ປຶກສາຫາລື ແລກປ່ຽນຂໍ້ມູນຂ່າວສານ ແລະ ສ້າງກົນໄກ ການຮ່ວມມື ວຽກງານ ຕ້ານ ແລະ ສະກັດກັ້ນ ການລັກລອບຄ້າຂາຍສັດປ່າ ລະຫວ່າງຊາດ
ວັນທີ 14-15 ກັນຍາ 2022 ຈັງຫວັດຊຽງຣາຍ ຣາຊະອານາຈັກໄທ ແລະ ແຂວງບໍ່ແກ້ວ ຂອງ ສປປລາວ ໄດ້ຮ່ວມກັນຈັດກອງປະຊຸມ ປຶກສາຫາລື ແລກປ່ຽນບົດຮຽນ ກ່ຽວກັບວຽກງານຕ້ານ ແລະ ສະກັດກັ້ນ ການລັກລອບຄ້າຂາຍສັດປ່າລະຫວ່າງຊາດ ໂດຍສະເພາະ ຕາມແນວຊາຍແດນຂອງແຂວງບໍ່ແກ້ວ ແລະ ຈັງຫວັດຊຽງຣາຍ ໂດຍການເປັນປະທານຮ່ວມ ຂອງທ່ານ ສຸນັນທາ ຈຸນລະມະນີ ຮອງຫົວຫນ້າກົມກວດກາປ່າໄມ້, ກະຊວງກະສິກຳ ແລະ ປ່າໄມ້, ສປປລາວ ແລະ ທ່ານ ວາຣະດິສອນ ອ່ອນນຸດ ຮອງຜູ້ວ່າລາຊະການ ຈັງຫວັດຊຽງຣາຍ, ຣາຊະອານາຈັກໄທ.
ກອງປະຊຸມໄດ້ປຶກສາຫາລື, ລະດົມແນວຄວາມຄິດ, ແລກປ່ຽນບົດຮຽນ, ແລກປ່ຽນຂໍ້ມູນຂ່າວສານ ແລະ ສ້າງກົນໄກ ການຮ່ວມມື, ການປະສານກັນ ກ່ຽວກັບ ວຽກງານ ຕ້ານ ແລະ ສະກັດກັ້ນ ການລັກລອບຄ້າຂາຍສັດປ່າ ລະຫວ່າງຊາດ ໂດຍສະເພາະ ຕາມຊາຍແດນເມືອງຕໍ່ເມືອງ ແຂວງຕໍ່ແຂວງ ຄື: ເມືອງ ຕົ້ນເຜິ້ງ, ຫ້ວຍຊາຍ ແລະ ເມືອງ ປາກທາ ຂອງແຂວງ ບໍ່ແກ້ວ, ສປປ ລາວ ແລະ ເມືອງ ຊຽງແສນ, ຊຽງຂອງ ແລະ ເມືອງ ວຽງແກ່ນ ຂອງ ຈັງຫວັດ ຊຽງລາຍ, ຣາຊາອານາຈັກໄທ.
