ຜູ້ຍິງຊາວຊາອຸດິດອາຣະບີ ຖືກຕັດສິນຕິດຄຸກ 45 ປີ ສາເຫດ “ໂພສຂໍ້ຄວາມລົງສື່ສັງຄົມອອນລາຍ”
ສານຊາອຸດິອາຣະບີຕັດສິນໂທດຕິດຄຸກຜູ້ຍິງຄົນໜຶ່ງ 45 ປີ ຂໍ້ຫາໂພສຂໍ້ຄວາມລົງສື່ສັງຄົມອອນລາຍ. ຖືເປັນຕົວຢ່າງຫລ້າສຸດຂອງການປາບປາມນັກເຄື່ອນໄຫວຜູ້ຍິງທີ່ເກີດຂຶ້ນ ພາຍຫລັງການມາຢ້ຽມຢາມຂອງປະທານາທິບໍດີ ໂຈ ໄບເດນ ຜູ້ນຳອາເມລິກາ ໃນເດືອນກັນຍາຜ່ານມາ.
ວັນທີ 31 ສິງຫາ 2022, ສຳນັກຂ່າວຣອຍເຕີລາຍງານວ່າ: ນາງ ໂນຣາ ບິນ ຊາອີດ ອັລ-ຄາຕານີ ຖືກຕັດສິນໂທດ “ເມື່ອປະມານອາທິດຜ່ານມາ” ໂດຍສານອາຍາຊຳນັນພິເສດຊາອຸດິອາຣະບີ ໃນຂໍ້ຫາ “ໃຊ້ງານອິນເຕີເນັດເພື່ອທຳລາຍໂຄງຂ່າຍສາຍໄຍຂອງສັງຄົມຊາອຸດິອາຣະບີ” ແລະ “ລະເມີດຫລັກຄວາມສະຫງົບຮຽບຮ້ອຍຂອງປະຊາຊົນໂດຍໃຊ້ສື່ສັງຄົມອອນລາຍ” ຕາມອົງການປະຊາທິປະໄຕເພື່ອໂລກອາຣັບປັດຈຸບັນ (ດອນ) ໃນນະຄອນຫລວງວໍຊິງຕັນ ກ່າວໃນຖະແຫລງການ.
ການຕັດສິນໂທດຂອງຄາຕານີ ເກີດຂຶ້ນພຽງບໍ່ເທົ່າໃດອາທິດຫລັງນາງ ຊັລມາ ອັລ-ເຊຮັບ ແມ່ລູກສອງ ແລະ ຜູ້ສະໝັກລະດັບປະລິນຍາເອກ ຢູ່ມະຫາວິທະຍາໄລລີດ ໃນອັງກິດ ຖືກຕັດສິນຕິດຄຸກ 35 ປີ ໃນຂໍ້ຫາຕິດຕາມ ແລະ ຣີທະວິດຂໍ້ຄວາມຂອງຜູ້ເຫັນຕ່າງ ແລະ ນັກເຄື່ອນໄຫວຫລາຍຄົນໃນແພກຟອມທະວິດເຕີ.
ທັງນີ້, ຄະດີຂອງນາງ ຄາຕານີ ແລະ ນາງ ເຊຮັບ ເປັນສິ່ງທີ່ເນັ້ນເຖິງການປາບປາມຜູ້ເຫັນຕ່າງທີ່ຂັບເຄື່ອນໂດຍເຈົ້າຊາຍໂມຮຳເໝັດ ບິນ ຊັລມານ ມົງກຸດລາຊະກຸມານແຫ່ງຊາອຸດິດອາຣະບີ ຜູ້ປົກຄອງໂດຍພຶດຕິໄນແຫ່ງຣາຊະອານາຈັກ ເຖິງວ່າພະອົງສະໜັບສະໜູນການປະຕິຮູບຕ່າງໆເຊັ່ນ: ການໃຫ້ຜູ້ຍິງຂັບເຄື່ອນ ແລະ ຊຸກຍູ້ໂຄງການຕ່າງໆເພື່ອສ້າງວຽກ.
ເຖິງຢ່າງໃດກໍຕາມ, ພີ່ນ້ອງຂອງນັກໂທດການເມືອງໃນຊາອຸດິດອາຣະບີຕ່າງຫວັງວ່າ: ການມາຢ້ຽມຢາມຂອງທ່ານ ໄບເດນ ຈະຊ່ວຍໃຫ້ເກີດການປ່ອຍຕົວບຸກຄົນຜູ້ເປັນທີ່ຮັກຂອງພວກເຂົາ ເຊິ່ງເປັນສ່ວນໜຶ່ງທີ່ຖືກຕິດຄຸກເພາະການປາບປາມໃນປະເທດ.
ເຖິງວ່າທ່ານ ອັບດຸລເລາະ ອັລ-ອາອຸດ ຜູ້ອຳນວຍການຝ່າຍວິໄຈເພື່ອພາກພື້ນອ່າວຈາກດອນ ຈະກ່າວວ່າ: ໃນກໍລະນີຂອງນາງ ເຊຮັບ ແລະ ນາງ ຄາຕານີ ທາງການຊາອຸດິດອາຣະບີໃຊ້ກົດໝາຍ “ຢ່າງເອົາລັດເອົາປຽບ” ເພື່ອມຸ້ງ ແລະ ລົງໂທດພົນລະເມືອງໃນປະເທດທີ່ວິພາກວິຈານລັດຖະບານໃນທະວິດເຕີ ແຕ່ເຈົ້າໜ້າທີ່ລັດຊາອຸດິດອາຣະບີ ກ່າວວ່າ: ຣາຊະອານາຈັກບໍ່ມີນັກໂທດການເມືອງ ແລະ ແນວຄິດທີ່ພວກເຂົາເຫລົ່ານັ້ນຖືກເບິ່ງວ່າເປັນນັກໂທດການເມືອງ ຄືເລື່ອງໄຮ້ສາລະ.
