ໄຕ້ຫວັນ ເກີດແຜ່ນດິນໄຫວ 6.8 ຣິກເຕີ ສົ່ງຜົນໃຫ້ອາຄານບ້ານເຮືອນພັງຖະຫລົ່ມ ແລະ ລົດໄຟຕົກລາງ ພົບຜູ້ບາດເຈັບຫລາຍຄົນ
ໃນວັນທີ 18 ກັນຍາ 2022 ທີ່ຜ່ານມາ ເກີດເຫດແຜ່ນດິນໄຫວຮຸນແຮງຂະໜາດ 6.8 ຣິກເຕີ ທີ່ ພາກຕາເວັນສ່ຽງໃຕ້ຂອງໄຕ້ຫວັນ ສົ່ງຜົນໃຫ້ອາຄານບ້ານເຮືອນຫລາຍຫລັງພັງຖະຫລົ່ມ ໄດ້ຮັບຄວາມເສຍຫາຍຫລາຍສົມຄວນ, ຂົວຂາດ ແລະ ເຮັດໃຫ້ລົດໄຟຕົກລາງ ໃນເຂດມົນທົນຮວາຫລຽນ.
ສຳນັກງານອຸຕຸນິຍົມວິທະຍາຂອງໄຕ້ຫວັນລາຍງານວ່າ: ສູນກາງແຜ່ນດິນໄຫວເກີດຂຶ້ນໃນມົນທົນໄຖຕົງ ເຊິ່ງຢູ່ໃນພື້ນທີ່ດຽວກັນກັບສະຖານທີ່ເກີດແຜ່ນດິນໄຫວຂະໜາດ 6.4 ຣິກເຕີ ໃນຕອນແລງຂອງວັນທີ 17 ກັນຍາ 2022 ທີ່ຜ່ານມາ ເຊິ່ງເປັນເຫດການແຜ່ນດິນໄຫວທີ່ມີຄວາມແຮງທີ່ສຸດຂອງເຂດໄຖຕົງ ໃນຮອບ 49 ປີ
ເບື້ອງຕົ້ນມີພະນັກງານຢູ່ໂຮງງານຊີມັງເສຍຊີວິດ 1 ຄົນ, ມີອາຄານຮ້ານຂາຍເຄື່ອງສູງ 3 ຊັ້ນ ພັງຖະຫລົ່ມລົງມາ ມີຄົນຕິດຢູ່ພາຍໃນ 4 ຄົນ ເຈົ້າໜ້າທີ່ກູ້ໄພສາມາດຊ່ວຍເຫລືອອອກມາໄດ້, ຂະນະນັ້ນມີປະຊາຊົນ ອີກ 3 ຄົນ ທີ່ກຳລັງຂັບລົດແລ້ວເກີດອຸບັດເຫດຈາກຂົວພັງຖະຫລົ່ມ ຫລັງເກີດແຜ່ນດິນໄຫວ.
ດ້ານການລົດໄຟໄຕ້ຫວັນ ເປີດເຜີຍວ່າ: ມີຕູ້ລົດໄຟໂດຍສານຕົກລາງ 3 ຕູ້ ທີ່ສະຖານີຕົງລີ່ ເຊິ່ງທາງການໄດ້ອົບພະຍົບຜູ້ໂດຍສານອອກຈາກຕູ້ລົດໄຟຫລາຍກວ່າ 20 ຄົນ. ຈາກແຜ່ນດິນໄຫວທີ່ເກີດຂຶ້ນຍັງໄດ້ສົ່ງຜົນກະທົບໃຫ້ສຳນັກງານອຸຕຸວິທະຍາຂອງຍີ່ປຸ່ນຕ້ອງອອກປະກາດເຕືອນໄພການເກີດຄື້ນສິນາມິ ທີ່ເກາະມິຍາໂກະ ໃນທະເລຈີນຕາເວັນອອກກ່ອນທີ່ຈະຍົກເລີກໃນພາຍຫລັງ.
