ຫ້ອງວ່າການສຳນັກງານນາຍົກລັດຖະມົນຕີພົບປະ ແລະ ແລກປ່ຽນບົດຮຽນ ກັບ ຫ້ອງວ່າການລັດຖະບານຫວຽດນາມ

ການພົບປະແລກປ່ຽນບົດຮຽນກັນຄັ້ງນີ້ ມີ 3 ຈຸດປະສົງໃຫຍ່ ຄື:

1 ເພື່ອປະຕິບັດຕາມບົດບັນທຶກ ແລະ ການຕົກລົງຮ່ວມມືສອງຝ່າຍ ລະຫວ່າງ ຫ້ອງວ່າການສໍານັກງານນາຍົກລັດຖະມົນຕີ (ຫສນຍ) ລາວ ແລະ ຫ້ອງວ່າການລັດຖະບານ (ຫລບ) ຫວຽດນາມ ທີ່ເຄີຍໄດ້ປະຕິບັດຮ່ວມກັນມາເປັນປົກກະຕິ;

2 ເພື່ອປະກອບສ່ວນເຂົ້າຮ່ວມ ໃນການຈັດຕັ້ງປະຕິບັດກິດຈະກຳ ສະເຫຼີມສະຫຼອງສອງວັນປະຫວັດສາດ ຂອງສອງຊາດ ລາວ-ຫວຽດນາມ ໃນປີ 2022 ນີ້ ທັງເປັນການອວຍພອນວັນຊາດຫວຽດນາມ ຄົບຮອບ 77 ປີ ທີ່ຫາກໍຜ່ານພົ້ນໄປ ບໍ່ເທົ່າໃດວັນ,

3 ເພື່ອຕອບສະໜອງຕາມການເຊື້ອເຊີນ ຂອງສະຫາຍລັດຖະມົນຕີ,​ ຫົວໜ້າ ຫລບ ຫວຽດນາມ ໂດຍສະເພາະພົບປະ ແລະ ລົງເລິກແລກປ່ຽນບົດຮຽນການເປັນເສນາທິການ, ປະສານງານ ແລະ ບໍລິການຮັບໃຊ້ ລັດຖະບານ ກໍຄື ປະຊາຊົນ.

ໃນໂອກາດນີ້, ສະຫາຍ ອາລຸນໄຊ ສູນນະລາດ ໄດ້ກ່າວສະແດງຄວາມຂອບໃຈ ຕໍ່ການສະໜັບສະໜູນຊ່ວຍເຫຼືອອັນສະເໝີຕົ້ນສະເໝີປາຍ ຂອງ ຫລບ ຫວຽດນາມ ໃຫ້ແກ່ ຫສນຍ ໃນໄລຍະຜ່ານມາ; ພ້ອມທັງໄດ້ຕີລາຄາສູງຕໍ່ຜົນສໍາເລັດ ທີ່ ຫລບ ຫວຽດນາມ ສາມາດປະຕິບັດໄດ້ ໂດຍສະເພາະການປະຕິບັດພາລະບົດບາດເປັນເສນາທິການໃຫ້ແກ່ລັດຖະບານ ຊຶ່ງຜົນສຳເລັດດັ່ງກ່າວໄດ້ປະກອບສ່ວນອັນສໍາຄັນເຮັດໃຫ້ການປະຕິບັດໜ້າທີ່ຂອງລັດຖະບານ ກໍຄືການປະຕິບັດແຜນພັດທະນາເສດຖະກິດ-ສັງຄົມ ມີຜົນສຳເລັດທີ່ພົ້ນເດັ່ນຫຼາຍດ້ານ ແລະ ບາງດ້ານສາມາດປະຕິບັດໄດ້ລື່ນຄາດໝາຍທີ່ກໍານົດໄວ້; ສອງຝ່າຍເປັນເອກະພາບ ຕໍ່ການຕີລາຄາຜົນສຳເລັດໃນຂອບການຮ່ວມມື ຂອງ ຫສນຍ ແລະ ຫລບ ຫວຽດນາມ ພ້ອມທັງຈະໄດ້ຊີ້ນໍາ, ຊຸກຍູ້ໃຫ້ບັນດາກົມທີ່ກ່ຽວຂ້ອງສືບຕໍ່ຈັດຕັ້ງປະຕິບັດໂຄງການຮ່ວມມື ຂອງສອງຫ້ອງວ່າການໃຫ້ສໍາເລັດຕາມເວລາທີ່ໄດ້ກໍານົດໄວ້. ນອກຈາກນີ້, ສອງຝ່າຍໄດ້ແຈ້ງສະພາບການພັດທະນາເສດຖະກິດ-ສັງຄົມ ທີ່ພົ້ນເດັ່ນຂອງປະເທດຕົນໃຫ້ກັນຊາບ ແລະ ໄດ້ຕີລາຄາສູງ ຕໍ່ຜົນສຳເລັດການຮ່ວມມືຂອງສອງລັດຖະບານ ລາວ-ຫວຽດນາມ ແລະ ຫວຽດນາມ-ລາວ ລວມທັງຢືນຢັນຮ່ວມກັນວ່າຈະສືບຕໍ່ຊຸກຍູ້, ກວດກາ, ຕີລາຄາຄືນການປະຕິບັດກິດຈະກໍາອື່ນໆ ໃນຂອບໂຄງການຮ່ວມມືຂອງສອງລັດຖະບານ ໂດຍສະເພາະການແກ້ໄຂບັນດາຈຸດທີ່ຍັງຄົງຄ້າງ, ຂໍ້ຫຍຸ້ງຍາກຕ່າງໆ ເພື່ອໃຫ້ບັນດາໂຄງການດັ່ງກ່າວໄດ້ຮັບການຈັດຕັ້ງປະຕິບັດມີຜົນສຳເລັດ ແລະ ມີປະສິດທິຜົນ, ສິ່ງສໍາຄັນແມ່ນສາມາດມອບ-ຮັບໂຄງການຕາມທີ່ລັດຖະບານສອງປະເທດໄດ້ຕົກລົງຮ່ວມກັນ ໃນກອງປະຊຸມ ຄັ້ງທີ 44 ຂອງຄະນະກຳມະການຮ່ວມມືທະວິພາຄີ; ສອງຝ່າຍ ເຫັນດີເປັນເອກະພາບ ເພື່ອປະສານງານກັບພາກສ່ວນທີ່ກ່ຽວຂ້ອງ ໃນການກະກຽມຄວາມພ້ອມດ້ານຕ່າງໆໃຫ້ແກ່ການມາຢ້ຽມຢາມ ແລະ ເຮັດວຽກຢູ່ ສປປ ລາວ ຢ່າງເປັນທາງການ ຂອງທ່ານນາຍົກລັດຖະມົນຕີ ແຫ່ງ ສສ ຫວຽດນາມ ໃນທ້າຍປີນີ້ ແລະ ໃນຕອນທ້າຍພິທີພົບປະ ສະຫາຍ ອາລຸນໄຊ ສູນນະລາດ ຍັງໄດ້ເຊື້ອເຊີນ ສະຫາຍ ເຈິນ ວັນ ເຊີນ ພ້ອມດ້ວຍຄະນະເດີນທາງຢ້ຽມຢາມ ສປປ ລາວ ໃນເວລາທີ່ເໝາະສົມ.

