ບຸນເດືອນເກົ້າຫໍ່ເຂົ້າປະດັບດິນ

ໂດຍ: ທິດກໍ່າ

ບຸນຫໍ່ເຂົ້າປະດັບດິນປີນີ້, ກົງກັບວັນສຸກ ວັນທີ 26 ສິງຫາ 2022 ເປັນມື້ແຮມ 14 ຄໍ່າເດືອນ 9 ພສ 2565 ຕາມປະຕິທິນລາວເຮົາ. ໃນໂອກາດບຸນຫໍ່ເຂົ້າປະດັບດິນປີນີ້ ຊາວພຸດເຮົາທັງຫລາຍໃນທຸກບ້ານ, ທຸກວັດໃນຂອບເຂດທົ່ວປະເທດ ຕ່າງກໍໄດ້ກຽມຈິດກຽມໃຈ ທັງຫ້າງຫາກະກຽມວັດຖຸປັດໄຈ, ເຄື່ອງໄທຍະທານຕ່າງໆ ເພື່ອທຳບຸນຕາມຮີດຄອງປະເພນີ, ຕາມຮີດ 12 ຄອງ 14 ປະເພນີລາວ, ຮີດບໍ່ໃຫ້ໝອງຄອງບໍ່ໃຫ້ເສົ້າ.

ກ່າວກັນວ່າ, ນັບແຕ່ປາງພຸດທະການ ບຸນຫໍ່ເຂົ້າປະດັບດິນໝາຍເຖິງບຸນປະຈຳເດືອນເກົ້າ ເພາະໃນໜຶ່ງປີ ຫລືວ່າ 12 ເດືອນ ຈະມີບຸນປະຈຳໃນແຕ່ລະເດືອນເຊັ່ນວ່າ: ເດືອນສິບຈະມາເຖິງນີ້ແມ່ນບຸນຫໍ່ເຂົ້າສະຫລາກ, ເດືອນສິບເອັດແມ່ນບຸນອອກພັນສາ, ເດືອນສິບສອງແມ່ນບຸນພະທາດຫລວງ ເຫລົ່ານີ້ເປັນຕົ້ນ.

ບຸນຫໍ່ເຂົ້າປະດັບດິນໄດ້ແກ່ການນຳເອົາເຂົ້າ, ເຄື່ອງສົ້ມເຄື່ອງຫວານ, ເຂົ້າຕົ້ມເຂົ້າໜົມ, ໝາກຈີບ, ກອກຢາຫໍດ້ວຍໃບຕອງກ້ວຍ ຫລື ໃສ່ພາຊະນະອື່ນໆ ນຳໄປວາງໄວ້ຕາມບໍລິເວນໜ້າດິນ ຫລື ໃນບ່ອນທີ່ຕົນເຊື່ອວ່າເປັນບ່ອນສັກສິດນັບຖືເຊັ່ນ: ຕາມວັດວາອາຮາມ, ຕາມບ້ານເຮືອນທີ່ຕົນອາໄສຢູ່, ຕາມໄຮ່ນາຮົ້ວສວນທີ່ຕົນເອງໄດ້ອາໄສທຳມາຫາກິນ ຫລື ຫ້ອຍໄວ້ຕາມຕົ້ນໄມ້ ເພື່ອໃຫ້ດວງວິນຍານບັນພະບູລຸດ, ຍາດຕິພີ່ນ້ອງໄດ້ກິນສິ່ງທີ່ພວກເຮົາໄດ້ອຸທິດໃຫ້ທານໄປນັ້ນ ຂໍຈົ່ງພົ້ນຈາກຄວາມທຸກຍາກ, ອຶດຫິວ ເພາະໃນມື້ນັ້ນເປັນມື້ຈ່າຍົມພິບານໄດ້ອະນຸຍາດໃຫ້ຜຸດຜີປີສາດ, ອະສຸຣະກາຍທັງຫລາຍ ແລະ ວິນຍານຂອງຍາດຕິພີ່ນ້ອງມາຮັບເອົາຜົນທານຂອງຜູ້ຍັງມີຊີວິດໄດ້ໃຫ້ທານໄປໃນວັນບຸນຫໍ່ເຂົ້າປະດັບດິນນັ້ນແລ.

