ຍອດເງິນບໍລິຈາກຊ່ວຍຈົວນ້ອຍ 2 ອົງຖືກລົດຕຳ ເບື້ອງຕົ້ນ 20 ລ້ານກີບ ຫັກເຂົ້າວັດ 10 ລ້ານ ຮອດມືຈົວນ້ອຍອົງລະ 3 ລ້ານກີບ

ຈາກເຫດການລົດໃຫຍ່ຕຳຈົວນ້ອຍ 2 ອົງຢູ່ ເມືອງໂພນໂຮງ ແຂວງວຽງຈັນ ວັນທີ 1 ກັນຍາ 2022 ເຮັດໃຫ້ຈົວນ້ອຍທັງສອງອົງໄດ້ຮັບບາດເຈັບໜັກ ເຊິ່ງປັດຈຸບັນຍັງປິ່ນປົວຢູ່ໂຮງໝໍ, ອາການອົງໜຶ່ງໄດ້ຮັບຜົນກະທົບທີ່ຫົວ ຍັງສັນເຂົ້າບໍ່ໄດ້ດີ ແລະ ອີກອົງໜຶ່ງບາດເຈັບທີ່ຂາ (ຂາຫັກ) ສັນເຂົ້າໄດ້ປົກກະຕິ.

ພາຍຫລັງເກີດເຫດ ໄດ້ມີເພຈຊື່ວ່າ “ວັດບ້ານແຈ້ງສະຫວ່າງ” (ວັດດັ່ງກ່າວບໍ່ແມ່ນວັດສັງກັດຂອງຈົວນ້ອຍທັງ 2 ອົງ ແຕ່ເປັນວັດບ້ານໃກ້ຄຽງ) ໄດ້ເປີດຮັບບໍລິຈາກ ຜ່ານເລກບັນຊີເຈົ້າອະທິການວັດບ້ານແຈ້ງສະຫວ່າງ ເຊິ່ງສັງຄົມສົນໃຈໃຫ້ການຊ່ວຍໂດຍການສົມທົບເງິນຈຳນວນຫລາຍຮ້ອຍຄົນ (ແມ່ຈົວນ້ອຍສອງອົງບໍ່ຮູ້ເລື່ອງການເປີດຮັບບໍລິຈາກ).

ຮອດວັນທີ 2 ກັນຍາ 2022 ທາງວັດບ້ານແຈ້ງສະຫວ່າງ ໄດ້ແຈ້ງຍອດລວມທີ່ໄດ້ຮັບບໍລິຈາກເບື້ອງຕົ້ນ ຕໍ່ຄອບຄົວຈົວນ້ອຍທັງ 2 ອົງວ່າ: ໄດ້ຮັບເງິນບໍລິຈາກຈາກສັງຄົມເຂົ້າບັນຊີ ເບື້ອງຕົ້ນຈຳນວນ 20.000.000 ກີບ ແລ້ວນຳໄປມອບໃຫ້ວັດບ້ານໂພນແລ (ວັດສັງກັດຂອງຈົວນ້ອຍທັງ 2 ອົງ) ຈຳນວນ 10.000.000 ເພື່ອຈະເອົາໄປຖວາຍເປັນຄ່າປິ່ນປົວ, ສ່ວນອີກ 10.000.000 ກີບ ທາງວັດແຈ້ງສະຫວ່າງໄດ້ຫັກໄວ້ ບໍ່ໄດ້ລະບຸຈຸດປະສົງ ແລະ ປັດຈຸບັນໄດ້ປິດຮັບບໍລິຈາກແລ້ວ ແຕ່ຍອດບໍລິຈາກທັງໝົດທາງວັດຍັງບໍ່ທັນສະຫລຸບແຈ້ງສູ່ສັງຄົມ (ໂພສຮັບບໍລິຈາກຖືກລຶບແລ້ວ).

ເຈົ້າອາວາດວັດໂພນແລ ໃຫ້ຂໍ້ມູນກັບທີມຂ່າວໜັງສືພິມລາວພັດທະນາວ່າ: ເບື້ອງຕົ້ນວັດບ້ານໂພນແລໄດ້ນຳເອົາເງິນທີ່ໄດ້ຮັບຈາກວັດບ້ານແຈ້ງສະຫວ່າງ ນຳມາມອບໃຫ້ຈົວນ້ອຍ ໃນວັນທີ 3 ກັນຍາ 2022 ຈຳນວນ 6.000.000 ກີບ (ຖືກອົງລະ 3.000.000 ກີບ) ສ່ວນຍັງອີກ 4 ລ້ານແມ່ນຈະມອບໃຫ້ຈົວນ້ອຍພາຍຫລັງອອກຈາກໂຮງໝໍ.

ເຖິງຢ່າງໃດກໍຕາມ ແມ່ຈົວນ້ອຍທັງ 2 ອົງໄດ້ຝາກຂອບໃຈສັງຄົມທີ່ໄດ້ໃຫ້ການຊ່ວຍເຫລືອ ໃນຄັ້ງນີ້ດ້ວຍ.