ແຟນບານລີເວີພູລ ລວມຕົວຟ້ອງ ຢູຟາ ຈາກເຫດວຸ້ນວາຍກ່ອນເກມຊີງແຊ໊ມປຽນລີກ

ແຟນບານລີເວີພູລ ກວ່າ 1,700 ຄົນ ລວມຕົວຈ້າງບໍລິສັດກົດຫມາຍຊື່ດັງໃນເມືອງ ເປັນຕົວແທນຍື່ນຟ້ອງເອົາຜິດ ສະ ມາຄົມບານເຕະຢູໂຣບ ຫລື EUFA  ຈາກກໍລະນີເຮັດໃຫ້ພວກເຂົາໄດ້ຮັບຜົນກະທົບທາງດ້ານຮ່າງກາຍ ແລະ ຈິດໃຈ ຈາກເຫດວຸ້ນວາຍກ່ອນເກມ ຊີງແຊ໊ມປຽນລີກ ຮອບຕັດສິນ ລະດູການຜ່ານມາ.

BBC ສຳນັກຂ່າວສື່ດັງໃນປະເທດອັງກິດລາຍງານວ່າ : ແຟນບານລີເວີພູລ ທີມໃຫຍ່ແຫ່ງພຣີເມຍລີກ ອັງກິດ ກວ່າ 1,700 ຄົນ ກຽມລວມຕົວກັນຍື່ນຟ້ອງຮ້ອງຕໍ່ສະຫະພັນບານເຕະຢູໂຣບ ຈາກກໍລະນີເຮັດໃຫ້ພວກເຂົາໄດ້ຮັບບາດເຈັບ ຫລື ໄດ້ຮັບການກະທົບ ດ້ານຈິດໃຈ ອັນເນື່ອງມາຈາກເຫດການວຸ້ນວາຍກ່ອນເກມ ຢູຟາ ແຊ໊ມປຽນລີກ ຮອບຊີງຊະນະເລີດລະດູການຜ່ານມາ ເຊິ່ງລີເວີພູລ ເສຍໃຫ້ ຣຽວ ມາດຣິດ 0-1 ທີ່ສະໜາມ ສະຕາດ ເດິ ຟຣອງ ໃນນະຄອນຫລວງປາຣີສ ປະເທດຝຣັ່ງ ເມື່ອເດືອນພຶດສະພາທີ່ຜ່ານມາ.

ໃນໄລຍະກ່ອນເກມດັ່ງກ່າວ ເກີດເຫດວຸ້ນວາຍຂຶ້ນເມື່ອມີແຟນບານ ລີເວີພູລ ທີ່ບໍ່ມີບັດຈຳນວນຫນຶ່ງມມາລວມກັນຢູ່ໜ້າປະ ຕູທາງເຂົ້າ ຈົນເກີດຄວາມວຸ້ນວາຍ ເຮັດໃຫ້ເຈົ້າໜ້າທີ່ຕຳຫລວດນະຄອນຫລວງປາຣີ ຕັດສິນໃຈໃຊ້ແກສນ້ຳຕາເຂົ້າຄວບຄຸມ ເຫດການ ເຮັດໃຫ້ເກມເລີ່ມຕົ້ນຊັກຊ້າກວ່າກຳນົດເຖິງ 35 ນາທີ. ແນວໃດກໍຕາມ ຝັ່ງລີເວີພູລ ອອກມາປະນາມການກະທຳ ຂອງຝ່າຍຈັດການແຂ່ງຂັນ ເນື່ອງຈາກເບິ່ງວ່າມັນເກີດຂຶ້ນຈາກຄວາມຜິດພາດດ້ານການບໍລິຫານຈັດການ ຈົນສຸດທ້າຍ ຢູຟາ ແລະ ທາງການຂອງຝຣັ່ງຕ້ອງອອກມາຂໍໂທດໃນເວລາຕໍ່ມາ.

ແນວໃດກໍຕາມ ບີບີຊີ ລາຍງານວ່າ ແຟນບານ ລີເວີພູລ ຫລາຍກວ່າ 1,700 ຄົນ ທີ່ໄດ້ຮັບຜົນກະທົບຈາກເຫດການດ່ັງກ່າວ ທາງດ້ານຮ່າງກາຍ ແລະ ຈິດໃຈ ໄດ້ລວມຕົວກັນມອບຫມາຍໃຫ້ ບິງແຮມ, ໂປກັດ ກູເຮດ ແລະ ລີ ເດ 3 ບໍລິສັດດ້ານກົດຫມາຍ ຊື່ດັງໃນເມືອງລີເວີພູລເປັນຕົວແທນຍື່ນຟ້ອງ ຢູຟາ ໂທດຖານເຮັດຜິດເງື່ອນໄຂສັນຍາໃນການຂາຍປີ້ເຂົ້າຊົມເກມດັ່ງກ່າວ ລວມເຖິງລະເລີດເລື່ອງການເບິ່ງແຍງຄວາມປອດໄພຂອງແຟນບານນຳອີກ.