ປາກິດສະຖານຜະເຊີນພະຍາດລະບາດໜັກ ຫລັງເກີດນ້ຳຖ້ວມໃຫຍ່

ວັນທີ 6 ກັນຍາ 2022, ສຳນັກຂ່າວຕ່າງປະເທດລາຍງານວ່າ: ໜ່ວຍງານແກ້ໄຂພະຍາດລະບາດແຫ່ງຊາດຂອງປາກິດສະຖານ ເປີດເຜີຍວ່າ: ປັດຈຸບັນ ປາກິດສະຖານກຳລັງຜະເຊີນສະຖານະການການແພ່ລະບາດຂອງພະຍາດຕ່າງໆ ເຊິ່ງມີສາເຫດມາຈາກນ້ຳຖ້ວມເຊັ່ນ: ພະຍາດຖອກທ້ອງ, ການຕິດເຊື້ອທາງຜິວໜັງ ລວມທັງຜື່ນ ແລະ ເຊື້ອລາ ເຊິ່ງເຮັດໃຫ້ມີຜູ້ປ່ວຍຈາກພະຍາດດັ່ງກ່າວແລ້ວ 10.000 ກວ່າຄົນ ພາຍຫລັງຫລາຍພື້ນທີ່ທົ່ວປະເທດກຳລັງຜະເຊີນສະຖານະການນ້ຳຖ້ວມໜັກມາເປັນໄລຍະເວລາ 2 ເດືອນກວ່າ.

ຂະນະທີ່ ຈຳນວນຜູ້ເສຍຊີວິດເພີ່ມຂຶ້ນເປັນຫລາຍກວ່າ 1.325 ຄົນ. ນອກຈາກນີ້ ປະເທດຍັງຕ້ອງການການຊ່ວຍເຫລືອຈາກນາໆຊາດເຊັ່ນ: ເຕັ້ນ, ອາຫານ, ຢາ ແລະ ນ້ຳດື່ມສະອາດເປັນຈຳນວນຫລາຍ.

ທັງນີ້, ທາງການປາກິດສະຖານລະບຸວ່າ: ກຽມຕິດຕັ້ງຄ້າຍທາງການແພດໃນພື້ນທີ່ປະສົບໄພຢ່າງຮຸນແຮງ 1.200 ກວ່າແຫ່ງ ເພື່ອໃຫ້ການຊ່ວຍເຫລືອປະຊາຊົນທີ່ໄດ້ຮັບຜົນກະທົບຈາກນ້ຳຖ້ວມໃນຄັ້ງນີ້ ໂດຍບໍ່ຄິດຄ່າໃຊ້ຈ່າຍແຕ່ຢ່າງໃດ.