ເອີຣົບປະເຊີນກັບໄພແຫ້ງແລ້ງຮ້າຍແຮງທີ່ສຸດໃນຮອບ 500 ປີ
ຂ່າວຕ່າງປະເທດລາຍງານ ເມື່ອວັນທີ 24 ສິງຫາທີ່ຜ່ານມານີ້, ໂດຍອີງຕາມບົດລາຍງານຂອງສຳນັກງານເຝົ້າລະວັງໄພແຫ້ງແລ້ງເອີຣົບ (EDO) ເປີດເຜີຍວ່າ ເອີຣົບກຳລັງປະເຊີນກັບໄພແຫ້ງແລ້ງຄັ້ງທີ່ຮ້າຍແຮງທີ່ສຸດໃນຮອບຢ່າງໜ້ອຍ 500 ປີ ໂດຍກວມອັດຕາສ່ວນ 2 ສ່ວນ 3 ຂອງທະວີບ ຢູ່ໃນສະ ຖານະແຈ້ງເຕືອນ ແລະ ສະຖານະເຕືອນໄພສົ່ງຜົນໃຫ້ມີການຫຼຸດການຂົນສົ່ງພາຍໃນປະເທດ, ການຜະລິດໄຟຟ້າ ແລະ ຜົນຜະລິດຂອງພືດບາງຊະນິດ.
ໂດຍອີງຕາມບົດລາຍງານໃນເດືອນສິງຫາຂອງ EDO ຊຶ່ງເປັນໜ່ວຍງານທີ່ຄວບຄຸມໂດຍຄະນະ ກຳມາທິການເອີຣົບ (EC) ລະບຸວ່າ ພື້ນທີ່ 47% ຂອງເອີຣົບຢູ່ພາຍໃຕ້ສະຖານະການເຕືອນໄພ ເນື່ອງ ຈາກການຂາດຄວາມຊຸ່ມຂອງດິນຢ່າງແນ່ນອນສ່ວນພື້ນທີ່ອີກ 17% ພາຍໃຕ້ສະຖານະການແຈ້ງເຕືອນໄດ້ຮັບຜົນກະທົບທາງການກະເສດ. ບົດລາຍງານລະບຸຕື່ມວ່າ ໄພແຫ້ງແລ້ງທີ່ສົ່ງຜົນກະທົບຕໍ່ຫຼາຍພາກພື້ນຂອງເອີຣົບຕັ້ງແຕ່ໄລຍະຕົ້ນປີທີ່ຜ່ານມາ ຂະຫຍາຍວົງກວ້າງ ແລະ ຮ້າຍແຮງຫຼາຍຂຶ້ນເມື່ອໄລຍະຕົ້ນເດືອນສິງຫາ.
ພາກພື້ນໃນເອີຣົບ ແລະ ທະເລເມດິເຕຣາເນຕາເວັນຕົກມີທ່າອ່ຽງທີ່ຈະພົບກັບສະພາບອາກາດທີ່ອົບອຸ່ນ ແລະ ແຫ້ງແລ້ງກວ່າສະພາວະປົກກະຕິໄປຈົນເຖິງເດືອນພະຈິກນີ້. ພືດຜົນໃນໄລຍະລະດູຮ້ອນຕ່າງກໍໄດ້ຮັບຜົນກະທົບໃນວົງກວ້າງ ໂດຍຜົນຜະລິດສາລີຂອງປີນີ້ຄາດວ່າຈະຕ່ຳກວ່າຄ່າສະເລ່ຍຂອງໄລຍະ 5 ປີທີ່ຜ່ານມາເຖິງ 16% ສ່ວນຜົນຜະລິດຖົ່ວເຫຼືອງ ແລະ ແກ່ນດອກຕາເວັນຄາດວ່າຈະຫຼຸດລົງ 15% ແລະ 12% ຕາມລຳດັບ ຍິ່ງໄປກວ່ານັ້ນການຜະລິດໄຟຟ້າພະລັງນ້ຳເລີ່ມພົບກັບບັນຫາ ແລະ ກະທົບຕໍ່ຜູ້ຜະລິດລາຍອື່ນຫຼາຍຂຶ້ນ ເນື່ອງຈາກການຂາດແຄນນ້ຳເພື່ອຊ່ວຍໃຫ້ລະບົບຫຼໍ່ເຢັນ ອີກທັງລະດັບນ້ຳທີ່ຫຼຸດຕ່ຳລົງຕາມແລວແມ່ນ້ຳໄຣ ຍັງເປັນອຸປະສັກຕໍ່ການຂົນສົ່ງພາຍໃນປະເທດເຮັດໃຫ້ປະລິມານການສົ່ງຖ່ານຫີນ ແລະ ນ້ຳມັນຫຼຸດລົງດ້ວຍ.
ເຖິງແມ່ນວ່າ EDO ຈະກ່າວວ່າ ເຫດການຝົນຕົກເມື່ອໄລຍະກາງເດືອນທີ່ຜ່ານມາອາດຈະຊ່ວຍບັນເທົາສະຖານະການໄດ້ ແຕ່ໃນບາງກໍລະນີກໍມີພາຍຸຝົນຟ້າປົກຄຸມທີ່ສ້າງຄວາມເສຍຫາຍເພີ່ມເຕີ່ມເຊັ່ນດຽວກັນ.
ຂ່າວ: ປະຊາຊົນ
