ໄຕ້ຝຸ່ນນັນມາດໍຖະຫລົ່ມຍີ່ປຸ່ນ ເສຍຊີວິດແລ້ວ 2 ຄົນ – ບາດເຈັບນັບສິບ
ພາຍຸໄຕ້ຝຸ່ນນັນມາດໍເຄື່ອນທີ່ເຂົ້າສູ່ເກາະຄິວຊູ ທາງພາກຕາເວັນຕົກສຽງໃຕ້ຂອງປະເທດຍີ່ປຸ່ນໃນວັນທີ 19 ກັນຍາ ສົ່ງຜົນໃຫ້ມີຜູ້ເສຍຊີວິດຢ່າງໜ້ອຍ 2 ຄົນ ແລະ ບາດເຈັບອີກຫລາຍກວ່າ 12 ຄົນ.
ທັງນີ້, ສຳນັກຂ່າວກຽວໂດລາຍງານວ່າ: ໄຕ້ຝຸ່ນນັນມາດໍມີທ່າອ່ຽງເຄື່ອນທີ່ໄປທາງຝັ່ງຕາເວັນອອກສຽງເໜືອ ຫລັງຈາກຜ່ານເກາະຮອນຊູໃນວັນທີ 20 ກັນຍາ. ຂະນະທີ່ກົມອຸຕຸນິຍົມວິທະຍາຍີ່ປຸ່ນປະກາດເຕືອນໄພກະແສລົມຮຸນແຮງ, ຄື້ນສູງ ແລະ ດິນເຈື່ອນແບບຕໍ່ເນື່ອງທົ່ວພາກຕາເວັນຕົກຈົນຮອດພາກເໜືອຂອງຍີ່ປຸ່ນ.
ໃນຕອນທ່ຽງວັນທີ 19 ກັນຍານີ້, ໄຕ້ຝຸ່ນນັນມາດໍ ເຊິ່ງເປັນພາຍຸຫົວທີ 14 ຂອງລະດູມໍລະສຸມປີນີ້ໄດ້ເຄື່ອນທີ່ເຂົ້າໃກ້ເມືອງຮາກິ ຂອງແຂວງຢາມາງຸຈິ ທາງພາກຕາເວັນຕົກຂອງຍີ່ປຸ່ນດ້ວຍຄວາມໄວລົມປະມານ 20 ກິໂລແມັດຕໍ່ຊົ່ວໂມງ.
ຂະນະທີ່, ທ່ານ ໂຄອິຈິ ທານິ ລັດຖະມົນຕີຝ່າຍບໍລິຫານແກ້ໄຂໄພພິບັດຍີ່ປຸ່ນເປີດເຜີຍວ່າ: ນາຍົກລັດຖະມົນຕີ ຟູມິໂອະ ຄິຊິດະ ແຫ່ງຍີ່ປຸ່ນ ໄດ້ສັ່ງໃຫ້ເຈົ້າໜ້າທີ່ລັດຖະບານ “ເດີນໜ້າປະເມີນຄວາມເສຍຫາຍໂດຍໄວທີ່ສຸດ ພ້ອມໃຊ້ມາດຕະການຈຳເປັນທັງໝົດເພື່ອຮັບມືໄພທຳມະຊາດໃນຄັ້ງນີ້”.
ນອກຈາກນີ້, ນາຍົກລັດຖະມົນຕີ ຄິຊິດະ ຕັດສິນໃຈເລື່ອນກຳນົດການເດີນທາງໄປນະຄອນນິວຢອກຂອງອາເມລິກາອອກໄປ 1 ວັນ ເພື່ອຕິດຕາມສະຖານະການໄພພິບັດພາຍໃນປະເທດ ໂດຍທ່ານຈະອອກເດີນທາງໃນວັນທີ 20 ກັນຍາແທນ.
