ງານຄອນເສີດ ລະດົມທືນ ຊ່ວຍປະຊາຊົນທີ່ໄດ້ຮັບຜົນກະທົບໄພພິບັດນໍ້າຖ້ວມທີ່ແຂວງອຸດົມໄຊ ໄດ້ຮັບການບໍລິຈາກລວມເປັນມູນຄ່າທັງໝົດ 250.870.000 ກີບ.

ສະມາຄົມສິນລະປີນແຫ່່ງຊາດ , ກົມສີລະປະວັດທະນະທຳ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ຈັດສະແດງຄອນເສີດ ຮ່ວມພະລັງນໍ້າໃຈສິນລະປິນ ເພື່ອເປັນການລະດົມວັດຖຸປັດໃຈ, ເຄື່ອງອຸປະໂພກ, ບໍລິໂພກ ນໍາເອົາໄປຊ່ວຍເຫຼືອປະຊາຊົນແຂວງອຸດົມໄຊ, ທີ່ໄດ້ຮັບຜົນກະທົບຈາກໄພພິບັດນໍ້າຖ້ວມ, ໃນວັນທີ 23 ກັນຍາ 2022 ຜ່ານມາ, ທີ່ກອງສິລະປະກອນແຫ່ງຊາດ ບ້ານໂພນທັນ ເມືອງສືສັດຕະນາກ ນະຄອນຫຼວງວຽງຈັນ, ງານດັ່ງກ່າວມີ: ທ່ານ ນາງ ສວນສະຫັວນ ວິຍະເກດ ລັດຖະມົນຕີກະຊວງຖະແຫຼງຂ່າວ,ວັດທະນະທຳ ແລະ ທ່ອງທ່ຽວ ; ມີຮອງລັດຖະມົນຕີ, ພັນລະຍາຄອບຄົວການນຳ ພ້ອມດ້ວຍບັນດາຫົວໜ້າກົມ, ຮອງກົມ ແລະ ແຂກຖືກເຊີນເຂົ້າຮ່ວມ.

ທ່ານ ບົວເງິນ ຊາພູວົງ ສິນລະປີນແຫ່ງຊາດ ປະທານສະມາຄົມສິນລະປີນແຫ່ງຊາດລາວ ໄດ້ກ່າວວ່າ: ການຈັດສະແດງຄອນເສີດ ຄັ້ງນີ້ ແມ່ນໄດ້ເຕົ້າໂຮມເອົາບັນດາສິນລະປີນລາວ ທີ່ມີຊື່ສຽງ ແລະ ເປັນທີ່ນິຍົມຂອງມວນຊົນ ຂອງລາວ, ມາຈາກຫຼາຍຄ້າຍເພງທັງລູກທົ່ງບ້ານນາ ແລະ ເພງສະຕິງມາເຕົ້າໂຮມເປັນຈິດໜື່ງໃຈດຽວກັນໃນການສະແດງສຽງເພງທີ່ມ່ວນອອນຊອນ ແລະ ທີ່ສະແດງໃຫ້ເຫັນເຖິງວິຖີການດຳລົງຊີວິດ, ຄວາມສາມັກຄີຂອງພີ່ນ້ອງຊາວລາວບັນເຜົ່າ , ເພື່ອສົ່ງກຳລັງໃຈແກ່ປະຊາຊົນລາວບັນດາເຜົ່າ ທີ່ໄດ້ຮັບຜົນກະທົບອຸທົກກະໄພທີ່ຮ້າຍແຮງຈາກໄພພິບັດນໍ້າຖ້ວມ ທີ່ເກີດຂື້ນໃນເດືອນສິງຫາ ຜ່ານມາ, ເຮັດໃຫ້ປະຊາຊົນລາວເປັນຈຳນວນຫຼາຍໄດ້ຮັບຜົນກະທົບ ເປັນຕົ້ນແມ່ນຢູ່ ແຂວງ ອຸດົມໄຊ.ຮຽກຮ້ອງໃຫ້ສັງຄົມມີສ່ວນຮ່ວມໃນການປະກອບສ່ວນ ເຄື່ອງນຸ່ງຮົ່ມ ວັດຖຸ ປັດໃຈ ແລະ ສົ່ງກຳລັງໃຈໃຫ້ປະຊາຊົນແຂວງອຸດົມໄຊ ຊ່ວຍກັນ. ນັບແຕ່ເລີ່ມຕົ້ນການສະແດງສີລະປະຈົນຈົບການສະແດງ ຕັ້ງແຕ່ ເວລາ 16:30-19:00 ໂມງ ຂອງວັນທີ 23 ກັນຍາ 2022 ຜ່ານມາ,  ເຫັນວ່າມີຜູ້ໃຈບຸນຮ່ວມປະກອບສ່ວນຊຸກຍູ ບໍ່ວ່າຈະເປັນເຄື່ອງບໍລິໂພກ ແລະ ອຸປະໂພກພ້ອມດ້ວຍວັດຖຸ ລວມເປັນມູນຄ່າທັງໝົດ 250.870.000 ກີບ, ໃນນີ້ມີເງິນສົດ 63.684.000 ກີບ ຊຶ່ງລາຍໄດ້ທັງໝົດໃນຄັ້ງນີ້ ແມ່ນຈະນຳໄປຊ່ວຍບັນເທົາທຸກແກ່ພີ່ນ້ອງປະຊາຊົນລາວບັນດາເຜົ່າທີ່ໄດ້ຮັບຜົນກະທົບຈາກໄພພິບັດນໍ້າຖ້ວມ ທີ່ແຂວງອຸດົມໄຊ.