ວິທີປິ່ນປົວເລັບສັກດ້ວຍໂຕເອງໃນເບື້ອງຕົ້ນ
ເລັບມີໜ້າທີ່ປ້ອງກັນອັນຕະລາຍໃຫ້ນິ້ວຕີນ – ນິ້ວມື ແລະ ພາກສ່ວນນີ້ຈະບໍ່ມີເສັ້ນປະສາດຢູ່ ເຮັດໃຫ້ເຮົາບໍ່ຮູ້ສຶກເຈັບເມື່ອເກີດພະຍາດຂຶ້ນກັບເລັບ, ແຕ່ຖ້າເກີດພະຍາດກິນເຂົ້າໄປເຖິງຜິວໜັງເລັບ ກໍສ້າງຄວາມເຈັບປວດໃຫ້ເຈົ້າຂອງໄດ້ ໂດຍສະເພາະເລັບສັກ.
ແນ່ນອນວ່າເລັບສັກຈະເຮັດໃຫ້ທ່ານຮູ້ສຶກເຈັບປວດຫລາຍ ເຖິງຈະກິນຢາແກ້ປວດກໍຫລຸດຜ່ອນອາການໄດ້ພຽງຊົ່ວຄາວ ຈຶ່ງຕ້ອງປິ່ນປົວ ເຊິ່ງກໍມີທັງການປິ່ນປົວດ້ວຍຕົນເອງແບບວິທີງ່າຍໆໃນກໍລະນີເປັນບໍ່ຫລາຍ, ແຕ່ໃນກໍລະນີເປັນຫລາຍກໍຕ້ອງໄປໂຮງໝໍ.
ສຳລັບວິທີປິ່ນປົວເລັບສັກດ້ວຍຕົນເອງໃນກໍລະນີທີ່ອາການບໍ່ຮຸນແຮງຫລາຍ ພຽງແຕ່ປວດບວມໃຄ່ ແລະ ແດງເລັກໜ້ອຍ ແລະ ຍັງບໍ່ມີນຳ້ໜອງ ເຮັດໄດ້ໂດຍ :
- ແຊ່ຕີນໃນນຳ້ອຸ່ນ ຫລື ນຳ້ເກືອອຸ່ນໆປະມານ 10 ນາທີ ເພື່ອຫລຸດຜ່ອນອາການປວດ.
- ຕັດເລັບສ່ວນເກີນທີ່ບໍ່ເຈັບອອກ ເພື່ອບໍ່ໃຫ້ມີເສດຝຸ່ນ ຫລື ອັນໃດເປິເປື້ອນຕົກຄ້າງຢູ່ ເພາະເສດເປິເປື້ອນນີ້ຈະເຮັດໃຫ້ເກີດການອັກເສບຕິດເຊື້ອຮຸນແຮງຂຶ້ນ.
- ໃຊ້ເຫລົ້າ 70% ເຊັດເລັບໃຫ້ສະອາດ.
- ຫາວັດຖຸອັນໃດຈັກຢ່າງທີ່ບາງໆແຂງໆພໍສົມຄວນ ເຊັ່ນ : ເສັ້ນດ້າຍ, ໄມ້ຈີ້ມແຂ້ວກ້ານບາງໆ ຫລື ໄໝຜັດແຂ້ວ ສອດເຂົ້າໄປໃນກ້ອງເລັບ ງັດເອົາເລັບສັກຂຶ້ນມາຕອນນີ້ອາດຈະຮູ້ສຶກເຈັບປວດແດ່ ໃຫ້ເຮັດຄ່ອຍໆ.
- ເອົາສຳລີສອດລົງໄປບໍລິເວນທີ່ເລັບມັນສັກຢູ່ ຈະຊ່ວຍຫລຸດຜ່ອນອາການເຈັບປວດລົງໄດ້ ແລ້ວກິນຢາປິ່ນປົວປະເພດເຕຕຣ້າໄຊຄລິນ ຫລື ຢາອຳປີ ແລະ ກໍກິນຢາແກ້ປວດປາຣາເຊຕາໂມນ ຈະຫລຸດຜ່ອນອາການເຈັບປວດ ແລະ ປິ່ນປົວການອັກເສບຈາກການຕິດເຊື້ອລົງໄດ້ຫລາຍ.
ຄົນທີ່ໃຊ້ວິທີນີ້ປິ່ນປົວເລັບສັກ ສາມາດອາບນຳ້ ແລະ ລ້າງຕີນໄດ້ຕາມປົກກະຕິ ແລະ ຄວນຈະຖູສະບູໃສ່ຕີນ, ງ່າມຕີນ, ແຈເລັບ ມື້ລະ 2 ເທື່ອ ເພື່ອກຳຈັດເຊື້ອພະຍາດອອກໄປນຳ. ຫລັງຈາກອາບນຳ້ແລ້ວຄວນໃຊ້ເຫລົ້າ 70% ເຊັດເລັບໃຫ້ສະອາດ ແລ້ວໃຊ້ຜ້າພັນໄວ້ເພື່ອຈະບໍ່ຖືກຫຍັງເປື້ອນ ສິ່ງສຳຄັນຕ້ອງເຊົາໃສ່ເກີບທີ່ຮັດ ຫລື ບີບຕີນ ແລະ ຕັດເລັບໃຫ້ຖືກຕ້ອງ.
