ໄຟໄໝ້ປ່າອາເມຊອນ ໃນ ບາຊິວ ຮ້າຍແຮງທີ່ສຸດໃນຮອບ 15 ປີ
ວັນທີ 26 ສິງຫາ 2022 ສຳນັກຂ່າວຕ່າງປະເທດລາຍງານສະຖານະການໄຟໄໝ້ປ່າຢູ່ເຂດອາເມຊອນ ປ່າອາເມຊອນເປັນປ່າໄມ້ຂະໜາດໃຫຍ່ໃນປະເທດບຣາຊິວ ທີ່ໄດ້ຂະໜານນາມວ່າເປັນ ປອດຂອງໂລກ ທີ່ກຳລັງຜະເຊີນກັບວິກິດການໄຟໄໝ້ປ່າທີ່ຮ້າຍແຮງທີ່ສຸດໃນຮອບ 15 ປີ, ເມື່ອວັນຈັນ 22 ສິງຫາ ທີ່ຜ່ານມາ ອົງການອາວະກາດ ແລະ ພູມສາດຂອງປະເທດບຣາຊິວ INPE ກ່າວວ່າ: ດາວທຽມໄດ້ກວດພົບໄຟໄໝ້ປ່າຫລາຍເຖິງ 3,358 ຈຸດ ໃນປ່າອາເມຊອນ ນັບເປັນສະຖິຕິທີ່ຫລາຍທີ່ສຸດໃນຮອບ 24 ຊົ່ວໂມງນັບຕັ້ງແຕ່ເດືອນກັນຍາ 2007.
ຜູ້ຊ່ຽວຊານກ່າວວ່າ ນອກຈາກພາວະໂລກຮ້ອນ ແລະ ການປ່ຽນແປງຂອງດິນຟ້າອາກາດ , ສາເຫດຕົ້ນຕໍຂອງໄຟໄໝ້ປ່າໃນ ອາເມຊອນມາຈາກການກະສິກໍາ ແລະ ການລ້ຽງສັດທີ່ຜິດກົດໝາຍ ການກະກຽມດິນປູກຝັງ ແລະ ຈູດໄຟເຜົາປ່າເຜົາຕົ້ນໄມ້ ໂດຍທົ່ວໄປແລ້ວ ເດືອນສິງຫາແມ່ນຖືວ່າເປັນລະດູການຂອງໄຟປ່າ ເນື່ອງຈາກສະພາບອາກາດຮ້ອນ ແລະ ແຫ້ງແລ້ງຫລາຍຂຶ້ນ.
INPE ໄດ້ກວດພົບໄຟປ່າ 5,373 ຈຸດໃນເດືອນກໍລະກົດ ເຊິ່ງເພີ່ມຂຶ້ນ 8% ຈາກເດືອນກໍລະກົດຂອງປີທີ່ຜ່ານມາ ແລະ ໃນເດືອນສິງຫາປີນີ້ INPE ໄດ້ກວດພົບໄຟໄໝ້ປ່າ 24,124 ຈຸດ ເຊິ່ງເປັນລະດູໄຟໄໝ້ປ່າທີ່ຮ້າຍແຮງທີ່ສຸດພາຍໃຕ້ການປົກຄອງຂອງປະທານາທິບໍດີ ມາອີ ໂບລໂຊນາຣູ ທີ່ໄດ້ເຂົ້າຮັບຕຳແໜ່ງເປັນຜູ້ນຳບຣາຊິວ ຕັ້ງແຕ່ເດືອນມັງກອນ 2019.
