ລ້ຽງສົ່ງນັກສຶກສາລາວທີ່ໄດ້ຮັບທຶນການສຶກສາທີ່ປະເທດຍີ່ປຸ່ນ

ໃນທ້າຍອາທິດຜ່ານມານີ້, ທ່ານ ເອກອັກຄະຣາຊະທູດຍີ່ປຸ່ນ ປະຈໍາລາວ ໄດ້ຈັດພິທີລ້ຽງສົ່ງນັກສຶກສາລາວ ທີ່ຈະໄປສຶກສາຕໍ່ທີ່ປະເທດຍີ່ປຸ່ນ ພາຍໃຕ້ທຶນການສຶກສາ ຂອງໂຄງການດ້ານການພັດທະນາຊັບພະຍາກອນມະນຸດ (JDS) ແລະ ໂຄງການຜູ້ນໍາໄວໜຸ່ມ (YLP) ຂອງລັດໂະບານຍີ່ປຸ່ນ ມີທ່ານຮອງປະທານກໍາມາທິການຕ່າງປະເທດ, ມີຫົວໜ້າຫ້ອງການໄຈກາ ປະຈໍາລາວ ແລະ ອະດີດນັກສຶກສາຈາກບັນດາມະວິທະຍາໄລຍີ່ປຸ່ນ ເຂົ້າຮ່ວມເປັນຈໍານວນຫຼາຍ.

ສໍາລັບທຶນການສຶກສາດ້ານການພັດທະນາຊັບພະຍາກອນມະນຸດ ແມ່ນທຶນຊ່ວຍເຫຼືອລ້າ ທີ່ສະໜອງໃຫ້ພະນັກງານລັດຖະກອນລາວໄປສຶກສາລະດັບປະລິນຍາໂທ ໄລຍະ 2 ປີ ຢູ່ມະຫາວິທະຍາໄລຍີ່ປຸ່ນ ເພື່ອປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຂອງລາວ. ໂຄງການນີ້ເລີ່ມແຕ່ປີ 1999 ເປັນຕົ້ນມາ ແລະ ມີນັກສຶກສາລາວຫຼາຍກວ່າ 350 ຄົນ ທີ່ໄດ້ຮັບທຶນການສຶກສາດັ່ງກ່າວ ແລະ ໂຄງການຜູ້ນໍາໄວໜຸ່ມ ເພື່ອສົ່ງເສີມຄວາມເປັນຜູ້ນໍາໃນອະນາຄົນໃຫ້ແກ່ພະນັກງານລັດຖະກອນໄວໜຸ່ມ. ໂດຍນັບແຕ່ປີ 2001 ເປັນຕົ້ນມາ ມີລັດຖະກອນຫຼາຍກວ່າ 50 ຄົນທີ່ໄດ້ຮັບທຶນການສຶກສານີ້ ເພື່ອສຶກສາຕໍ່ໃນລະດັບປະລິນຍາໂທ ໄລຍະ 1 ປີ ໃນ 5 ຂະແໜງການຄື: ນະໂຍບາຍລັດ, ນະໂຍບາຍລັດທ້ອງຖິ່ນ, ບໍລິຫານທຸລະກິດ, ກົດໝາຍ ແລະ ບໍລິຫານສາທາລະນະສຸກ.