ຜູ້ນຳຟີລິບປິນສັ່ງເລັ່ງຊ່ວຍເຫລືອຜູ້ປະສົບໄພໄຕ້ຝຸ່ນໂນຣູ ມີຜູ້ເສຍຊີວິດແລ້ວ 5 ຄົນ
ປະທານາທິບໍດີ ເຟີດິນານ ມາຣກອດ ຈູເນຍ ຂອງຟີລິບປິນ ສັ່ງໃຫ້ສົ່ງເຄື່ອງຈຳເປັນຊ່ວຍຜູ້ປະສົບໄພໄຕ້ຝຸ່ນໂນຣູ ໂດຍຫລ້າສຸດມີລາຍງານຜູ້ເສຍຊີວິດແລ້ວຢ່າງໜ້ອຍ 5 ຄົນ.
ທາງການຟີລິບປິນເລັ່ງກະຈາຍສິ່ງຂອງບັນເທົາທຸກສົ່ງໄປໃຫ້ຜູ້ປະສົບໄພນັບພັນຄົນ ຫລັງໄຕ້ຝຸ່ນໂນຣູ ຄວາມໄວລົມສູງສຸດໃກ້ສູນກາງ 185 ກິໂລແມັດຕໍ່ຊົ່ວໂມງ ພັດຂຶ້ນຝັ່ງນະຄອນຫລວງມະນິລາ ແລະ ແຂວງທາງເໜືອໃນວັນທີ 25 ກັນຍາ ໂດຍເປັນໄຕ້ຝຸ່ນລະດັບ 3 ໂດຍໄຕ້ຝຸ່ນຍັງຮັກສາລະດັບຄວາມແຮງເວລາພັດເຂົ້າເກາະລູຊອນໃນທ້າຍອາທິດຜ່ານມາ ເຮັດໃຫ້ຕ້ອງສັ່ງປິດໂຮງຮຽນ, ສຳນັກງານຂອງລັດຖະບານ ລວມທັງຕະຫລາດຫຸ້ນ ໂດຍເກາະລູຊອນ ເຊິ່ງກວມອັດຕາສ່ວນເສດຖະກິດຫລາຍກວ່າ 2 ໃນ 3 ຂອງປະເທດ ແລະ ມີປະຊາຊົນປະມານເຄິ່ງໜຶ່ງຂອງທົ່ວປະເທດ 110 ລ້ານຄົນ ໄດ້ເລີ່ມທຳຄວາມສະອາດໃນພື້ນທີ່ທີ່ມີນ້ຳຖ້ວມເລີ່ມຫລຸດລະດັບລົງແລ້ວ.
ສ່ວນປະທານາທິບໍດີ ເຟີດິນານ ມາຣກອດ ຈູເນຍ ຖະແຫລງຂ່າວໃນວັນທີ 26 ກັນຍາ ລະບຸວ່າ: ໄດ້ສັ່ງໃຫ້ນຳເອົາເຮລິກົບແຕລຳລຽງສິ່ງຂອງບັນເທົາທຸກ ແລະ ອຸປະກອນທຳຄວາມສະອາດໄປໃຫ້ພື້ນທີ່ທີ່ໄດ້ຮັບຜົນກະທົບຢ່າງໜັກແລ້ວ ແລະ ຈະຂຶ້ນເຮລິກົບແຕເພື່ອສຳຫລວດຄວາມເສຍຫາຍໃນປະເທດ. ພ້ອມເນັ້ນວ່າ: ເຈົ້າໜ້າທີ່ຈະຢຸດປະຕິບັດໜ້າທີ່ເມື່ອຜູ້ອົບພະຍົບສ່ວນຫລາຍສາມາດກັບເຮືອນໄດ້ແລ້ວ ພ້ອມຈະສົ່ງເຄື່ອງປັ່ນໄຟຟ້າໄປໃຫ້ສອງແຂວງທາງຕອນເໜືອທີ່ປະສົບບັນຫາໄຟຟ້າມອດເປັນວົງກວ້າງ.
ໂດຍປັດຈຸບັນມີຜູ້ອົບພະຍົບຕ້ອງໄປຢູ່ຕາມສູນອາໄສຊົ່ວຄາວທັງໝົດ 74.000 ຄົນ ຫລັງຈາກໜ່ວຍງານພະຍາກອນອາກາດແຈ້ງເຕືອນວ່າຈະມີຝົນຕົກໜັກ ລວມທັງນ້ຳຖ້ວມໃຫຍ່ໃນພື້ນທີ່ສ່ຽງໄພ ລວມທັງອາດຈະເກີດດິນເຈື່ອນສ້າງຄວາມເສຍຫາຍໃຫ້ແກ່ຜົນຜະລິດທາງກະສິກຳ.
ຫລ້າສຸດມີລາຍງານຜູ້ເສຍຊີວິດຈາກໄຕ້ຝຸ່ນໂນຣູແລ້ວຢ່າງໜ້ອຍ 5 ຄົນ ໂດຍທັງໝົດເປັນເຈົ້າໜ້າທີ່ກູ້ໄພໃນແຂວງບູລາກັນທີ່ຝ່ານ້ຳຖ້ວມສູງລະດັບເອວເຂົ້າໄປຊ່ວຍເຫລືອປະຊາຊົນ ແຕ່ຖືກກຳແພງພັງຖະຫລົ່ມໃສ່ຈົນພວກເຂົາຈົມຫາຍໄປກັບກະແສນ້ຳ ໂດຍປັດຈຸບັນພາຍຸໂນຣູໄດ້ອ່ອນກຳລັງລົງແລ້ວ ແລະ ມຸ້ງໜ້າຕໍ່ໄປທະເລຈີນໃຕ້ເຂົ້າສູ່ຫວຽດນາມຕໍ່ໄປ.
