ທ່ານ ຮຸນເຊນ ຊີ້ ອາຊຽນຕ້ອງຮ່ວມກັນສະໜັບສະໜູນ ສັນຕິພາບ ສະຖຽນລະພາບ ຄວາມຮຸ່ງເຮືອງໃນພາກພື້ນ

ຜູ້ນຳກຳປູເຈຍຮຽກຮ້ອງສະມາຊິກອາຊຽນເພີ່ມຄວາມເປັນເອກະພາບ ໃນການຮັບມືຄວາມທ້າທາຍສຳຄັນຫລາຍປະການ ເພື່ອຄຸ້ມຄອງສັນຕິພາບ, ສະຖຽນລະພາບ ແລະ ຄວາມຈະເລີນຮຸ່ງເຮືອງຂອງພາກພື້ນ.

ວັນທີ 12 ກັນຍາ 2022, ສຳນັກຂ່າວຊິນຮົວລາຍງານວ່າ: ທ່ານ ຮຸນເຊນ ນາຍົກລັດຖະມົນຕີກຳປູເຈຍ ໃນຖານະປະທານສະມາຄົມປະຊາຊາດແຫ່ງອາຊີຕາເວັນອອກສຽງໃຕ້ (ອາຊຽນ) ປະຈຳປີນີ້ ຖະແຫລງໃນພິທີເປີດກອງປະຊຸມການເປັນຜູ້ນຳ ແລະ ການເປັນຫຸ້ນສ່ວນອາຊຽນ ຢູ່ນະຄອນຫລວງພະນົມເປັນ ໃນວັນທີ 12 ກັນຍາວ່າ: ໃນຂະນະທີ່ການແຂ່ງຂັນທາງພູມສາດກຳລັງຮ້ອນແຮງ ອາຊຽນຕ້ອງເປັນແບບຢ່າງ ແລະ ເຮັດວຽກຮ່ວມກັນເພື່ອສັນຕິພາບ, ສະຖຽນລະພາບ ແລະ ຄວາມຈະເລີນຮຸ່ງເຮືອງໃນພາກພື້ນ ດ້ວຍການສົ່ງເສີມຄວາມສາມັກຄີ ແລະ ການເປັນສູນກາງຂອງອາຊຽນ ຕະຫລອດຈົນຍຶດໝັ້ນການເປັນຫຸ້ນສ່ວນ ແລະ ກົນໄກພະຫຸພາຄີຢ່າງເຂັ້ມງວດ.

ນອກຈາກນັ້ນ, ອາຊຽນຕ້ອງມີບົດບາດເປັນສູນກາງ ແລະ ເປັນພື້ນທີ່ ສຳລັບການເຈລະຈາ ແລະ ການຮ່ວມມື. ພ້ອມທັງສົ່ງເສີມໂຄງສ້າງລະດັບພາກພື້ນທີ່ເປີດກວ້າງ, ໂປ່ງໃສ, ຄວບຄຸມ ແລະ ເປັນໄປຕາມກົດເກນ.

ທ່ານ ຮຸນເຊນ ກ່າວວ່າ: ກຳປູເຈຍໃນຖານະປະທານອາຊຽນ ໄດ້ປະຕິບັດໜ້າທີ່ຢ່າງແຂງແຮງ ເພື່ອຂະຫຍາຍ ແລະ ເສີມສ້າງການຮ່ວມມື ແລະ ການເປັນຫຸ້ນສ່ວນຂອງອາຊຽນ ໃນຫລາກຫລາຍດ້ານ ແລະ ຮູບແບບ ເຊິ່ງຄວບຄຸມທຸກມິຕິທີ່ກ່ຽວຂ້ອງກັບສັງຄົມ, ເສດຖະກິດ, ການຄ້າ ແລະ ການລົງທຶນກັບກຸ່ມມິດປະເທດ, ຫຸ້ນສ່ວນການພັດທະນາ ແລະ ປະຊາຄົມສາກົນ.

ໃນອີກດ້ານໜຶ່ງ, ທ່ານ ເຮັງ ສຳຣິນ ປະທານລັດຖະສະພາຂອງກຳປູເຈຍ ຢ້ຽມຢາມຫວຽດນາມ ແລະ ລາວຢ່າງເປັນທາງການ ໃນອາທິດນີ້ ເພື່ອສົ່ງເສີມຄວາມແຂງແຮງ ແລະ ຂະຫຍາຍມິດຕະພາບ ຕະຫລອດຈົນການຮ່ວມມືລະຫວ່າງກຳປູເຈຍກັບຫວຽດນາມ ລວມທັງລະຫວ່າງກຳປູເຈຍກັບລາວ ໂດຍຢູ່ນະຄອນຫລວງຮ່າໂນ້ຍ, ທ່ານ ເຮງ ສຳຣິນ ເຂົ້າຢ້ຽມຢາມທ່ານ ຫງວຽນ ຝູ ຈ໋ອງ ເລຂາທິການພັກກອມມູນິດຫວຽດນາມ, ປະທານປະເທດ ຫງວຽນ ຊວນ ຟຸກ ແລະ ນາຍົກລັດຖະມົນຕີ ຝ່າມ ມິງ ຈິງ.

ສ່ວນຢູ່ນະຄອນຫລວງວຽງຈັນ, ທ່ານ ເຮັງ ສຳຣິນ ເຂົ້າຢ້ຽມຢາມທ່ານ ທອງລຸນ ສີສຸລິດ ປະທານປະເທດລາວ ແລະ ທ່ານ ພັນຄຳ ວິພາວັນ ນາຍົກລັດຖະມົນຕີລາວ.