ແນວໃດກໍຕາມ, ນີ້ແມ່ນຮີດຄອງປະເພນີທີ່ເຄີຍປະຕິບັດກັນມານັບແຕ່ສະໄໝພຸດທະການ ແລະ ຂຶ້ນກັບຄວາມເຊື່ອຂອງແຕ່ລະຄົນ, ແຕ່ສິ່ງສຳຄັນນີ້ຄືການໃຫ້ທານວັດຖຸປັດໄຈແກ່ສັບພະສັດທັງຫລາຍ ນັບແຕ່ນ້ອຍຫາໃຫຍ່, ນັບແຕ່ມົດແມງນົກໜູປູປີກ ຫລື ສັດອື່ນໆ ໃນເມື່ອເຮົາໄປວາງໄວ້ແລ້ວຈະມີຫຍັງມາກິນນັ້ນກໍສຸດແລ້ວ ເພາະມື້ນີ້ເຮົາໄດ້ໃຫ້ທານໄປແລ້ວ.

ຖືວ່ານັບແຕ່ວິນາທີເຮົາອະຖິຖານໄປໃຫ້ແລ້ວ ເຮົາເອງຜູ້ໃຫ້ທານກໍດີໃຈ, ສະບາຍໃຈປຽບເໝືອນເຮົາໄດ້ສ້າງຄວາມດີໃຫ້ບັນພະບູລຸດ, ຍາດຕິພີ່ນ້ອງ ຕະຫລອດສັບພະສັດທັງຫລາຍກໍຫວັງວ່າພວກເພິ່ນຈະມາຮັບເອົາຜົນບຸນທີ່ເຮົາໄດ້ໃຫ້ທານໄປນັ້ນໝົດທຸກທ່ານ, ທຸກອົງ, ທຸກຕົນ ແລະ ທຸກຄົນນັ້ນດ້ວຍ.

ໄປຄຽງຄູ່ກັບການທຳບຸນໃຫ້ທານໃນໂອກາດບຸນເດືອນເກົ້າຫໍ່ເຂົ້າປະດັບດິນປີນີ້ແລ້ວ, ເພື່ອໃຫ້ມີບັນຍາກາດມ່ວນຊື່ນຄຶກຄື້ນມີຄວາມໝາຍໃນຍຸກພັດທະນາຄືປັດຈຸບັນ ມີຫລາຍທ້ອງຖິ່ນເຂດແຂວງໄດ້ຈັດກິດຈະກຳຕ່າງໆເສີມສ້າງໃຫ້ມ່ວນຊື່ນຄຶກຄື້ນຕາງຫາລາຍໄດ້ຈາກຜູ້ຄົນທີ່ໄປທ່ຽວໃນງານເຊັ່ນ: ຈັດກິດຈະກຳວາງສະແດງບໍລິການຂາຍສິນຄ້າປະເພດຕ່າງໆ.

ນອກຈາກນັ້ນ ກໍມີກິດຈະກຳແຂ່ງຂັນຊ່ວງເຮືອເຫລົ່ານີ້ເປັນຕົ້ນ. ບັນດາເຂດແຂວງທີ່ຈັດໄດ້ດີກວ່າໝູ່ໃນຍາມບຸນຫໍ່ເຂົ້າປະດັບດິນກໍແມ່ນນະຄອນຫລວງພະບາງ ຍ້ອນວ່າເປັນຮາກເຫງົ້າແຫ່ງວັດທະນະທຳ ທັງເປັນເມືອງມໍລະດົກໂລກ. ໃຜຢາກມ່ວນຊື່ນໃນຍາມບຸນຫໍ່ເຂົ້າປະດັບດິນໃຫ້ໄປທ່ຽວເມືອງຫລວງພະບາງຈະໄດ້ອີ່ມເອີບກັບຮີດຄອງປະເພນີອັນສວຍງາມຂອງເມືອງລາວຢ່າງແທ້ຈິງ.