ສະໝອງເຮັດວຽກຝືດ 5 ວິທີນີ້ຊ່ວຍທ່ານໄດ້.

ຫາກທ່ານມີບັນຫາເລື່ອງການຄິດວຽກບໍ່ອອກ, ສະໝອງບໍ່ແລ່ນ ຫລາຍຄົນຄົງຮູ້ສຶກອຶດອັດ ແລະ ເບື່ອຄວາມຄິດບໍ່ອອກທີ່ເກີດຂຶ້ນ ຈົນສຸດທ້າຍວຽກກໍໄປບໍ່ຮອດໃສ ເກີດຄວາມຮູ້ສຶກກັງວົນຂຶ້ນມາອີກ. ມື້ນີ້ພວກເຮົາມີເຄັດລັບດີໆທີ່ຈະມາແນະນຳເພື່ອໃຫ້ສະໝອງກັບມາປອດໂປ່ງອີກຄັ້ງ.

• ຢູ່ຫ່າງຈາກວຽກຈັກໄລຍະໜຶ່ງ ຫາກຄິດວຽກບໍ່ໄດ້ ຫລື ຄິດບໍ່ອອກ ແນະນຳໃຫ້ຢຸດເຮັດວຽກ ລອງປ່ອຍສະໝອງໃຫ້ວ່າງ ຫລື ໄປຍ່າງຫລິ້ນ ໃຫ້ເວລາຕົນເອງໄດ້ເຮັດສິ່ງທີ່ໄຮ້ສາລະຈັກໄລຍະ ຖືເປັນການພັກຜ່ອນສະໝອງໄປໃນໂຕ.
• ຍືດເສັ້ນຍືດເອັນ ຜ່ອນຄາຍຄວາມເຄັ່ງຕຶງຂອງກ້າມຊີ້ນກ້ານຄໍ ໂດຍໃຊ້ວິທີເງີຍໜ້າ, ເງີຍໜ້າຂຶ້ນເອນໄປທາງຫລັງຄ້າງໄວ້ ໃຊ້ມືນວດກ້າມຊີ້ນກ້ານຄໍ ຈະຮູ້ສຶກຫົວໂລ່ງຂຶ້ນ ແລະ ສະໝອງກໍຈະປອດໂປ່ງຂຶ້ນ.
• ນອນຫລັບຈັກໜ້ອຍ ການນອນເວັນເຮັດໃຫ້ເຮົາຮູ້ສຶກຄືໄດ້ເລີ່ມຕົ້ນມື້ໃໝ່ອີກຄັ້ງ ຈະເຮັດໃຫ້ເຮົາເຮັດວຽກໄດ້ຄ່ອງແຄ້ວຄືກັບຕອນເຊົ້າໆ, ການເຊືອບຫລັບປະມານ 15 ນາທີ ຫລັງກິນເຂົ້າສວາຍ ກໍຖືວ່າເປັນການພັກຜ່ອນສະໝອງທີ່ດີແລ້ວ ແລະ ຍັງເປັນການບຳບັດອາການສະໝອງອ່ອນເພຍໄດ້ນຳ.
• ອອກໄປຕາກລົມ, ແສງແດດ, ການປ່ຽນບັນຍາກາດໄປໃນໂຕຈະຊ່ວຍເຮັດໃຫ້ບໍ່ຮູ້ສຶກເບື່ອໜ່າຍ ທັງຍັງຊ່ວຍກະຕຸ້ນການໄຫລວຽນຂອງເລືອດ ເຮັດໃຫ້ເລືອດໄຫລໄປລ້ຽງສະໝອງໄດ້ດີ ແລະ ສະໝອງກໍຮູ້ສຶກສົດຊື່ນໄປນຳ.
• ດື່ມນຳ້ຫລາຍໆ ເນື່ອງຈາກນຳ້ເປັນສ່ວນປະກອບສຳຄັນຂອງຮ່າງກາຍ ໂດຍການດື່ມນຳ້ຈະຊ່ວຍເພີ່ມອົກຊີແຊນໃຫ້ເລືອດ ແລະ ສະໝອງ ການທີ່ຮ່າງກາຍໄດ້ຮັບນຳ້ຢ່າງພຽງພໍ ຈະເຮັດໃຫ້ຮ່າງກາຍຮູ້ສຶກຕື່ນໂຕ ເຮັດໃຫ້ເລືອດໄຫລວຽນໄດ້ດີຂຶ້ນ ສະໝອງຈຶ່ງຮູ້ສຶກສົດຊື່ນ.
• ເວລາຄິດວຽກບໍ່ອອກ ຢ່າໝົກໝຸ້ນ, ເວລາສະໝອງຕັນ ກໍຕ້ອງພະຍາຍາມເຮັດໃຫ້ສະໝອງໂລ່ງ ເຊິ່ງເຄັດລັບງ່າຍໆເຫລົ່ານີ້ບັນດາທ່ານສາມາດເອົາໄປປັບໃຊ້ກັບຊີວິດປະຈຳວັນໄດ້ ເພື່ອຊ່ວຍໃຫ້ສະໝອງກັບມາເຮັດວຽກໄດ້ດີອີກຄັ້ງ.