ເຊລຊີ ພ້ອມແຂ່ງລີເວີພູລ ດຶງ ເບນນາເຊີ ເສີມທີມຕະຫລາດນັກເຕະຮອບ 2
ເຊລຊີ ສະໂມສອນແຫ່ງພຣີເມຍລີກ ອັງກິດ ລ໊ອກເປົ້າ ອິສມາແອລ ເບນນາເຊີ ກອງກາງຕົວເກ່ັງຂອງ ເອຊີ ມິລານ ໂດຍຫວັງຈະເຊັນສັນຍາໃນຕະຫລາດຊື້ຂາຍນັກເຕະຮອບ 2 ເດືອນມັງກອນປີໜ້າ ແຕ່ກໍບໍ່ແມ່ນເລື່ອງງ່າຍ ຕ້ອງແຂ່ງກັບ ລີເວີພູລ ທີ່ໃຫ້ຄວາມສົນໃຈຢູ່ເຊ່ັນດຽວກັນ.
ເຊລຊີ ມີກອງກາງຊັ້ນດີຢູ່ໃນທີມຫລາຍຄົນ ແຕ່ພວກເຂົາກໍຍັງຕ້ອງຫານັກເຕະໃຫມ່ມາເສີມທີມ ເນື່ອງຈາກ ເອັນໂກໂລ ກ໊ອງເຕ ແລະ ຈໍຈິນໂຢ ຈະຫມົດສັນຍາໃນປີ 2023.
ເຊລຊີ ຈະຫມົດສັນຍາກັບ ເດນິສ ຊາກາເຣຍ ເມື່ອລະດູການນີ້ ແຕ່ ດາວເຕະທີມຊາດສະວິດເຊີແລນ ກໍຍ້າຍມາຈາກ ຢູເວນຕຸສ ແບບຢືມຕົວເທົ່ານັ້ນ ສ່ວນຕົວເລືອກຊື້ຖາວອນ ກໍຍັງບໍ່ຫມັ້ນໃຈວ່າສະໂມສອນຈະເລືອກໃຊ້ຫລືບໍ່.
ດ້ວຍເຫດນີ້ ກັລໂຊແມກາໂຕ້ ສື່ຊື່ດັງໃນປະເທດອິຕາລີ ລາຍງານວ່າ ພັອດເຕີ ສະແດງຄວາມສົນໃຈຢາກເຊັນສັນຍາກັບ ເບນນາເຊີ ເຖິງວ່າຈະຕ້ອງເປີດເສິກນອກຮອບກັບ ລີເວີພູລ ກໍຕາມ.
ຈາກລາຍງານລະບຸວ່າ ມິລານ ບໍ່ມີຄວາມຄິດທີ່ຈະຂາຍກອງກາງທີມຊາດແອລຈີເຣຍ ອາຍຸ 24 ປີ ຫາກໄດ້ຄ່າຕົວໜ້ອຍກວ່າ 35 ລ້ານປອນ ນອກຈາກນີ້ ຣອສໂຊເນຣີ ຍັງຫວັງວ່ານັກເຕະຈະຕໍ່ສັນຍາໃຫມ່ກັບຕົ້ນສັງກັດ ເນື່ອງຈາກສັນຍາປັດຈຸບັນ ຂອງລາວຈະຫມົດລະດູການ 2023/2024.
ທັງນີ້ ເບນນາເຊີ ສ້າງຜົນງານໄດ້ໂດດເດັ່ນໃນຖິ່ນ ຊານ ຊີໂຣ ດ້ວຍການຍິງໄປແລ້ວ 4 ປະຕູກັບ 7 ແອສຊິສ ຈາກການລົງສະໜາມ ໃຫ້ກັບຕົ້ນສັງກັດຈຳນວນ 114 ເກມ ນັບແຕ່ຍ້າຍມາຈາກ ເອັມໂປລີ ເມື່ອປີ 2019 ທີ່ສຳຄັນລາວຍັງມີສ່ວນຊ່ວຍໃຫ້ສະໂມສອນຄວ້າ ແຊ໊ມກັລໂຊ ເຊເຣຍອາ ຄັ້ງທຳອິດໃນຮອບ 11 ປີ ເມື່ອລະດູການຜ່ານມາ.
