ເຊລຊີ ຖະແຫລງປົດຜູ້ບໍລິຫານ ຫລັງມີພຶດຕິກຳຄຸກຄາມທາງເພດ

ເຊລຊີ ຖະແຫລງປົດ ດາມຽນ ວິລລູບີ ຈາກຕຳແໜ່ງອຳນວຍການຝ່າຍການຄ້າ ຫລັງພົບວ່າເຄີຍມີພຶດຕິກຳຄຸກຄາມ ທາງເພດໃສ່ໂຕແທນດ້ານການເງິນຍິງຄົນຫນຶ່ງ.

ສຳລັບ ວິລລູດບີ ຫາກໍກັບມາເຮັດວຽກກັບ ເຊລຊີ ເປັນຮອບທີ 2 ເມື່ອຕົ້ນເດືອນກັນຍາຜ່ານມາ ໂດຍກ່ອນໜ້ານີ້ລາວກໍມີປະ ສົບການເຮັດວຽກກັບ ແມນເຊສເຕີ ຊິຕີ ແລະ ອີເອ ສະປອດ ບໍລິສັດຜະລິດວິດີໂອເກມຊື່ດັງມາແລ້ວ.

ແຕ່ແນວໃດກໍຕາມ ວິລລູດບີ ຖືກຮຽກຮ້ອງວ່າ ລາວເຄີຍສະແດງພຶດຕິກຳຄຸກຄາມທາງເພດໃສ່ ຄາຕາລີນາ ຄິມ ໂຕແທນ ດ້ານການເງິນຂອງວົງການບານເຕະດ້ວຍການສົ່ງຂໍ້ຄວາມທີ່ບໍ່ເຫມາະສົມໄປຫາລາວຫລາຍຄັ້ງເມື່ອປີຜ່ານມາ.

ຫລັງການກວດສອບຫລັກຖານ ເຊລຊີ ປະກາດວ່າພວກເຂົາໄດ້ເລີກຈ້າງ ວິລລູດບີ ເປັນທີ່ຮຽບຮ້ອຍ : ‘‘ ຫລັກຖານຂອງຂໍ້ຄວາມ ທີ່ບໍ່ເຫມາະສົມທີ່ສົ່ງໂດຍ ວິລລູດບີ ກ່ອນການແຕ່ງຕັ້ງລາວມາເຮັດໜ້າທີ່ສະໂມສອນບານເຕະ ເຊລຊີ ເມື່ອຕົ້ນເດືອນນີ້ ໂດຍທາງສະໂມສອນໄດ້ກວດສອບແລ້ວ ແລະ ພຶດຕິກຳດັ່ງກ່າວຂັດຕໍ່ສະພາບແວດລ້ອມໃນບ່ອນເຮັດວຽກ ແລະ ວັດທະ ນະທຳອົງການທີ່ຈັດຕັ້ງຂຶ້ນໂດຍເຈົ້າຂອງໃຫມ່ຂອງສະໂມສອນ ’’.