ຈີນກຽມຫລຸດຜ່ອນມາດຕະການສະກັດໂຄວິດ ເປີດທາງໃຫ້ນັກທ່ອງທ່ຽວຕ່າງປະເທດ ທ່ຽວຊົມພື້ນທີ່ຕາມຊາຍແດນໄດ້
ວັນທີ 19 ກັນຍາ 2022, ລັດຖະບານຈີນໄດ້ອອກຮ່າງກົດເກນໃໝ່ ທີ່ເອື້ອອຳນວຍໃຫ້ຊາວຕ່າງປະເທດບາງສ່ວນສາມາດເດີນທາງເຂົ້າປະເທດ ເພື່ອມາທ່ຽວຊົມສະຖານທີ່ທ່ອງທ່ຽວຕາມຊາຍແດນຈີນໄດ້ງ່າຍຂຶ້ນ.
ກະຊວງວັດທະນະທຳ ແລະ ການທ່ອງທ່ຽວຈີນ ເປີດເຜີຍວ່າ: ກຣຸບທົວທ່ອງທ່ຽວທີ່ມີບໍລິສັດທົວເບິ່ງແຍງຈະສາມາດເດີນທາງເຂົ້າມາທ່ຽວຊົມສະຖານທີ່ທ່ອງທ່ຽວທີ່ຢູ່ຕາມຊາຍແດນຂອງປະເທດໄດ້ ໂດຍສາມາດເລືອກພອດການເດີນທາງເຂົ້າ ແລະ ອອກປະເທດໄດ້ຢ່າງຢືດຢຸ່ນ ແຕ່ປັດຈຸບັນຍັງບໍ່ໄດ້ມີການເປີດເຜີຍສະຖານທີ່ ແລະ ກຳນົດວັນທີແນ່ນອນ.
ນັບແຕ່ຕົ້ນປີ 2020 ຈີນໄດ້ປິດຊາຍແດນບໍ່ໃຫ້ນັກທ່ອງທ່ຽວຈາກຕ່າງປະເທດເຂົ້າມາໃນປະເທດ ເພື່ອຫວັງສະກັດການແພ່ລະບາດຂອງໂຄວິດໃນກຸ່ມຊາວຕ່າງປະເທດ ໂດຍອະນຸຍາດໃຫ້ພຽງປະຊາຊົນບາງສ່ວນທີ່ສາມາດເຂົ້າມາໄດ້ເທົ່ານັ້ນເຊັ່ນ: ຊາວຕ່າງປະເທດທີ່ມີວີຊາເຮັດວຽກ.
ເຖິງຢ່າງໃດກໍຕາມ, ໃນໄລຍະບໍ່ເທົ່າໃດເດືອນຜ່ານມາ, ຈີນໄດ້ເລີ່ມຫລຸດຜ່ອນມາດຕະການບາງສ່ວນແລ້ວ ນັບແຕ່ການເປີດເສັ້ນທາງບິນ ລະຫວ່າງຈີນ ແລະ ປະເທດອື່ນໆເພີ່ມຂຶ້ນ ເພື່ອເປີດທາງໃຫ້ນັກຮຽນຈາກຕ່າງປະເທດທີ່ມີໃບອະນຸຍາດຖືກຕ້ອງສາມາດເດີນທາງເຂົ້າປະເທດໄດ້. ອີກທັງຍັງມີການຫລຸດມາດຕະການກັກຕົວສຳລັບຜູ້ທີ່ເດີນທາງເຂົ້າປະເທດ.
ຈີນມີຊາຍແດນຕິດກັບ 14 ປະເທດ ເຊິ່ງລວມທັງຣັດເຊຍ, ມົງໂກລີ, ມຽນມາ, ສປປ ລາວ ແລະ ຫວຽດນາມ ໂດຍຜ່ານມາ ຈີນມັກຈະພົບຜູ້ຕິດເຊື້ອໂຄວິດທີ່ເຊື່ອມໂຍງກັບພົນລະເມືອງທີ່ເດີນທາງເຂົ້າ-ອອກຂ້າມຊາຍແດນ, ແຕ່ການຕັດສິນໃຈຄັ້ງຫລ້າສຸດຂອງລັດຖະບານນັ້ນ ຈະເຮັດໃຫ້ຂະແໜງການທ່ອງທ່ຽວກັບມາຟື້ນຕົວຂຶ້ນອີກ ໂດຍມີເຂດຊາຍແດນເປັນພື້ນທີ່ຕົວແບບກ່ອນ.
ອ້າງອີງ:
- https://edition.cnn.com/travel/article/china-easing-entry-rules-intl-hnk/index.html
- https://www.reuters.com/world/china/china-plans-easier-border-entry-rules-some-foreign-tourists-2022-09-19/
