ກົມຄຸ້ມຄອງຄວາມປອດໄພອຸດສາຫະກຳພະລັງງານ ແຈ້ງໃຫ້ເຂື່ອນໄຟຟ້າທົ່ວປະເທດ ເຝົ້າລະວັງລະດັບນ້ຳ ແລະ ກຽມຄວາມພ້ອມຮັບໃນກໍລະນີສຸກເສີນ ຊ່ວງໄລຍະວັນທີ 25-28 ກັນຍາ 2022
ກົມຄຸ້ມຄອງຄວາມປອດໄພອຸດສາຫະກຳພະລັງງານ (ກປຟ) ກະຊວງພະລັງງານ ແລະ ບໍ່ແຮ່ ໄດ້ອອກແຈ້ງການໃນວັນທີ 23 ກັນຍາ 2022 ນີ້, ເຖິງບັນດາເຂື່ອນໄຟຟ້າໃນຂອບເຂດທົ່ວປະເທດໃຫ້ເຝົ້າລະວັງລະດັບນ້ຳ, ຕິດຕາມກວດກາສະພາບເຂື່ອນ ແລະ ກະກຽມຄວາມພ້ອມຮັບໃນກໍລະນີເກີດເຫດການສຸກເສີນ ໃນຊ່ວງລະດູມໍລະສຸມ, ໃຫ້ເພີ່ມທະວີເອົາໃຈໃສ່ຕິດຕາມສະພາບອາກາດ, ຕິດຕາມ ແລະ ກວດກາສະພາບເຂື່ອນຂອງຕົນຢູ່ສະເໝີ.
ພ້ອມນັ້ນ ໃຫ້ກຽມພ້ອມໃນການບໍລິຫານຈັດການນ້ຳ ເພື່ອຄວາມປອດໄພຂອງເຂື່ອນ ແລະ ສ້າງແຜນຮັບມືໃນກໍລະນີເກີດເຫດການສຸກເສີນ, ໂດຍອີງຕາມແຈ້ງການຈາກກົມອຸຕຸນິຍົມ ແລະ ອຸທົກກະສາດ ໃນຊ່ວງວັນທີ 25-28 ກັນຍາ 2022 ນີ້ ພະຍຸໝູນເຂດຮ້ອນໂນລູ (Nort) ຄາດວ່າພາຍຸຫົວນີ້ຈະເຄື່ອນທີ່ຜ່ານພາກເໜືອຂອງປະເທດຟີລິບປິນ ຈາກນັ້ນຈະເຄື່ອນທີ່ຂື້ນຝັ່ງປະເທດຫວຽດນາມ ແລະ ສືບຕໍ່ຜ່ານພາກກາງ ຫາ ພາກເໜືອຂອງປະເທດລາວ, ສະນັ້ນ ໃຫ້ບັນດາເຂື່ອນທີ່ຢູ່ໃນຂອບເຂດທົ່ວປະເທດ ໂດຍສະເພາະພາກເໜືອຂອງລາວ ເອົາໃຈໃສ່ຕິດຕາມລະດັບນ້ຳຢູ່ເຂື່ອນຂອງຕົວເອງ.
ດັ່ງນັ້ນ, ຈຶ່ງແຈ້ງມາຍັງທ່ານ ເພື່ອຮັບຊາບ ແລະ ປະຕິບັດຕາມແຈ້ງການຢ່າງເຂັ້ມງວດ
