ອຸດົມໄຊ ສໍາເລັດຝຶກອົບຮົມວຽກງານຮ່າງເອກະສານທາງລັດຖະການ

ແຫລ່ງຂ່າວຈາກ ແຂວງອຸດົມໄຊ ໃຫ້ຮູ້ວ່າ: ວັນທີ 13 ກັນຍາ 2022 ຜ່ານມານີ້, ຄະນະຈັດຕັ້ງແຂວງອຸດົມໄຊ ສຳເລັດການຝືກອົບຮົມວຽກງານ ການຮ່າງເອກະສານທາງລັດຖະການ, ວຽກງານສໍາເນົາເອກະສານ ແລະ ພິທີການທູດ, ມາລະຍາດທາງສັງຄົມ-ມາລະຍາດສາກົນ ເພື່ອເປັນການຍົກລະດັບທັກສະ, ຄວາມສາມາດທາງດ້ານວິຊາການ ໃຫ້ແກ່ພະນັກງານ-ລັດຖະກອນ ພາຍໃນຄະນະຈັດຕັ້ງແຂວງໃຫ້ສູງຂຶ້ນ ແລະ ສ້າງໃຫ້ມີຄວາມຮັບຮູ້ເຂົ້າໃຈເປັນເອກະພາບ ໃນການຈັດຕັ້ງປະຕິບັດຕົວຈິງ ໃນວຽກງານການຮ່າງເອກະສານທາງລັດຖະການ, ການຄຸ້ມຄອງ-ສໍາເນົາເອກະສານ ແລະ ວຽກງານພິທີການ.

ເອກະສານທີ່ນຳມາຝຶກອົບຮົມຄັ້ງນີ້, ປະກອບມີ: ການຮ່າງເອກະສານທາງລັດຖະການ, ການສໍາເນົາເອກະສານ ແລະ ວຽກງານພິທີການ-ມາລະຍາດທາງສັງຄົມ ໂດຍວິທະຍາກກອນ ໄດ້ອະທິບາຍແນະນໍາ ບັນດາເນື້ອໃນເອກະສານ ຢ່າງລະອຽດ ໂດຍຍົກໃຫ້ເຫັນຄວາມໝາຍຄວາມສໍາຄັນ, ນິຕິກໍາທີ່ກ່ຽວຂ້ອງທັງພາກທິດສະດີ ພ້ອມທັງຍົກຕົວຢ່າງ, ສະພາບການຈັດຕັ້ງປະຕິບັດຕົວຈິງ ມາແລກປ່ຽນສົນທະນາກັບ ສໍາມະນາກອນ ເຮັດໃຫ້ມີບັນຍາກາດຟົດຟື້ນ ແລະ ສໍາມະນາກອນສາມາດຮັບຮູ້ເຂົ້າໃຈດີ ຕໍ່ກັບບັນດາເນື້ອໃນທີ່ໄດ້ນໍາມາຝືກໃນຄັ້ງນີ້ ເປັນຢ່າງດີ, ສາມາດນຳໄປຈັດຕັ້ງປະຕິບັດເຂົ້າໃນວຽກງານຕົວຈິ່ງໄດ້.