ແຮລີ່ ແມັກໄກວ ບໍ່ສົນສຽງວິຈານ ເຖິງຟອມບໍ່ດີ ແຕ່ຕິດທີມຊາດ ຍົກຜົນງານ ຕິດທີມດີເດັ່ນ ຢູໂຣ 2020 ເຂົ້າສູ້
ອັງກິດຍັງບໍ່ສາມາດຮຽກຟອມທີ່ດີກັບຄືນມາໄດ້. ພາຍຫລັງບຸກໄປເສຍໃຫ້ກັບ ອີຕາລີ 0-1 ຈົນຕ້ອງຕົກຮອບໄປຫລິ້ນໃນລີກ B ຂອງ ຢູຟ່າ ເນຊັນ ລີກ ນອກຈາກ ແກເຣັດ ເຊົາເກດ ທີ່ຖືກແຟນບານວິຈານຢ່າງໜັກ. ຜູ້ຫລິ້ນອີກຄົນຫນຶ່ງທີ່ຖືກຕໍານິເຊັ່ນກັນແມ່ນ ແຮລີ່ ແມັກໄກວ.
ກັບຕັນທີມຂອງ ແມນເຊັສເຕີ ຢູໄນເຕັດ ຖືກຕັ້ງຄຳຖາມມາຕະຫລອດ ນັບຕັ້ງແຕ່ມີຊື່ຢູ່ໃນທີມ ສິງໂຕຄຳຣາມ ຍ້ອນວ່າເຂົາໄດ້ກາຍເປັນຕົວສຳຮອງຂອງສະໂມສອນໄປແລ້ວ ເມື່ອ ເອຣິກ ເທນຮາກ ເລືອກໃຊ້ບໍລິການຂອງ ຣາຟາເອວ ວາຣານ ແລະ ລິຊານໂດ ມາຕິເນສ, ທີ່ຈັບຄູ່ກັນໄດ້ຢ່າງແຂງແກ່ງ ແລະ ຊ່ວຍໃຫ້ທີມເກັບໄຊຊະນະຕະຫລອດ 4 ຫລັງສຸດໃນພຣີເມຍລີກ.
ຢ່າງໃດກໍຕາມ, ແມັກໄກວ ຍັງໄດ້ຮັບຄວາມໄວ້ວາງໃຈຈາກ ແກເຣັດ ເຊົາເກດ ເຖິງວ່າຈະໄດ້ຮັບຂໍ້ຈຳກັດໃນການລົງຫລິ້ນກັບ ຜິສາດແດງ ແລະ ສຸດທ້າຍເຂົາກໍ່ບໍ່ສາມາດຊ່ວຍທີມ ສິງໂຕຄຳຣາມ ໃຫ້ລອດພົ້ນຈາກຄວາມພ່າຍແພ້ໄດ້. ມັນຍິ່ງເປັນເຊື້ອໄຟໃຫ້ແຟນບານເຂົ້າມາວິຈານເຂົາ.
ແຕ່ເຖິງຢ່າງນັ້ນ ກອງກາງອາຍຸ 29 ປີ ບໍ່ສົນໃຈກັບສຽງວິຈານອ້ອມຂ້າງ. ເພາະເຊື່ອວ່າຕົນເອງສົມຄວນທີ່ຈະຢູ່ໃນທີມຊາດແລ້ວ ພ້ອມຍົກຜົນງານທີ່ພາທີມຜ່ານເຂົ້າຮອບຊິງຊະນະເລີດ ຢູໂຣ 2020 ແລະ ມີຊື່ຢູ່ໃນທີມດີເດັ່ນຂອງການແຂ່ງຂັນ ຕອບໂຕ້ນັກວິຈານຄີບອດ.
