ທ່ານ ປູຕິນ ປະນາມເຫດກວດຍິງໃນໂຮງຮຽນຣັດເຊຍ

ທ່ານ ດາມິທຣີ ເພສຄອບ ໂຄສົກທຳນຽບເກຣມລິນ ກ່າວວ່າ: ປະທານາທິບໍດີ ວະລາດິເມຍ ປູຕິນ ຜູ້ນຳຣັດເຊຍ ໄດ້ປະນາມເຫດກວດຍິງໃນໂຮງຮຽນແຫ່ງໜຶ່ງ ເຊິ່ງເຮັດໃຫ້ມີຜູ້ເສຍຊີວິດ 13 ຄົນ.

“ທ່ານປະທານາທິບໍດີສະແດງຄວາມເສຍໃຈຢ່າງສຸດຊຶ້ງຕໍ່ຜູ້ເສຍຊີວິດ ເຊິ່ງລວມທັງເດັກນັກຮຽນ ໂດຍເປັນການໂຈມຕີຂອງຜູ້ກໍ່ການຮ້າຍ ເຊິ່ງເປັນກຸ່ມນີໂອຟາສຊິສ ແລະ ທ່ານປະທານາທິບໍດີຫວັງວ່າຜູ້ທີ່ໄດ້ຮັບບາດເຈັບຈະຟື້ນຕົວໂດຍໄວຈາກການໂຈມຕີທີ່ໄຮ້ມະນຸດສະທຳໃນຄັ້ງນີ້” ທ່ານ ເພລຄອບ ກ່າວ.

ທາງການຣັດເຊຍລາຍງານວ່າ: ຜູ້ເສຍຊີວິດຈາກເຫດກວດຍິງໃນໂຮງຮຽນແຫ່ງໜຶ່ງ ມີຈຳນວນເພີ່ມຂຶ້ນເປັນ 13 ຄົນ ໂດຍເປັນເດັກນັກຮຽນຈຳນວນ 7 ຄົນ ແລະ ມີຜູ້ບາດເຈັບ 21 ຄົນ.

ເຈົ້າໜ້າທີ່ເປີດເຜີຍວ່າ: ຄົນຮ້າຍໃສ່ເສື້ອຢືດສີດຳມີສັນຍາລັກນາຊີ ແລະ ໄດ້ໃຊ້ອາວຸດປືນຍິງຕົວຕາຍຫລັງກໍ່ເຫດ.

ຕຳຫລວດກຳລັງສອບສວນເພື່ອຫາສາເຫດຂອງການກວດຍິງໃນຄັ້ງນີ້.

ໂຮງຮຽນດັ່ງກ່າວມີນັກຮຽນ 982 ຄົນ ແລະ ຄູ 80 ຄົນ ໂດຍໂຮງຮຽນຕັ້ງຢູ່ໃຈກາງເມືອງອີເຈບ ເຊິ່ງຢູ່ຫ່າງຈາກນະຄອນຫລວງມົດສະກູ 960 ກິໂລແມັດ ແລະ ມີປະຊາກອນອາໄສຢູ່ປະມານ 650.000 ຄົນ.