UN ຮຽກຮ້ອງທົ່ວໂລກຊ່ວຍປາກິດສະຖານເລື່ອງນ້ຳຖ້ວມໃຫຍ່

ທ່ານ ອັນໂຕນິໂອ ກູເຕີເຣສ ເລຂາທິການໃຫຍ່ອົງການສະຫະປະຊາຊາດ ຫລື UN ຮຽກຮ້ອງທົ່ວໂລກໃຫ້ເລັ່ງຊ່ວຍເຫລືອເຫດນ້ຳຖ້ວມຄັ້ງໃຫຍ່ໃນປາກິດສະຖານ ໃນລະຫວ່າງທີ່ທ່ານປະຕິບັດພາລະກິດຢ້ຽມຢາມປາກິດສະຖານເປັນເວລາ 2 ວັນ ເພື່ອສະໜັບສະໜູນການຊ່ວຍເຫລືອຈາກໄພພິບັດນ້ຳຖ້ວມຮຸນແຮງທີ່ເຮັດໃຫ້ມີຜູ້ເສຍຊີວິດຫລາຍກວ່າ 1.391 ຄົນ.

ທ່ານ ກູເຕີເຣສ ກ່າວໃນຂະນະເດີນທາງເຖິງປາກິດສະຖານໃນວັນທີ 9 ກັນຍາວ່າ: ທ່ານຂໍຮຽກຮ້ອງໃຫ້ປະຊາຄົມໂລກເລັ່ງສົ່ງການຊ່ວຍເຫລືອມາໃຫ້ປາກິດສະຖານ ເນື່ອງຈາກໄພພິບັດນ້ຳຖ້ວມໃນຄັ້ງນີ້ເປັນຜົນມາຈາກບັນຫາການປ່ຽນແປງສະພາບອາກາດ. ຂະນະທີ່ນາງ ມາຣີຢຳ ອໍຣັງເຊບ ລັດຖະມົນຕີກະຊວງຂໍ້ມູນຂ່າວສານຂອງປາກິດສະຖານ ກ່າວວ່າ: ການເດີນທາງຢ້ຽມຢາມປາກິດສະຖານຂອງທ່ານ ກູເຕີເຣສ ຈະເຮັດໃຫ້ທົ່ວໂລກຮູ້ເຖິງຄວາມເສຍຫາຍຮຸນແຮງໃນປາກິດສະຖານທີ່ເກີດຈາກນ້ຳຖ້ວມຄັ້ງໃຫຍ່. ທັງນີ້ ທ່ານ ກູເຕີເຣສ ມີກຳນົດພົບປະກັບນາຍົກລັດຖະມົນຕີ ເຊບາຊ ຊາຣີຟ ຂອງປາກິດສະຖານ ແລະ ຈະເດີນທາງໄປກວດຢ້ຽມພື້ນທີ່ປະສົບໄພນ້ຳຖ້ວມ. ກ່ອນໜ້ານີ້ UN ໄດ້ປະກາດມອບເງິນຊ່ວຍເຫລືອປາກິດສະຖານ 160 ລ້ານໂດລາສະຫະລັດ ເພື່ອຟື້ນຟູໄພພິບັດນ້ຳຖ້ວມ, ແຕ່ລັດຖະບານປາກິດສະຖານປະເມີນໃນເບື້ອງຕົ້ນວ່າ: ເຫດນ້ຳຖ້ວມເຮັດໃຫ້ເກີດຄວາມເສຍຫາຍມູນຄ່າປະມານ 10.000 ລ້ານໂດລາສະຫະລັດ.

ສຳນັກຂ່າວຣອຍເຕີລາຍງານວ່າ: ເຫດຝົນຕົກໜັກ ແລະ ທານນ້ຳກ້ອນລະລາຍໃນພູເຂົາທາງຕອນເໜືອເຮັດໃຫ້ປາກິດສະຖານຜະເຊີນນ້ຳຖ້ວມຄັ້ງໃຫຍ່ທີ່ທຳລາຍເຮືອນຊານ, ຖະໜົນ, ລາງລົດໄຟ ຂົວ, ໂຮງລ້ຽງສັດ ແລະ ເນື້ອທີ່ກະສິກຳເປັນຈຳນວນຫລາຍ ລວມທັງເຮັດໃຫ້ມີຜູ້ເສຍຊີວິດຫລາຍກວ່າ 1.391 ຄົນ. ຂະນະທີ່ຂໍ້ມູນຂອງລັດຖະບານປາກິດສະຖານລະບຸວ່າ: ມີປະຊາຊົນເກືອບ 33 ລ້ານຄົນຈາກທັງໝົດ 225 ລ້ານຄົນທີ່ໄດ້ຮັບຄວາມເດືອດຮ້ອນຈາກເຫດນ້ຳຖ້ວມ, ສ່ວນອົງການອະນາໄມໂລກລະບຸວ່າ: ມີຊາວປາກິດສະຖານ 6,4 ລ້ານກວ່າຄົນທີ່ຕ້ອງການການຊ່ວຍເຫລືອດ້ານມະນຸດສະທຳຢ່າງຮີບດ່ວນ.