NASA ກຳນົດວັນປ່ອຍຈະຫລວດໃນພາລະກິດ Artemis I ອີກ ເປັນວັນທີ 3 ກັນຍານີ້
NASA ປະກາດກຳນົດເວລາປ່ອຍຈະຫລວດ Space Launch System (SLS) ໃນພາລະກິດ Artemis I ເປັນວັນທີ 3 ກັນຍານີ້ ຫລັງຈາກຕ້ອງເລື່ອນອອກໄປຈາກວັນທີ 29 ສິງຫາຜ່ານມາ ເນື່ອງຈາກເກີດບັນຫາກ່ຽວກັບອຸນຫະພູມເຄື່ອງຈັກ.
ອົງການບໍລິຫານການບິນ ແລະ ອະວະກາດແຫ່ງຊາດອາເມລິກາ ຫລື NASA ປະກາດກຳນົດການໃໝ່ດັ່ງກ່າວໃນເວັບໄຊ ເຊິ່ງຖ້າທຸກຢ່າງເປັນໄປຕາມແຜນ ພາລະກິດປ່ອຍຈະຫລວດ SLS ຈະເລີ່ມຂຶ້ນໃນເວລາ 14:17 ໂມງ ຂອງວັນທີ 3 ກັນຍາ ຕາມເວລາທ້ອງຖິ່ນ ຫລື ເວລາ 1:17 ໂມງ ວັນທີ 4 ກັນຍາ ຕາມເວລາປະເທດລາວ.
ການປະກາດກຳນົດເວລາໃໝ່ດັ່ງກ່າວມີຂຶ້ນຫລັງຈາກກຳນົດການປ່ອຍຈະຫລວດເກົ່າໃນວັນທີ 29 ສິງຫາ ໄດ້ຖືກຍົກເລີກ ຫລັງມີການກວດພົບບັນຫາອຸນຫະພູມຂອງເຄື່ອງຈັກໂຕທີ 3 ຈາກເຄື່ອງຈັກທັງໝົດ 4 ໂຕ ບໍ່ຢູ່ໃນລະດັບທີ່ເໝາະສົມ ແລະ ຄາດວ່າຈະບໍ່ສາມາດແກ້ໄຂໄດ້ທັນເວລາ.
ຫລັງຈາກຄວາມພະຍາຍາມໃນການປ່ອຍຈະຫລວດ SLS ບໍ່ປະສົບຜົນສຳເລັດ ທີມວິສະວະກອນຂອງ NASA ໄດ້ປະຊຸມທົບທວນເພື່ອວາງແຜນ ແລະ ຫາທາງແກ້ໄຂບັນຫາ ໂດຍຈະມີການປະເມີນຕໍ່ໄປຢ່າງຕໍ່ເນື່ອງໃນໄລຍະເວລາ 2-3 ວັນຕໍ່ຈາກນີ້ ເຊິ່ງຄາດວ່າຈະສາມາດພັດທະນາວິທີແກ້ໄຂບັນຫາທີ່ເກີດຂຶ້ນໄດ້ກ່ອນຮອດກຳນົດໃໝ່.
ກ່ອນໜ້ານີ້, NASA ໄດ້ກຳນົດແຜນສຳຮອງສຳລັບການປ່ອຍຈະຫລວດໃນພາລະກິດ Artemis I ໃນກໍລະນີເກີດຂໍ້ຜິດພາດໄວ້ວ່າຈະຢູ່ໃນໄລຍະວັນທີ 2-5 ກັນຍາ, ແຕ່ຖ້າຍັງບໍ່ສາມາດດຳເນີນໄດ້ຈະເລື່ອນອອກໄປເປັນວັນທີ 20 ກັນຍາ – 4 ຕຸລາ ຫລື 17-31 ຕຸລາ ໂດຍພິຈາລະນາຈາກຕຳແໜ່ງຂອງດວງຈັນໃຫ້ເໝາະສົມກັບການປ່ອຍຈະຫລວດໃນໄລຍະເວລານັ້ນ ຄຽງຄູ່ກັບສະພາບແວດລ້ອມອື່ນໆ.
ສຳລັບໂຄງການ Artemis ນັ້ນເປັນແຜນການສຳຫລວດດວງຈັນໃນສະຕະວັດທີ 21 ທີ່ນຳໂດຍອາເມລິກາ ທີ່ມີເປົ້າໝາຍໃນການສົ່ງມະນຸດຂຶ້ນໄປສູ່ດວງຈັນອີກ ໂດຍໃນພາລະກິດທຳອິດ Artemis I ນັ້ນຈະເປັນການນຳເອົາຍານອະວະກາດທີ່ມີຊື່ວ່າ: Orion ຂຶ້ນໄປເພື່ອທົດລອງການຢູ່ໃນສະພາບແວດລ້ອມອະວະກາດ ໂດຍທີ່ຍັງບໍ່ສົ່ງມະນຸດຂຶ້ນໄປກັບຍານ ແລະ ຕັ້ງເປົ້າວ່າຈະໃຊ້ເວລາຢູ່ໃນອະວະກາດທັງໝົດ 42 ວັນ 3 ຊົ່ວໂມງ 20 ນາທີ ສຳລັບການເດີນທາງ 2,1 ລ້ານກິໂລແມັດ ກ່ອນຈະກັບສູ່ໂລກໃນວັນທີ 10 ຕຸລາ 2022.
