຕັ້ງໜ່ວຍງານຂຶ້ນທະບຽນອອກໃບຕາດິນຄື: ເມືອງຈຳພອນ, ຊົນນະບູລີ, ອາດສະພອນ ແລະ ພະລານໄຊ ໃນການ ດຳເນີນການສຳຫລວດ, ວັດແທກຂຶ້ນທະບຽນອອກໃບຕາດິນພາຍໃຕ້ໂຄງການຂຶ້ນທະບຽນອອກໃບຕາດິນ, ແນໃສ່ຮອດປີ 2025 ໃຫ້ສຳເລັດການອອກໃບຕາດິນຕາມຕົວເລກສະຖິຕິສຳມະໂນທີ່ດິນທັງໝົດ.
ແຂວງສະຫວັນນະເຂດ ມີຕົວເລກຂໍ້ມູນສະຖິຕິສໍາມະໂນຕອນດິນທັງໝົດ 428.509 ຕອນ, ເນື້ອທີ່ 4.653 ລ້ານກວ່າຕາແມັດ, ການຂຶ້ນທະບຽນອອກໃບຕາດິນຂອບເຂດທົ່ວແຂວງໃນໄລຍະ 9 ເດືອນປີ 2022 ປະຕິບັດໄດ້ 13.541 ຕອນ, ທຽບໃສ່ແຜນການປີ 30.000 ຕອນ, ເທົ່າກັບ 45,13%, ສຳລັບ 3 ເມືອງທົດ ລອງໂຄງການຂຶ້ນທະບຽນອອກໃບຕາດິນຄື: ເມືອງອຸທຸມພອນ, ສອງຄອນ ແລະ ໄຊພູທອງ ໃນໄລຍະ 9 ເດືອນ ປະຕິ ບັດໄດ້ 8.698 ຕອນ, ນັບແຕ່ເລີ່ມຕົ້ນຂຶ້ນທະບຽນອອກໃບຕາດິນມາ ຮອດປັດຈຸບັນ, ທົ່ວແຂວງມີຕອນດິນທີ່ຂຶ້ນທະບຽນອອກໃບຕາດິນແລ້ວຈໍານວນ 240.767 ຕອນ, ທຽບໃສ່ສະຖິຕິສຳມະໂນຕອນ ດິນ 428.509 ຕອນ. ເທົ່າກັບ 56,7% ໃນຈຳນວນ 1.024 ບ້ານ, ຄາດວ່າການຂຶ້ນທະບຽນອອກໃບຕາ ດິນຈະໃຫ້ສຳເລັດໃນປີ 2025.
