ອາເມລິກາຢືນຢັນພົບຜູ້ເສຍຊີວິດຈາກພະຍາດໝາກສຸກລີງ ຄົນທຳອິດໃນລອສແອນເຈລິສ

ກົມສາທາລະນະສຸກ (Department of Public Health) ໃນນະຄອນລອສແອນເຈລິສ ລັດແຄລິຟໍເນຍ ລາຍງານກໍລະນີການເສຍຊີວິດຂອງຊາວເມືອງຄົນໜຶ່ງ ທີ່ມີສາເຫດມາຈາກອາການປ່ວຍດ້ວຍພະຍາດໝາກສຸກລີງ ໂດຍຖືເປັນຜູ້ເສຍຊີວິດຈາກພະຍາດໝາກສຸກລີງຄົນທຳອິດໃນອາເມລິກາ.

ໂດຍກົມສາທາລະນະສຸກລອສແອນເຈລິສ ຮ່ວມກັບສູນຄວບຄຸມ ແລະ ປ້ອງກັນພະຍາດຂອງອາເມລິກາ (CDC) ໄດ້ເຜີຍແຜ່ປະກາດຂ່າວ ຢືນຢັນຜົນການກວດສອບ ພົບການເຊື່ອມໂຍງລະຫວ່າງການເສຍຊີວິດຂອງຜູ້ປ່ວຍຄົນດັ່ງກ່າວກັບພະຍາດໝາກສຸກລີງ ແລະ ລະບຸວ່າ: ຜູ້ປ່ວຍນັ້ນມີລະບົບພູມຕ້ານທານອ່ອນແອຂັ້ນຮຸນແຮງ ແລະ ໄດ້ຮັບການປິ່ນປົວຢູ່ໂຮງໝໍ ແຕ່ຍັງບໍ່ມີການເປີດເຜີຍຂໍ້ມູນອື່ນໆ.

ຂະນະທີ່ສຳນັກຂ່າວ CNN ລາຍງານຄວາມເຫັນຈາກ ດຣ. ວິວລຽມ ຊາຟເນີ ສາສະດາຈານໃນພະແນກພະຍາດຕິດເຊື້ອຂອງສູນການແພດມະຫາວິທະຍາໄລ Vanderbilt ຊີ້ວ່າ: “ລະບົບພູມຕ້ານທານທີ່ບົກພ່ອງຂອງຜູ້ປ່ວຍບໍ່ສາມາດຄວບຄຸມໄວຣັສໄດ້ ແລະ ເມື່ອມັນເຂົ້າສູ່ຮ່າງກາຍຂອງລາວ ໄວຣັສໄດ້ເພີ່ມຈຳນວນທະວີຄູນໂດຍໄຮ້ການຄວບຄຸມ ແລະ ມັນອາດຈະແພ່ກະຈາຍໄປລະບົບອະໄວຍະວະຕ່າງໆ ເຊິ່ງເຮັດໃຫ້ເກີດການເຮັດວຽກຜິດປົກກະຕິ”.

ຈາກຂໍ້ມູນຂອງ CDC ພົບວ່າມີຜູ້ຕິດເຊື້ອພະຍາດໝາກສຸກລີງໃນອາເມລິກາທັງໝົດເກືອບ 22.000 ຄົນ ແລະ ພົບຫລາຍທີ່ສຸດຢູ່ລັດແຄລິຟໍເນຍ 4.300 ກວ່າຄົນ.

ຂະນະທີ່ທົ່ວໂລກພົບການລະບາດຂອງໝາກສຸກລີງເກືອບ 58.000 ຄົນ ແລະ ພົບຜູ້ເສຍຊີວິດຈາກໝາກສຸກລີງທີ່ຢືນຢັນແລ້ວ 18 ຄົນ ເຊິ່ງຍັງບໍ່ລວມຄົນຫລ້າສຸດທີ່ພົບໃນອາເມລິກາ ໂດຍທ່າອ່ຽງຂອງການລະບາດນັ້ນຫລຸດລົງ ແຕ່ຜູ້ຊ່ຽວຊານຊີ້ວ່າຍັງບໍ່ຄວນວາງໃຈ.

ອ້າງອີງ:

https://edition.cnn.com/2022/09/12/health/california-monkeypox-death/index.html