ພາຍຫຼັງສໍາເລັດການພົບປະສອງຝ່າຍ, ຄະນະຜູ້ແທນ ຫສນຍ ໄດ້ສືບຕໍ່ເຂົ້າຮ່ວມກອງປະຊຸມສຳມະນາແລກປ່ຽນບົດຮຽນ ກັບ ຫລບ ຫວຽດນາມ ຊຶ່ງຝ່າຍຫວຽດນາມໄດ້ລົງເລິກບັນດາຫົວຂໍ້ທີ່ຕິດພັນກັບວຽກງານເສນາທິການ, ສັງລວມ ແລະ ບໍລິການຮັບໃຊ້ລັດຖະບານ ກໍຄືທ່ານນາຍົກລັດຖະມົນຕີເປັນຕົ້ນ: ກົນໄກການເຮັດວຽກຂອງລັດຖະບານຫວຽດນາມ ໄລຍະປີ 2021-2026 ໂດຍສະເພາະບາງຈຸດທີ່ໄດ້ປັບປຸງໃໝ່; ບົດບາດຂອງ ຫລບ ຫວຽດນາມ ໃນການຕິດຕາມ, ກວດກາບັນດາໂຄງການ, ແຜນການ ຂອງລັດຖະບານ; ຜົນສໍາເລັດໃນການປັບປຸງການບໍລິຫານລັດ, ປັບປຸງສະພາບແວດລ້ອມ ແລະ ຍົກສູງຄວາມສາມາດການແຂ່ງຂັນຂອງຫວຽດນາມ ໃນປັດຈຸບັນ; ບົດບາດຂອງ ຫລບ ຫວຽດນາມ ໃນການເປັນເສນາທິການ, ສັງລວມຊ່ວຍລັດຖະບານ ແລະ ທ່ານນາຍົກລັດຖະມົນຕີ. ຫຼັງຈາກນັ້ນ, ຜູ້ເຂົ້າຮ່ວມຈາກ ຫສນຍ ກໍໄດ້ມີຄຳຖາມເຈາະຈີ້ມຕື່ມ ໂດຍສະເພາະກ່ຽວກັບການຍົກສູງບົດບາດ ແລະ ຄວາມສາມາດຂອງຫ້ອງວ່າການ ໃນການເປັນເສນາທິການໃຫ້ແກ່ທ່ານນາຍົກລັດຖະມົນຕີກໍຄືລັດຖະບານ.

​ຂ່າວ: ຫ​ສນຍ