ລາຄາແກ໊ສໃນເອີຣົບສູງຂຶ້ນ ເພີ່ມຄວາມກັງວົນການຂາດແຄນແກ໊ສໃນລະດູໜາວປີນີ້

ຂ່າວຕ່າງປະເທດລາຍງານ ເມື່ອວັນທີ 23 ສິງຫາ 2022 ທີ່ຜ່ານມາວ່າ: ລາຄາແກັສທຳມະຊາດໃນເອີຣົບເພີ່ມສູງຂຶ້ນທ່າມກາງຄວາມກັງວົນວ່າ ບັນຫາພະລັງງານຂາດແຄນໃນລະດູໜາວອາດຈະສົ່ງຜົນກະທົບຢ່າງໃຫຍ່ຫລວງຕໍ່ເສດຖະກິດຂອງພາກພື້ນ.

ລາຄາສັນຍາແກັສລ່ວງໜ້າເພີ່ມຂຶ້ນເຖິງ 5,2% ຢູ່ທີ່ 291 ຢູໂຣຕໍ່ເມກະວັດຊົ່ວໂມງ ຫຼັງຈາກທີ່ສ້າງສະຖິຕິສູງທີ່ສຸດເມື່ອວັນທີ 22 ສິງຫາທີ່ຜ່ານມາ. ຂ່າວແຈ້ງວ່າ ບໍລິສັດແກັສພຣອມຂອງຣັດເຊຍໄດ້ປະກາດຈະຢຸດຕິສົ່ງແກັສຜ່ານທໍ່ສົ່ງ ນອດ ສຕຣີມ (Nord Stream) ໃນວັນທີ 31 ສິງຫາ ເປັນເວລາ 3 ວັນ ເພື່ອເຮັດການປັບປຸງປ່ຽນແປງ ເຮັດໃຫ້ເກີດຄວາມກັງວົນອີກຄັ້ງວ່າ ຈະບໍ່ມີການສົ່ງອອກແກັສຕໍ່ໄປຫຼັງຈາກທີ່ການປັບປຸງປ່ຽນແປງສຳເລັດ. ນອກຈາກນີ້, ປະລິມານແກັສທີ່ຫຼຸດລົງນັ້ນຈະສົ່ງຜົນກະທົບຕໍ່ຄວາມພະຍາຍາມໃນການເພີ່ມປະລິມານແກັສຂອງເອີຣິບ ເພື່ອກຽມພ້ອມສຳລັບລະດູໜາວ.

ທ່ານ ລີອອນ ອິສບິດກິ ນັກວິເຄາະແກັສຈາກ Energy Aspects ຊີ້ໃຫ້ເຫັນວ່າ ລາຄາແກັສອາດຈະເພີ່ມສູງຂຶ້ນເຖິງ 400 ຢູໂຣຕໍ່ເມກະວັດຊົ່ວໂມງ ຖ້າຫາກທໍ່ສົ່ງ Nord Stream ຢຸດຕິການສົ່ງແກັສໃນເດືອນກັນຍາພ້ອມທັງກ່າວວ່າ ລາຄາໃນປັດຈຸບັນມີຜົນກະທົບຢ່າງໜັກຕໍ່ຄວາມຕ້ອງການແກັສໃນພາກອຸດສາຫະກຳຂອງເອີຣົບ ໂດຍຂໍ້ມູນຂອງພວກເຮົາຊີ້ໃຫ້ເຫັນວ່າ ຄວາມຕ້ອງການແກັສໃນພາກອຸດສາຫະກຳຂອງເອີຣົບຕາເວັນຕົກຫຼຸດລົງ 15% ໃນປີ 2022.