UN ລະດົມທຶນສຸກເສີນ 160 ລ້ານໂດລາ ຊ່ວຍເຫຍື່ອນ້ຳຖ້ວມຢູ່ປາກິດສະຖານຫລາຍລ້ານຄົນ
ອົງການສະຫະປະຊາຊາດ (UN) ພ້ອມລັດຖະບານປາກິດສະຖານ ປະກາດລະດົມທຶນສະໜັບສະໜູນສຸກເສີນ ຈຳນວນ 160 ລ້ານໂດລາສະຫະລັດ ເພື່ອຊ່ວຍເຫລືອຜູ້ປະສົບໄພຈຳນວນຫລາຍລ້ານຄົນ ຈາກເຫດນ້ຳຖ້ວມຄັ້ງໃຫຍ່ໃນປາກິດສະຖານ ທີ່ຂ້າຊີວິດປະຊາຊົນແລ້ວ 1.160 ກວ່າຄົນ.
ໂດຍທ່ານ ອັນໂຕນິໂອ ກູເຕີເຣສ ເລຂາທິການອົງການສະຫະປະຊາຊາດ ໄດ້ສົ່ງຂໍ້ຄວາມຜ່ານວິດີໂອ ລະບຸເຖິງສະຖານະການນ້ຳຖ້ວມໃນປາກິດສະຖານ ເຊິ່ງເກີດຂຶ້ນຈາກມໍລະສຸມລະດູຝົນທີ່ຍາວນານຫລາຍອາທິດແບບບໍ່ເຄີຍປາກົດມີມາກ່ອນ ວ່າເປັນສັນຍານໃຫ້ທົ່ວໂລກຕ້ອງຍົກລະດັບການດຳເນີນງານເພື່ອຮັບມືສະພາບໂລກປ່ຽນແປງ ຫລື ການປ່ຽນແປງຂອງສະພາບອາກາດ.
ທ່ານ ກູເຕີເຣສ ມີກຳນົດຢ້ຽມຢາມປາກິດສະຖານໃນວັນທີ 9 ກັນຍານີ້ ແລະ ຈະເດີນທາງໄປພື້ນທີ່ທີ່ໄດ້ຮັບຜົນກະທົບຮຸນແຮງທີ່ສຸດຈາກເຫດນ້ຳຖ້ວມ ກ່ອນຈະໄປຢ້ຽມຢາມປະຊາຊົນທີ່ພັດຖິ່ນໃນຄ້າຍອາໄສ ແລະ ເບິ່ງການປະຕິບັດໜ້າທີ່ຂອງເຈົ້າໜ້າທີ່ UN ໃນການສະໜັບສະໜູນລັດຖະບານປາກິດສະຖານເພື່ອໃຫ້ການຊ່ວຍເຫລືອຜູ້ປະສົບໄພ.
ຈົນຮອດຕອນນີ້ມີປະຊາຊົນປາກິດສະຖານ 33 ລ້ານກວ່າຄົນ ຫລື 1 ໃນ 7 ຂອງປະຊາກອນທົ່ວປະເທດ 230 ລ້ານກວ່າຄົນ ທີ່ໄດ້ຮັບຜົນກະທົບຈາກໄພພິບັດນ້ຳຖ້ວມໃຫຍ່ຄັ້ງນີ້.
ນາຍົກລັດຖະມົນຕີ ເຊບາຊ ຊາຣີຟ ລະບຸວ່າ: ປາກິດສະຖານກຳລັງປະສົບອຸທົກກະໄພຄັ້ງໃຫຍ່ທີ່ສຸດໃນປະຫວັດສາດ ໂດຍທ່ານສັນຍາວ່າ: ເງິນທີ່ໄດ້ຮັບຈາກປະຊາຄົມສາກົນຈະຖືກໃຊ້ຢ່າງໂປ່ງໃສ ແລະ ຮັບປະກັນວ່າ: ການຊ່ວຍເຫລືອທັງໝົດຈະສົ່ງໄປຮອດປະຊາຊົນທີ່ປະສົບໄພ.
ອ້າງອີງ:
- https://apnews.com/article/floods-pakistan-asia-pacific-islamabad-ahsan-iqbal-4c583a47b071db01b75643ea0983b9c4
- https://news.un.org/en/story/2022/08/1125752
- https://www.unhcr.org/th/38837-unhcr-urges-immediate-support-for-millions-caught-in-pakistan-floods.html
