ບໍລິສັດຢາສູບໄຟຟ້າຍີ່ຫໍ້ດັງ ຍອມຈ່າຍເງິນຊົດເຊີຍ 17,000 ລ້ານບາດ ໃນຂໍ້ຫາເຮັດການຕະຫລາດມຸ່ງເນັ້ນໄປທີ່ເດັກນ້ອຍ ແລະ ເຍົາວະຊົນ
ໃນວັນທີ 11 ກັນຍາ 2022 ຮອງສາດສະດາຈານ ດຣ ເຣິງລະດີ ປະທານວານິດ ອາຈານພາກວິຊາການແພດຊຸມຊົນ ຄະນະແພດສາດ ໂຮງໝໍ ຣາມາທິບໍດີ ເປີດເຜີຍວ່າ: ໄອຍາການສູງສຸດຄອນເນດທິຄັດ ສະຫະລັດອາເມຣິກາ ໄດ້ອອກປະກາດໃນວັນທີ 6 ກັນຍາ ທີ່ຜ່ານມາວ່າ: ບໍລິລິສັດຢາສູບໄຟຟ້າຍີ່ຫໍ້ດັງ ຍອມຈ່າຍເງິນຊົດເຊີຍໃຫ້ 33 ລັດ ໃນສະຫະລັດອາເມຣິກາ ເປັນເງິນສູງເຖິງ 438.5 ລ້ານໂດລາ ຫລື 15,000 ລ້ານບາດ ໃນຂໍ້ຫາເຮັດການຕະຫລາດມຸ່ງເນັ້ນໄປທີ່ເດັກນ້ອຍ ແລະ ເຍົາວະຊົນ ແຖມ ຫລອກລວງວ່າເປັນຢາສູບໄຟຟ້າເປັນທາງເລືອກທີ່ປອດໄພກວ່າ ໂດຍກ່ອນໜ້ານີ້ບໍລິສັດຢາສູບໄຟຟ້າ ຕ້ອງຈ່າຍເງິນ 40 ລ້ານໂດລາ ໃຫ້ກັບ ລັດ ນອສແຄໂຣໄລນາ ໃນຂໍ້ຫາດຽວກັນ ເຊິ່ງລວມແລ້ວບໍລິສັດຢາສູບໄຟຟ້າ ຈ່າຍເງິນເພື່ອຍອມຄວາມໄປແລ້ວ 17,000 ລ້ານບາດ.
ນອກນີ້ ສາດສະດາຈານ ສຸວັນນາ ເຮືອງການຈະນະເສດ ຮອງຜູ້ອຳນວຍການ ສູນວິໄຈ ແລະ ຈັດການຄວາມຮູ້ເພື່ອການຄວບຄຸມຢາສູບ ຄະນະແພດສາດ ໂຮງໝໍ ຣາມາທິບໍດີ ກ່າວວ່າ: ເລື່ອງນີ້ເຮັດໃຫ້ເຫັນໄດ້ຊັດເຈນວ່າເປົ້າໝາຍຂອງບໍລິສັດຢາສູບໄຟຟ້າຄືກຸ່ມເດັກນ້ອຍ ແລະ ເຍົາວະຊົນ ການລະບາດຂອງຢາສູບໄຟຟ້າໃນກຸ່ມຄົນເຫລົ່ານີ້ບໍ່ໄດ້ເກີດຂຶ້ນໃນແຕ່ສະຫະລັດເທົ່ານັ້ນ ລ່າສຸດໃນອັງກິດ ໂດຍລະບົບບໍລິການສຸຂະພາບແຫ່ງຊາດຂອງອັງກິດ ຫລື NHS ໄດ້ມີການເຜີຍແຜ່ ຜົນສຳຫລວດພຶດຕິກຳການສູບຢາ, ດື່ມເຫລົ້າ, ແລະ ສານເສບຕິດຂອງເດັກນ້ອຍໃນອັງກິດ ອາຍຸ 11-15ປີ ປີ 2021 ອັດຕາການສູບຢາໄຟຟ້າເພີ່ມເປັນ 9% ຈາກ 6% ໃນປີ 2018 ທີ່ຜ່ານມາ.
