ບໍ່ແມ່ນສະຫລາມກໍບິນເທິງນໍ້າໄດ້ ເພາະນີ້ແມ່ນ Flying Fish ປາທີ່ສາມາດບິນເທິງທະເລ
ເຮົາອາດຈະເຄີຍເຫັນພາບສັດທະເລໂດດຂຶ້ນມາເທິງໜ້ານໍ້າເຊັ່ນ ປາສະຫລາມ, ປາວານ… ມື້ນີ້ເຮົາຈະພາທຸກທ່ານໄປຮູ້ຈັກກັບ Flying Fishປາທີ່ສາມາດບິນຂຶ້ນມາເທິງໜ້ານໍ້າໄດ້ເປັນເວລາດົນ.
ປານົກກະຈອກ ຫລື ປາບິນ (Flying Fish) ເປັນວົງຕະກູນຂອງປາກະດູກແຂງ ຈັດຢູ່ໃນປາທະເລຂະໜາດນ້ອຍ, ມີຄວາມຍາວເຕັມທີ່ບໍ່ເກີນ 30 ຊັງຕີແມັດ, ພົບເຫັນຫລາຍໃນທະເລເຂດຮ້ອນ ແລະ ເຂດອົບອຸ່ນທົ່ວໂລກໃນທະເລທີ່ຫ່າງຈາກແຄມຝັ່ງພໍສົມຄວນ, ສ່ວນໃຫຍ່ຈະມີລໍາຕົວສີຂຽວ ຫລື ສີຟ້າໝົ່ນ ຂ້າງລໍາຕົວເປັນສີຂາວເງິນ.
ມີລັກສະນະໂດຍລວມແມ່ນ ມີລໍຕົວທີ່ຍາວ ແລະ ຂ້ອນຂ້າງມົນ, ປາກນ້ອຍ, ບໍ່ມີແຂ້ວ, ມີຄີທີ່ແຂງແຮງ. ລັກສະນະເດັ່ນແມ່ນ ຢູ່ຮ່ວມກັນເປັນຝູງ ແລະ ຫາກິນບໍລິເວນໜ້ານໍ້າ, ເມື່ອຕົກໃຈ ຫລື ໜີໄພ ຈະໂດດໄກຄືກັບບິນຢູ່ເທິງອາກາດຄືນົກ ເຊິ່ງອາດໄກໄດ້ເຖິງ 30 ແມັດ ຂຶ້ນຢູ່ກັບຂະໜາດຕົວຂອງຂອງປາ ແລະ ຈັງຫວະ ແລະ ເປັນທີ່ມາຂອງຊື່ປານົກກະຈອກ ຫລື ປາບິນ.
ປານົກກະຈອກເມື່ອໂດດອາດສູງໄດ້ເຖິງ 7-10 ແມັດ ດ້ວຍຄວາມໄວປະມານ 65 ກິໂລແມັດ/ຊົ່ວໂມງ ແລະ ສາມາດຢູ່ກາງອາກາດໄດ້ຢ່າງໜ້ອຍ 10 ວິນາທີ, ພົບເຫັນຫລາຍກວ່າ 50 ຊະນິດທົ່ວໂລກ ແບ່ງອອກເປັນ 8 ຕະກຸນ, ເປັນປາທີ່ຕົກໃຈງ່າຍ ແລະ ຕາຍງ່າຍອີກດ້ວຍ.
ສ່ວນໄຂ່ປານົກກະຈອກນີ້ ມີລັກສະນະເມັດນ້ອຍເປັນສີສົ້ມ ທີ່ຄົນຍີ່ປຸ່ນນິຍົມເອົາມາເຮັດເປັນອາຫານເຊັ່ນ: ຊູຊິໜ້າໄຂ່ປາ ທີ່ຫລາຍຄົນເຂົ້າໃຈຜິດວ່າເປັນໄຂ່ກຸ້ງ.
